JOSUA 1 - Bawm Common Language Bible Version

Josua Chu Pathian Nih Kanaan Ram Neh ding Hen Thu A Pêk

¹ LALPA to-aw Mosi a thih nûnah Nun fapa Josua, Mosi ṭangpitu sinah LALPA nih thu a simh.

² “Ka to-aw Mosi chu a thi rawh le, tuah a tîm le, Israel mi tla zawzawng hen Jordan Va kanh ule, Ka pêk na mi ram leiah kal u.

³ Mosi sinah ka sim rawh hâwi hen a mi zawzawng leh a ram pumpi nan ṭawl ding mi tla chu kan pêk hep na rawh.

⁴ Nan ramri ding mi chu simlei ramkaro thawk hen marlei kang Lebanon Tlâng tiang; saklei kângah Eufretis Va thawk hen Hit ram zawzawng leh thlanglei kângah Mediteranian Tipi tiang asi lai.

⁵ Josua, nang rangah neh khotu ding na dam karah âukhawm an um lai lo. Mosi sinah ka um hâwi ber hen na sinah ka um lai, na sinah ka um kumza lai le, zeiliau khawm kan kaltâk lai lo.

⁶ Tum thlir le, zumh thlir hen um, an thlâktu tla sinah ka tiamh mi ram luah ding hen hi bang zapi ruitu na si awt ruangah.

⁷ Rep tak leh tumnâk nei thlir leh zumh thlir hen um; Mosi ka to-aw nih a nan pêk mi dân zawzawng zûl ding hen theih set, a zeitê khawm thlawrhthâu lah le, na kalnâk zawzawngah na dingchang lai.

⁸ Pathian nan sawnhnâk kip ah hi dân bu hi rêl kumza ding asi ti theih set rawh. A sûn a zân hen a sîn le, a sungah rîn mi zawzawng tla hi zûl ding ti theih set rawh. Chu tikah na sul-le-lam a tluang hen na dingchang lai.

⁹ Tum thlir leh zumh thlir ding hen thu ka nan pêk asi ti theihkumza! ṭih lah le, dâwk lah, Kei, LALPA na Pathian, na kalnâk kip ah ka um vima lai,” a ti.

Josua Nih Zapi tla Thu A Pêk Na

¹⁰ Zapi tla sinah thusim ding hen ruitu tla chu Josua

¹¹ nih riakmun ah a fial na, “Buh ei ding timhtuah u, tusûn thawk hen a ni thum ni ah LALPA nan Pathian nih ram luah ding hen a nan pêk na mi luah ding hen Jordan Va nan kanh awt asi,” a ti.

¹² Josua nih Reuben phun leh Gad phun leh Manaseh phun khingkhuai tla sinah,

¹³ “Mosi, LALPA to-aw nih Jordan Va saklei kâng ram hi nan umnâk ding hen LALPA nan Pathian nih a nan pêk na ti a nan simh na kha.

¹⁴ Nan nupi tla, nan fa tla, nan ranrual tla hinah an um lai le, sikhawmsele, nan kawrsen tla râltuk ding mi tla chu,

¹⁵ Jordan Va thlanglei kâng ram, LALPA nan Pathian nih a pêk na mi an luah tiang hen ṭangpi na ding hen nan hâwi Israel tla mâi nan ruai na hen nan ṭangpi na ding asi. Him tak hen Israel fa tla rangah pêk asi tikah hi Jordan saklei Mosi, LALPA to-aw nih an pêk na mi nan ram ah hin nan hawng kîr lai le, nan um lai rawh,” a ti.

¹⁶ Josua rangah an sâng le, “Na kan simh mi vial chu kan ti vima lai le, na kan fialnâk zawng ah kan kal lai.

¹⁷ Mosi thu kan ngâi mi hâwi hen nang thu khawm kan ngâi vima lai; LALPA na Pathian chu Mosi sinah a um mi hâwi hen nang sinah khawm um seh!

¹⁸ Na thu êltu leh na thupêk zûl duhlotu chu thah ding asi. Tum thlir le, zumh thlir ko!” an ti.