JEREMIA 9 - Bawm Common Language Bible Version

¹ Ka lû hi tikhurchawh si sele, ka mit hi mitthli tinungva si sele ka duh, churawhchun ka mi le thah hen an um rawh ruangah a sûn a zân hen ka ṭap kho lai rawh.

² Ka mi le tla sinah mi ramkaro ah va um vingnâk mun nei ka duh. Mah dîrmun kaltâktu leh mi zumhkâilo hep an si.

³ Ram sungah dik tak lâirêl ding ngâk hen âwkrâwl thu sim kumza mi leh zumhkâilo an si. LALPA nih, “Ka mi le tla nih thilsual dang dang an ti le, an Pathian kasi mi an hawng ka theih loh,” a ti.

⁴ Mikip mah hâwi lakah anna vêng ding asi, unau kip chu Jakob hâwi hen perpettu leh mikip mah hâwi tla sâwitu an si ruangah pakhat khawm nih a hâwi tla a zumh kho lo rawh.

^5-6 An hâwi tla mah lo leikângah an rui na le, pakhat khawm nih thudik an sim lo; an lei chu âwkrâwl thusimnâk ah an mang le, thilsual ti ding an bâng lai lo. Siatnâk an ti nûnah an ti singsuan le, an perrpet nûnah an perpet singsuan. LALPA nih ka mi tla nih an ka nawng a ti.

⁷ Hi ruangah hin LALPA Zeizawng tikho nih, “Ka mi tla chu thîr hâwi hen ka êr na lai le, ka nik awt. Ka mi tla nih thilsual an ti ruangah an sinah kei nih thil dang zei me ka ti kho lai?

⁸ An lei chu thihnâk chanhtiang thalzum hâwi asi le, âwkrâwl thu an sim kumza. Mikip nih an zâwlbâwm tla sinah kawmh tak mi hâwi hen thu an sim le, sikhawmsele a rangah thang an tunh piak mi asi ving.

⁹ Hi bang tla ruang hin ka rêp na awtlo ma? Hi bang hâwi hen phun tla lakah lehrûl ka sam na awtlo ma? Kei, LALPA nih ka sim asi,” a ti.

¹⁰ Kei nih, “Tlâng sâng tla leh ram ningno tla chu an châr hep le, pakhat khawm chu lakah mi velvâ an um lo ruangah ka lungfâk tukah ka ṭap. Ranrual tla hâu khawm theih asi lo rawh; va leh ramsa tla khawm an tek phin,” ka ti.

¹¹ LALPA nih, “Jerusalem chu nâwmpawng ah ka siam lai le, chu mun ah kâwlui tla an um lai; Juda khuapi tla chu a karo hen a um lai le, chunah chun âukhawm an um lai lo,” a ti.

¹² Kei nih, “LALPA, zei rangah ram chu râwk hen ramkaro hâwi hen a châr le, âukhawm mi velvâ an um lo zia? Hi hi theihthiam ding hen âu a fing tâwk lai? Midang a simh kho ding hen âu na simhfiang?” ka ti.

¹³ LALPA nih a sâng le, “Ka mi tla nih ka sîntir na mi an ngâilo ruangah hi bang tla hi a hawng tlung mi asi. Ka simh na mi hâwi hen an ngâi hen thil an ti lo.

¹⁴ Chu ngâk hen, an lungkhung le, an pa tla nih ti ding hen an simh na mi Baal lem tla an sawnh.

¹⁵ Churuang chun, Kei, LALPA Zeizawng tikho, Israel Pathian nih ka ti ding mi hi ngâi u; ka mi tla chu ei ding hen belh khâ ka pêk na lai le, din ding hen tûr ka pêk na lai.

¹⁶ Anmah leh an thlâktu tla nih an theih dahlo mi phun lakah ka rektir ver na lai le, ka veih dep na tiang hen an lakah kawrsen tla ka fial na lai,” a ti.

Jerusalem Mi Tla Ṭangpi Hauh Hen An Âu

¹⁷ LALPA Zeizawng tikho nih, “Thil a hawng tlung mi tla chu dawn nik! Mithi vûinâk la saktu nunau tla, ulhtu ding ah hawng kal ding hen kawh na,” a ti.

¹⁸ Mi tla nih “Kan mitthli tla ding leh kan mit vun tla chîn dep rê ṭap ding hen mithi vûinâk la hawng kan sak piak ding hen khulrang hen simh na u,” an ti.

¹⁹ Zion ah mi âu hâu, “Kanna râwk dep rawh! Ningzak saih hen kan um rawh! Kan ram mâk ding mi kan si rawh; kan in tla khawm a râwk hep rawh,” ti mi chu ngâi u.

²⁰ Kei nih, “Nannih nunau tla, LALPA thu ngâi ule, a thusim leikângah nan nâ thlir u. Ulh ding dân nan fanu tla sîntir na ule, nan hâwi le tla mithi vûinâk la sak ding hen sîntir na u.

²¹ Thihnâk chu kan langawtkawt ah a hawng lût le, kan lal in tla ah a va lût; khuadung ah ngâksia tla a thah na le, sumtuahnâk mun ah mi tlangvâl tla a thah na.

²² Munkip ah mithi ruak tla chu rek thu hen an um le, phâisen ah tual churtirnâk pawng mi hâwi hen leh fâng âttu tla nih an fâng ât chia dung leiah an mâk mi âukhawm nih khawk lo rawh mi hâwi an si. Hi hi LALPA nih sim ding hen hawng ka simh mi chu asi,” ka ti.

²³ LALPA nih, “Mifing khawm an finghnâk zumh lah seh, mi chak tla khawm nih an chaknâk zumh lah seh, minei khawm nih an neihnâk zumh lah seh.

²⁴ Mi nih putso ding mi a duh chun, keimah hawng ka theih mi leh hawng ka theihthiamnâk putso seh, ka dâwtnâk chu a dawnglo hen repnâk leh diknâk ka ti ruangah. Chubang tla nih hawng ka lawmhtir. Kei, LALPA nih ka sim asi,” a ti.

^25-26 LALPA nih, “Aigupta, Juda, Edom, Amon, Moab leh ramkaro ah um mi an sam tâwi hen tantu tla, ka rêp na ding tik chu a hawng tlung awt rawh. Hi minung tla hi fêmtan chu an si le, sikhawmsele a zauhtirnâk thudântuk chu an zûl lo. Hi bang minung tla leh Israel mi tla pakhat khawm nih ka thudântuk an zûl lo,” a ti.