JOSUA 10 - Bawm Common Language Bible Version

Amor Mi Tla Neh An Si

¹ Adonizedek, Jerusalem lalchem nih Josua nih Ai khua leh a lalchem chu Jeriko khua leh a lalchem tlûnah a ti mi hâwi hen a lâk le, a râwk dep ti a theih. Gibeon mi tla khawm nih Israel tla hen remnâk an siam le, anmah tla sinah an um bâk ti a theih.

² Jerusalem mi tla khawm chu thu ruangah thungâi an ningṭih. Gibeon chu lalchem tla nih khua an nei mi lakah chun khua lian tak asi. Ai khua ngâk hen khawm a lian, chunah minung tla khawm râltuk thiam mi an si.

³ Churuangah Adonizedek nih Hebron ah mi lalchem Hoham, Jarmut ah mi Piram lalchem, Lakis ah mi Japhia lalchem leh Eklon ah mi Debir lalchem sinah hi bang thu hi a chah na.

⁴ “Gibeon do ding hen hawng ule, hawng ka ṭangpi u, annih nih Josua leh Israel tla hen remnâk an siam ruangah,” a ti na.

⁵ Hi Amor lalchem panga tla, Jerusalem, Hebron, Jarmot, Lakis leh Eklon lalchem tla chu thurual hen Gibeon chu an kulh le, an do rawh.

⁶ Gibeon mi tla nih Gilgal riakmun ah mi Josua sinah thu an tlunh: “Pu, hawng kan thlawrhthlâu rîlmâl lah, khulrang hen hawng le, hawng kan hum! Amor lalchem tla tlâng ram ah mi anna bawp le, hawng kan do hi!” an ti.

⁷ Josua leh a kawrsen ṭha chem murui hen Gilgal mun thawk hen anna thawh rawh.

⁸ LALPA nih Josua sinah, “Annih tla chu ṭih lah na. Nehtu sinâk ka nan pêk ving rawh. Nangmah do hen âukhawm an dîr kho lai lo,” a ti.

⁹ Khua dei ver Josua leh a kawrsen tla chu Gilgal thawk hen Gibeon leiah an kal rawh. Amor tla chu chê ti rê hen an do na.

¹⁰ Israel tla mitmuh ah Amor tla chu neh hen a tektir na. Israel tla nih Gibeon ah thungâi an thah na le, tlâng liamnâk Beth Horon tiang an ṭhâwl na, an do vima na le, Azekah leh Makedah simlei lât tak tiang an ṭhâwl na.

¹¹ Amor tla Israel kawrsen lakah thawk hen an tek hen tlâng an liam liauah chun LALPA nih rial lian tak lampi tluan hen Azekah tiang hen a tlâktir. Israel tla nih an thah na mi ngâk hen rial nih a thah na mi an tam dauh.

¹² Israel tla rangah LALPA nih Amor tla a nehtir na ni ah chun Josua nih Israel tla mâika ah LALPA chu a sawnh le, “Nî, Gibeon khua tlûnah dîr ko: Thlâ, Aijalon Kuam tlûnah a dîn rawh,” a ti.

¹³ Nî khawm a dîr ko, thlâ khawm â ṭhial lo, Israel tla nih an mêlma tla an neh na lânlo chu. Hi hi Jashar Lasuibu ah rîn asi. Nî chu vân lâi ah a dîr kumza le, ni khat tlâ lo hen a um.

¹⁴ A lânah chu hâwi a um dah loh, hi hâwi tluk hen LALPA nih minung thu a ngâi piak dah loh. LALPA nih Israel tla chu a dopi na.

¹⁵ Churawhchun, Josua leh kawrsen tla chu an riaknâk mun Gilgal ah an kîr rawh.

Josua Nih Amor Lalchem Panga A Neh Na

¹⁶ Amor lalchem panga chu zeitin tin mawh an suak le, Makedah pûk ah anna thup.

¹⁷ Âunih mawh an muh na le, anna thup mi chu Josua rangah an simh.

¹⁸ Anih nih, “Pûk kâ ah lung lian pipî rilh ule, chunah vêngtu siah na u,

¹⁹ sikhawmsele nannih lam chu chunah va um lah u. Mêlma dunglei kângah um ule, nanna thupnâk thawk hen do na u. An khuapi sungah lûttir rêng lah na u! LALPA nan Pathian nih anmah nehtu ah a nan siam na rawh asi,” a ti.

²⁰ Josua leh Israel mi tla nih an thah na, sikhawmsele a zeimaw mi chu khuapi sungah himnâk an hâwl le, thah an si lo.

²¹ Josua minung tla chu Makedah riakmun ah him tak hen an hawng kîr nawlh rawh. Ram lakah mi âukhawm nih Israel tla sâwi hen thu an sim ngam lo rawh.

