JOSUA 11 - Bawm Common Language Bible Version

Josua Nih Jabin Leh A Ṭângṭawmtu Tla A Nehnâk

¹ Israel tla nih an neh na mi thu chu Hazor mi Jabin lalchem nih a theih le, Madon ah mi Jobab lalchem, Simron lalchem leh Akshap lalchem,

² marlei kângah tlâng ram ah mi lalchem tla, Galili Rilî simlei kângah Jordan Vakuam mi tla, tlâng bul ah um mi tla, ramri leikângah Dor kiangah um mi sinah thu a thanh na rawh.

³ Chu lo khawm ah Jordan Va kiangkam Kanaan mi tla, Amor mi tla, Hit mi tla, Periz mi tla, tlâng ram ah Jebus mi tla, Mizpah ram ah Hermon Tlâng bul ah Hiv um mi tla sin khawm ah thu a thanh na.

⁴ An kawrsen tla leh an minung tla tipi kap ah risep zat hen an hawng kal. Rang leh kari tla cherkhet an nei.

⁵ Chubang lalchem zawzawng tla chu thu anna rual le, Israel tla do ding hen Merom Tiva ah munkhat ah anna kulh.

⁶ LALPA nih Josua sinah, “Annih tla chu ṭih lah na. Thâituan tu tik ding ah hin Israel tla ruangrûl ah Keimah nih ka thah na hep awt. An rang tla nan khêngtir na lai le, an kari tla nan duah ver lai,” a ti.

⁷ Churawhchun, Josua leh a minung tla nih Merom Tiva ah chê rê hen an do na rawh.

⁸ LALPA nih Israel tla chu anmah a nehtir na le, Israel tla nih an do na le, marlei kângah Misrephot Maim leh Sidon tiang hen an ṭhâwl na, saklei kângah Mizpah kuam tiang an ṭhâwl na. An do vima na le, pakhattê khawm relh lo hen an thah hep na.

⁹ LALPA nih thu a pêk hâwi hen Josua nih a ti rawh. An rang tla a khêngtir na le, an kari tla a duah hep.

¹⁰ Josua chu a kîr le, Hazor khua an lâk le, an lalchem a thah. (Chu liau chun Hazor chu lalram dang tla ngâk hen a chak chem.)

¹¹ Chunah chun mi zawzawng an thah hep na le, pakhat khawm an suah na lo, an khuapi chu an duah hep.

¹² Josua nih hi khuapi tla zawzawng a lâk le, an lalchem tla khawm, minung zawzawng khawm LALPA to-aw Mosi nih thu a pêk hâwi hen a thah hep na.

¹³ Sikhawmsele, Hazor khua Josua nih a duah mi cho lo chu Israel tla nih zei khua khawm an tlângah khuapi tla pakhat khawm an duah lo.

¹⁴ Israel mi tla nih thil sung tla, ranrual tla, chubang khuapi thawk hen an lâk mi chu mah rangah anna ting. Minung lam chu an thah hep na le, pakhat khawm an zuah na lo.

¹⁵ LALPA nih a to-aw Mosi sinah thu a pêk le, Mosi nih Josua rangah a pêk bâk. Josua nih chu thu a zûl. Mosi rangah thu a pêk mi zawng chu a ti ver.

Josua Nih Ram A Lâk Mi

¹⁶ Josua nih ram zawzawng tlâng tlûnlei mi leh tlâng tanglei mi, marlei leh simlei mi, Gosen ram zawzawng leh simlei mi ramkaro, Jordan Vakuam tla khawm a lâk hep.

^17-18 Simlei kâng Edom kiangah mi Halak Tlâng thawk hen marlei kângah Baalgad tiang asi, chu chu Hermon Tlâng simlei Lebanon kuam asi. Josua chu hi tlâng ram lalchem tla hen hun sâwt tak anna do, sikhawmsele a thah hep na le, a lâk hep na.

¹⁹ Israel mi tla hen remnâk siamtu Gibeon khua ah um mi Hiv tla lâwng zuah hen an um. A dang zawng chu râltuknâk ah neh ver an si.

²⁰ LALPA nih Israel tla do ding hen a duhtir na le, khuaruat lo thlo hen mawhnâk ruangah thah hep an si khonâk ding hen. Chu tak chu LALPA nih Mosi sinah thu a pêk mi chu asi.

²¹ Hi liauah hin Josua nih milian chi Anakim an ti mi tlâng ram ah Hebron, Debir, Anab ah um mi tla leh Juda tlâng ram ah um mi leh Israel ram ah um mi zawzawng tla a veih dep na. Josua nih an khuapi leh anmah a veih dep na.

²² Anakim murui rerêng chu Israel ram ah an zuah lo, sikhawmsele Gaza, Gath leh Asdod ah tâwm an um.

²³ Mosi nih thu a pêk hâwi hen Josua nih ram pumpi a lâk hep rawh. Anmah tâ si rawh ding hen Israel tla chu a pêk na le, anmah tingvo chiau a siam piak na, tingvo khat chu phun khat rang vima ding hen. Churawhchun, mi tla chu râl tuknâk chu anna dîn rawh.