JOEL 3 - Bawm Common Language Bible Version

Pathian Nih Phun Tla Lâi A Rêl Lai

¹ LALPA nih, “Chu tikah chun Juda leh Jerusalem sul-le-lam ka tluangtir lai.

² Phun tla zawzawng ka pumh lai. Lâirêlnâk (Jehoshaphat) Vakuam ah ka put na lai. Chun ka mi le tlûnah thil an ti mi ruangah lâi ka rêl lai. Ramdang ah Israel tla chu an rek phin na le, Israel umnâk ka ram chu an semsâi ver.

³ Sal tla âu ting ding asi ti theih ding hen chamchawhnâk an siam. Nunau â zuar mi man leh uain man rang ding ah mipa ngâksia sal ah an zuar na.

⁴ Tura, Sidon leh Philistia ram kiangkam mi zawzawng tla, ka lakah zei me ti ding na tum? Thil zeimawh ruangah lehrûl sam ding ma na ka awt? Chu hâwi mi na si chun ka nan rulh sawm lai!

⁵ Ka tangka leh ngûn tla na lâk le, ka neihsiah tla chu na biakin sungah na put.

⁶ Jerusalem ah mi tla leh Juda mi tla chu na kalpi le, Greek mi tla sinah na zuar na.

⁷ Tu chun na zuar na mi mun thawk hen ka lâk na awt rawh. An lakah na ti mi hâwitê hen nan lakah ka nan ti na awt.

⁸ Nan fapa leh nan fanu tla chu Juda mi tla sinah zuar hen ka umtir na awt; ram lât takah Sabe mi tla sinah an zuar na lai. Kei, LALPA nih ka sim mi asi.

⁹ “Phun tla lakah hi thu hi sim u; ‘Râldo ding hen a timhtuah ule; nan râldo thiam tla kawh na ule; nan kawrsen zawzawng pumh na ule, kal u!

¹⁰ Nan phâisen nâwnnâk thîr zum tla chu nâmsâu ah dêng ule, nan nâmtê tla fei rangah dêng u, mi chaklo khawm nih do ding asi.

¹¹ A nam ule, mawhsareh hen hawng u. Nannih a kiangkam a mi phun zawzawng tla, tivakuam ah hawng a pûm u!’ ” a ti. LALPA, anmah tla do ding hen na kawrsen tla hawng fial na.

¹² Phun tla chu timhtuah zet hen an um lai. Lâirêlnâk (Jehoshaphat) Vakuam ah an hawng ding asi. Chunah chun Kei, LALPA nih, a kiangkam ah mi phun tla lâirêl ding hen ka to lai.

¹³ An sual tuktarâi; fângzûn liau fâng tla hâwi hen ât phin na le; grep a sûrnâk lakah a uain hâng suak rê hen an sûr mi hâwi hen sûr na.

¹⁴ A sang sang hen Lâirêlnâk (Jehoshaphat) Vakuam ah an um. Chunah chun LALPA ni a hawng tlung tuannâk ding mi asi rawh.

¹⁵ Nî leh thlâ khawm a thim le, ârfi tla khawm a chêu lo rawh.

Pathian Nih A Mi Tla Mal A Sâwm Lai

¹⁶ LALPA nih Zion thawk hen hâu a suah le, Jerusalem thawk hen khuarît hâwi hen hâu a suah le, tual leh vân a thir. Sikhawmsele a mi tla lam chu a vêng na lai.

¹⁷ Churawhchun, Israel, na Pathian kasi zia na hawng ka theih lai rawh. Ka tlâng thenhlimh ah ka um lai le, Jerusalem chu khuapi thenhlimh asi lai. Ramdang mi tla nih an neh na lai lo rawh.

¹⁸ Chu tikah chun tlâng sâng tla chu grep zûn nih a khuh lai le, tlâng kip ah ranrual tla muh asi lai. Juda ram zawzawngah tî tam tak a um lai. Tiva chu LALPA Biakin thawk hen a hawng luang lai le, Akasia tivakuam tla ah a luang lai.

¹⁹ Aigupta chu ramkaro ah â chang lai le, Edom ram chu mang tlâklo hen â râwk lai, Juda ram a do hen a mi thilsual tilo mi tla a thah na ruangah.

^20-21 Thah hen an um mi tla phû ka lam lai le, thilsual titu tla ka zuah na awtlo. Sikhawmsele Juda leh Jerusalem mi tla chu luahtu an si kumza lai le, Kei, LALPA chu Zion Tlângah ka um lai,” a ti.