²² Josua nih, “Kha pûk kawtkâ kha awng ule, lalchem panga tla hawng put na u,” a ti.

²³ Churawhchun, pûk chu an awng le, Jerusalem lalchem, Hebron lalchem, Jarmut lalchem, Lakis lalchem leh Eklon lalchem tla chu an suakpi na le,

²⁴ Josua sinah an kalpi na. Josua nih Israel mi tla zawzawng chu a sinah a kawh ver na le, a sinah kal mi hotu tla khawm a kawh na le, an keza chu lalchem tla ngâwng tlûnah thâng ding hen thu a pêk na le, chu hâwi hen an ti.

²⁵ Josua nih hotu tla sinah, “ṭih lah ule, dâwk lah u. Tumnâk nei thlir hen zumh thlir ule, nan mêlma zawzawng lakah LALPA nih hi hâwi hen a ti na awt ruangah,” a ti.

²⁶ Josua nih lalchem tla chu a thah na le, thing panga lakah an ruak chu a thlâi na le, zânlei tiang a siah na.

²⁷ Nî tlâk nûnah chun an ruak tla lâk na hen a lânah anna thupnâk pûk ah lawnh ding hen thu a pêk na. Pûk kâ ah chun lung lian tak an siah le, chunah chun an um ko rawh.

Josua Nih Amor Ram Tamtak A Lâk

²⁸ Chu ni ah chun Josua nih Makedah leh a lalchem chu a neh na le, khua mi tla zawzawng chu a thah na le, pakhat khawm nung hen a zuah na lo. Jeriko khua lalchem tlûnah a ti ziatê hen Makedah lalchem tlûnah khawm a ti rawh.

²⁹ Chu nûnah chun Josua leh a kawrsen tla chu Makedah thawk hen Libnah ah an kal le, an va do na.

³⁰ LALPA nih Israel tla chu khuapi leh an lalchem tlûnah nehnâk a pêk na. Pakhattê khawm zuah lo hen an thah hep na. Jeriko khua lalchem tlûnah an ti ziatê hen chu lalchem tlûnah khawm an ti.

³¹ Chu nûnah chun Josua kawrsen tla chu Libnah thawk hen Lakis ah an kal vima le, an kulh le, an do.

³² LALPA nih Israel tla chu an do mi a ni nihnâk ah nehnâk a pêk na. Libnah ah an ti mi hâwitê hen pakhat khawm an zuah na lo, khuapi sungah minung tla chu an thah hep na.

³³ Gezer mi Horam lalchem chu Lakis bawmh ding hen a hawng le, sikhawmsele Josua nih amah leh a kawrsen tla chu a neh na le, a thah hep na.

³⁴ Churawhchun, Josua leh a kawrsen tla chu Lakis thawk hen Eklon ah an kal le, an kulh le, an do.

³⁵ Chu ni ah chun an lâk le, Lakis ah an ti mi hâwi hen an thah hep na.

³⁶ Chu nûnah chun Josua chu a kawrsen tla hen Eklon thawk hen thlanglei ah mi Hebron ah an va kâi le, an do le,

³⁷ an lâk na. Lalchem leh khuapi sungah mi zawzawng an thah na le, a kiangkam khua mi tla khawm. Josua nih Eklon ah a ti mi hâwi hen khuapi chu a râwk dep, pakhat khawm nung hen a zuah na lo.

³⁸ Josua leh a kawrsen tla chu Debir leiah an kîr le, an do.

³⁹ Lalchem leh a kiangkam ah mi zawzawng a lâk hep, chunah mi chu a thah hep na. Josua nih Hebron leh Libnah leh a lalchem tlûnah a ti mi hâwitê hen Debir khua leh a lalchem tlûnah a ti.

⁴⁰ Josua nih ram pumpi a neh rawh. Tlâng ram ah lalchem tla zawzawng a neh na le, saklei ram ah mi tla leh thlanglei kâng tlâng bul ah mi tla, marlei kâng ramkaro mun ah mi khawm. Pakhat khawm a zuah na lo, an ektê hen a thah hep na. Chu chu Israel LALPA Pathian thupêk asi.

⁴¹ Josua nih a lâk mi vial, simlei kângah Kades Barnea thawk hen Gaza ramri kiang leh Gosen ram zawzawng, marlei kâng Gibeon tiang hen asi.

⁴² Josua nih veikhat rûnnâk ah lalchem zawzawng leh a ram tla a lâk hep, LALPA, Israel Pathian nih Israel tla ruangrûl ah a do piak na ruangah.

⁴³ Chu nûnah chun Josua leh a kawrsen tla chu Gilgal leiah an kîr rawh.