JOHAN 18 - Bawm Common Language Bible Version

Jisu Tleihnâk

¹ Jisu nih chubang thu chu a sim thluh rawh chun, a ṭhiruai tla hen an suak le, Kidron tiva an kanh. Chunah chun dûm a um, chunah chun an lût le, amah leh a ṭhiruai tla hen.

² Chun, a tleihtirtu Juda khawm nih chu mun chu a theih; Jisu chu a ṭhiruai tla hen chunah chun a kal tâwn ruangah.

³ Chun, Juda nih chun kawrsen rual hen, bâwlpu lal tla leh Farisai tla sinah um mi vêngtu tla hen a kalpi na le;

⁴ Jisu nih a tlûnah thil tlung ding zawzawng chu theih hen, a va suak le; an sinah, “Âu me nan hâwl?” a ti.

⁵ Annih nih chun a sinah, “Nazaret mi Jisu,” an ti le, an sâng. Jisu nih an sinah; “Keimah hi kasi,” a ti. Chun, a tleihtirtu Juda khawm chu an lakah a dîr.

⁶ Chun, “Keimah hi kasi,” a ti kâ hen, an dung leiah anna nâwp le, tual ah an tlû.

⁷ Chun, anih nih chun an sinah, “Âu me nan hâwl?” a ti le, a deih nawlh. Chun, annih nih chun,”Nazaret mi Jisu,” an ti.

⁸ Jisu nih, “Keimah hi kasi ti ka nan simh na khateh; nannih nih kei nan ka hâwl asi chun hi bang tla hi kaltir u,” a ti le, a sâng.

⁹ (A thusim, “Pa, nangnih kei na ka pêk mi tla lakah pakhat khawm ka thlâu lo,” a ti mi kha a tlungnâk ding hen.)

¹⁰ Chun, Simon Peter nih nâmsâu a pâi mi a phâwi le, Bâwlpu Lalchem sal a tuk le, a vawrhlei nakhaw a themh phak. Sal min chu Malka asi.

¹¹ Chun, Jisu nih Peter sinah, “Nâmsâu kha a kâwng ah khumh nawlh rawh; Pa nih hâi hawng ka pêk mi hi ka din lo lai ma?” a ti.

Ana Sinah Jisu an Kalpi

¹² Chuvachun, kawrsen murui leh an hotu lalchem hen, Juda tla vêngtu tla nih chun Jisu an tleih le, an phuar le,

¹³ Ana sinah an kalpi masa le, Kaiapha nupi pa asi ruangah. Kaiapha chu, chu kum chun Bâwlpu Lalchem asi.

¹⁴ Kaiapha chu, “Phun pumpi ruangrûl ah minung pakhat thih a ṭha,” ti hen, Juda tla thlûkpitu kha asi.

Peter nih Jisu a Phehnâk

¹⁵ Chun, Simon Peter nih Jisu a zûl le, a ṭhiruai dang pakhat hen. Chu ṭhiruai chu Bâwlpu Lalchem mêltheih asi le, Jisu sinah Bâwlpu Lalchem in kulhsung tualmâi ah a lût bâk le;

¹⁶ sikhawmsele Peter chu lêng leiah kawtkari ah a dîr. Chun, ṭhiruai dang, Bâwlpu Lalchem mêl theih chu a va suak le, inkhâr vêngtu nungâk a sawnh le, Peter a lûtpi.

¹⁷ Chun, inkhâr vêngtu nungâk nih chun Peter sinah, “Nang khawm hi minung ṭhiruai tla lakah tel bâk na si mu?” a ti. Anih nih chun, “Ka si lo,” a ti.

¹⁸ Chun, sal tla leh vêngtu tla chu chunah chun an dîr le, a dâi ruangah meihawl hen mei an tih le, anna aih. Peter khawm an sinah â tel le, dîr bû hen mei â aih bâk.

Bâwlpu Lalchem nih Jisu Rangah Deihnâk

¹⁹ Chun, Bâwlpu Lalchem nih chun Jisu chu a ṭhiruai tla thâwngthâng leh a sîntir zia thu a deih.

²⁰ Jisu nih a sâng le, a sinah,”Laikulh sinah mi zatlâng theih hen, thu ka sim tâwn kha; pumhnâk in leh Pathian Biakin, Juda zawzawng pumhnâk tla ah chun ka sîntir kumza na tâwn kha. A thup hen zeikhawm ka sim lo.

