JOEL 2 - Bawm Common Language Bible Version

Khâubawk Tla Chu LALPA Ni Theihtir Kanhnâk Asi

¹ Pathian tlâng thenhlimh Zion ah tâwtawrâwt râlringnâk hâu suah u. Juda mi tla, thir u. LALPA ni a hawng tlung awt rawh.

² Thimnâk leh mûinâk ni asi lai le, dum kul hen sûm zîng ni asi lai. Khâubawk kawrsen tla nih, mûinâk nih tlâng sâng tla a khuh hâwi hen an khuh lai. Chu hâwi hen thil a dum dahlo, um khawm a um nawlh dah lai lo rawh.

³ Belh a kho mi tla chu mei nih a khangh mi hâwi hen an ei hep. An mâilei ram chu Eden dûm hâwi asi le, an dunglei ram chu ramkaro a lâwng tlo mi hâwi hen a um. Zei thil khawm an zuah lo.

⁴ Rang hâwi hen an um le, râltuk liau mi rang hâwi hen an tek.

⁵ Tlâng sâng tlûnah an per liauah kari hâu hâwi hen an ri chur. Belh a kâng mi hâu hâwi hen hâu an suah. Râltuknâk ah kawrsen kal ding mi hâwi hen anna tlar zat.

⁶ An kal rawh chun mikip an lâu le, an mêl a dâng ver.

⁷ Râltuk thiam mi hâwi hen an tuk na le, kulh vâm tla lakah an kâi. Mâilei kâng hawi hen ding zar an kal le, khatlei khatlei pial hen lam dang khawm an zawh lo.

⁸ A rualpi hen an do le, zeikhawm nih a kham kho lo.

⁹ Khuapi ah an lût le, kulh dâi tlûnah an kâi le, kulh tlûn tla ah an tek le, in tlûnah an kâi. Mifîr hâwi hen langawtkawt ah an suak.

¹⁰ An kal rawh chun tual â nîn le, vân a thir. Nî leh thlâ a mûi le, ârfi tla khawm an chêu lo rawh.

¹¹ LALPA nih a kawrsen tla chu khuarît hâu hâwi hen thu a pêk na. Chu kawrsen ê-aw ngâitu tla chu an tam hen thungâi an chak. LALPA ni chu ṭihnung a kâi a! Âu me âwl kho lai!

Rim Ding Hen Kawhnâk

¹² LALPA nih, “Tu khawm ah, zumhkâi tak hen rim ule, ṭap bû leh lungfâk tak hen buhngei hen ka sinah hawng kîr u.

¹³ Nan nipuan thlêk cho â tâwk lo, nan thinlung a kuai mi chu nan ngaihsiat zia lang rê seh,” a ti. LALPA nan Pathian sinah hawng kîr u. Anih chu vêlnei leh khuaruatnâk hen khat mi asi. A dawnh kho hen thutiam bir tak hen a kil le; rêp ding tum lo hen ngaihdam ding a tum kumza.

¹⁴ LALPA nan Pathian nih a thinlung a lêt lai le, fâng tam tak hen mal an sâwm na lai dahmawh. Churawhchun, fâng leh uain tla a sinah nan ap kho lai.

¹⁵ Zion Tlâng tlûnah tâwtawrâwt tum ule, buh ngei ding hen thu suah u!

¹⁶ Mi zapi pumh na u, mi zapi tla munkhat ah pumh na ule, tawng pumhnâk thenhlimh rangah timhtuah na u. A tar mi leh ngâksia tla, fasêm tla khawm pumh na u. Nupi pasal anna umh kâ mi men an in kardang kaltâk hen hawng na seh.

¹⁷ Bâwlpu tla nih mâichâm leh LALPA Biakin kawtkâ karah LALPA rianṭuan na sele, ṭap hen thlacham na seh: “LALPA, na mi tla hi lungkham na rawh. Phundang tla nih zauhnawmh ding leh nehsawh hen, ‘Nan Pathian zeiah?’ hawng kan ti ding hen hawng kan siang lah,” ti na seh.

Pathian Nih Ram A Ningnotir Nawlh

¹⁸ LALPA nih ram chu a sunhsak le, a mi tla rangah khua a ruat.

¹⁹ LALPA nih, “Tuah buh, uain, leh oliv sariak ka nan pêk na lai rawh le nan khim lai rawh, phundang tla nih an zauhnawmh na lai lo rawh.

²⁰ Marlei thawk hen khâubawk kawrsen tla an hawng mi chu ka kiangtir na lai le, ramkaro leiah ka khanh na lai. Mâilei mi rnurui tla chu Tipi Thi ah khalh hen an um lai le, dunglei mi tla chu Mediteranian ah khalh hen an um lai. An ruak tla a thû lai, nan lakah thil an ti mi zawng ruangah ka veih na awt.

²¹ Phâisen tla ṭih lah u, LALPA nih nan rangah thil a ti mi zawng ruangah lâwptlo ule, a lâwm u.

²² Ran tla, lâu lah u, ram tla ningno hen a ring rawh; Thing tla nih rah an suah le, theipi leh grep khawm tam tak a um rawh.

²³ “Zion mi tla, a lâwm u, LALPA, nan Pathian nih nan rangah thil a ti mi ruangah a lâwrn u. Fângzûn liauah ruah tam tâwk ual hen an pêk na le, busik liau ruah khawm nan rangah a sûrtir hen tifûr tlâk tîr khawm a lân hâwi asi rawh.

²⁴ Fâng chîlnâk mun khawm fâng hen a khat lai le, sûrnâk khur kiang tla khawm uain hâng leh oliv sariak khat hen a liam lai.

²⁵ Khâubawk rual tla nih nan thlâi an ei le, an veih mi tla ka nan pêk nawlh na lai. Nan lakah kawrsen hawng tlungtirtu chu keimah kasi.

²⁶ Tu lam chun ei ding tam tak nan nei lai rawh le, nan khim lai rawh; nan rangah thilchê titu LALPA chu nan sawr lai rawh. Ka mi tla chu zauhnawmh hen an um lai lo rawh.

²⁷ Churawhchun, Israel, Kei, nan sinah ka um mi leh LALPA nan Pathian kasi zia, keimah lo chu midang âukhawm an um lo ti nan theih lai rawh. Ka mi tla chu zauhnawmh hen an um lai lo rawh.

LALPA Ni

²⁸ “Chu nûn chun mikip sinah ka thlarau ka tawih na lai le, nan fapa leh nan fanu nih ka thuchah an phuang lai; nan tarpa tla nih mang an manh lai le, nan tlangvâl tla nih langhnâk an muh lai.

²⁹ Chu tikah chun to-aw tla, mipa leh nunau tla tlûn tiangah ka thlarau ka tawih lai.

³⁰ “Chu ni ah chun vân ah leh tual ah theihtirnâk ka langh lai; thisen suaknâk, mei leh meikhû sûm hâwi hen a zîng mi a um lai.

³¹ LALPA ni rokual ṭihnungkâi tak leh rokual tak tlung lânah nî chu a thim lai rawh le, thlâ chu thisen hâwi hen a sen lai. Sikhawmsele LALPA sinah ṭangpi deihtu tla chu an him lai.

³² “Jerusalem ah mi zeimaw mi tla, keimah nih ka thîm na mi tla chu an âwl lai,’ ” ti hen LALPA nih a sim mi hâwi hen.