²¹ Zei rangah kei na ka deih? An sinah ka thusim zia ka thu theihtu tla deih; ngâi rawh, chubang nih chun ka thusim chu an theih khateh,” a ti.

²² Chu chu a sim kâ hen a kiangah a dîr mi vêngtu pakhat nih Jisu a bengh le, “Bâwlpu Lalchem hi hâwi hen na sâng mu?” a ti.

²³ Jisu nih a sinah,”Thu sual sim kasi chun, ka sualnâk hawng ka theihtir; sikhawmsele, thu ṭha ka sim khawm ah zei rangah na hawng ka bengh?” a ti le, a sâng.

²⁴ Chun, Ana nih chun phuar bû hen Bâwlpu Lalchem Kaiapha sinah a fial.

Peter nih Jisu a Pheh Nawlh

²⁵ Chun, Simon Peter nih dîr bû hen mei â aih. Chun, “Nang khawm a ṭhiruai lakah tel bâk na si mu?” an ti. Peter lam nih chun, “Ka si lo,” ti hen â pheh.

²⁶ Bâwlpu Lalchem sal tla lakah pakhat Peter nih a nakhaw a themh piak mi rualsia nih chun, “A sinah dûm ah khan ka nan muh lo mazei?” a ti.

²⁷ Chun, Peter chu â pheh nawlh le; chun âr a khuang sawm rawh.

Jisu Pilat Mâika ah a Dîrnâk

²⁸ Chun, Jisu chu Kaiapha in thawk hen Governor in ah an kalpi nawlh le; zînglei asi le; chun, annih lam chu Governor in ah an lût lo, nawmh lo hen, Kalkanh Kût an ei khonâk ding hen.

²⁹ Chun, Pilat an sinah a va suak le, an sinah, “Hi minung tlûnah hin thupawi zei me nan nei?” a ti.

³⁰ Annih nih chun a sinah, “Hi minung hi misual si lah sele na sinah kan hawngpi lai loh,” an ti le, an sâng.

³¹ Chun, Pilat nih an sinah, “Nanmah nih kalpi ule, nan dân hâwi hen a lâi rêl u,” a ti. Juda tla nih a sinah, “Kanmah thu hen âukhawm thah khonâk kan nei lo,” an ti.

³² A thih zia ding thu Jisu nih a sim hâwi hen a tlung khonâk ding hen.

³³ Chuvachun, Pilat chu a in ah a lût nawlh le, Jisu a kawh le, a sinah, “Juda tla Lalchem na si ma?” a ti.

³⁴ Jisu nih, “Hi hi nangmah phuak sawm hen ma na sim, midang nih an simh mi ma, ka thâwngthâng hi?” a ti le, a sâng.

³⁵ Pilat nih, Kei Juda kasi mazei? Nangmah phun tla leh bâwlpu lal tla nih ka sinah a nan hawngpi asi hi; zei thil me na ti?” a ti le, a sâng.

³⁶ Jisu nih “Lalchem ka sinâk chu hi laikulh thawk hen mi asi lo. Lalchem ka sinâk chu hi laikulh thawk mi si sele, ka to-aw tla nih an do lai; Juda tla sinah pêk hen ka um lonâk ding hen; sikhawmsele, lalchem ka sinâk chu hinah thawk hen mi hi asi lo,” a ti le, a sâng.

³⁷ Chun, Pilat nih a sinah, “Lalchem na si na maw?” a ti. Jisu nih, “Si ta a, Lalchem kasi. Thutak theihtir hi ka suak san leh laikulh ah ka hawng san asi. Âuzawng thutak lakah mi vial nih ka thu a zâwt tâwn,” a ti.

³⁸ Pilat nih a sinah, “Thutak zei me si?” a ti. Chun, chu thu chu a sim kâ hen, a suak nawlh le, Juda tla sinah a va suak nawlh le, an sinah, “Zeikhawm a sualnâk ka muh lo.

Jisu Thi Ding hen Lâirêlnâk

³⁹ Sikhawmsele, Kalkanh Kût ah minung pakhat kan suah piak na ding hen Dân nan nei; chuvachun, Juda tla Lalchem hi an suah piak na sele nan duh ma?” a ti.

⁴⁰ Chun, annih chu an âu nawlh le, “Hi minung hi chu si lah seh; Baraba si dauh seh,” an ti. (Baraba chu rawkmang asi.)