JEREMIA 7 - Bawm Common Language Bible Version

Jeremia Nih Biakin Ah Thu A Sim

^1-3 Juda tla nih Pathian sawnh hen an kalnâk mun Biakin kawtkâ leiah LALPA nih hawng ka fial. LALPA Israel Pathian chak nih an sinah thu a sim ding mi sim ding hen chunah va dîr ding hen hawng ka simh: “Nan umdân leh nan thilti dân lêt u, hinah hin ka nan umtir na lai.

⁴ Chubang perpetnâk thu, ‘Kan him mi rawh! Hi hi LALPA Biakin asi, hi hi LALPA Biakin asi, hi hi LALPA Biakin asi!’ ti mi tla chu lung lah u rawh.

⁵ “Nan umdân lêt ule, thil nan ti mi hi bâng u. Khatlei khatlei ṭhadektê hen a ti u.

⁶ Ram dang mi, ngâkṭah leh numei tla rangah dingchang phahnâk ah mang na lah u rawh. Hi ram ah hin a mawh lo mi minung thah lah na u. A nan râwk natu ding mi pathian dang sawnh bâng u.

⁷ Nanna lêt mi asi chun, an thlâk natu rangah ting kumza ding hen ka pêk na mi ram ah hin ka nan umtir kumza na lai.

⁸ “Zauhnik u, perpetnâk thu lakah nanna ngauh.

⁹ Thil nan fîr, mi nan thah, ṭângdang nan pawmtâk, âwkrâwl sim hen siat nan tleih, Baal sinah bâwlnâk nan ap le, a lânah nan theih dahlo mi pathian tla nan sawnh.

¹⁰ Hi bang thil ka hua mi tla hi nan ti le, ka Biakin takah nan hawng le, ka mâika ah dîr hen ‘Kan him mi rawh!’ nan ti.

¹¹ Ka Biakin chu rawkmang tla thupnâk ah ma na ruat? Nan thilti tla chu ka muh asi.

¹² Sawnhnâk ding ah ka thîm masa chem mi mun Siloh ah va kal ule, ka mi Israel tla sual ruangah ka ti mi va zauh u.

¹³ Chubang hâwi sualnâk tla nan ti le, sikhawmsele ka nan simh lemang na le, a ngâi ding rêng nan duh lo. Ka nan kawh na liau khawm ah nan hawng ka sâng lo.

¹⁴ Churuang chun Siloh khua ah ka ti mi hâwi hen hi nan rinhsanh mi ka Biakin lakah hin ka ti awt. Nan thlâktu tla sinah leh nanmah rangah kan pêk na mi mun ah hin, Siloh khua ah ka ti mi hâwitê hen ka ti awt.

¹⁵ Nan unau Israel mi tla ka nar na mi hâwi hen ka mitmuh ah mi ka nan nar ving na awt. Kei, LALPA nih ka sim asi,” a ti.

Zapi Minung Ê-aw Ngâilonâk

¹⁶ LALPA nih, “Jeremia, hi minung tla rangah hin thlacham lah. Anmah ruangah ṭap lah, thla khawm cham lah; ka sinah khawm deih piak lah na, ka nan ngâi piak awtlo ruangah.

¹⁷ Juda khuapi tla leh Jerusalem khua lâi ah an thilti tla na muh lo ma?

¹⁸ Ngâksia tla nih tih ding mi thing an khawmh le, mipa tla nih mei an tih le, nunau tla nih Vân Lalnu an ti mi pathiannu rangah sang em ding mi an chawmh. Keimah lungfâktir ding hen pathian dang tla sinah uain ap mi tla khawm an tawih.

¹⁹ Sikhawmsele, Kei hi, annih nih lung an hawng ka fâktir ding mi ma kasi? Silo, anmah nganfâk anna pêk hen ningzak anna saih mi asi.

²⁰ Churuang tak chun, Kei, LALPA Zahkâi nih, hi Biakin ah hin ka thinthawknâk fâk tak ka tawih awt. Ran tla tlûnah leh minung tla tlûnah khawm, thing leh thlâi tla tlûn khawm ah ka tawih awt. Ka thinthawknâk chu âukhawm nih a mih kho lo mi mei hâwi asi lai.

²¹ “Ka mi tla, bâwlnâk zeimaw mi chu mâichâm tlûnah nan duah hep le, a zeimaw mi chu ei ding hen nan siang. Sikhawmsele, Kei, LALPA nih ka sim mi chu a ektê hen nan ei kho lai ka ti.

²² Aigupta thawk hen ka nan suakpi na liau khan an thlâk natu tla sin khan, duahphung thil ap mawh bâwlnâk zât dang mawh ti ding hen thu ka pêk na lo.

²³ Sikhawmsele thu ka pêk na mi chu an Pathian kasi khonâk ding leh annih chu ka mi le an si khonâk ding hen ê-aw ngâi ding hen thu ka pêk na asi. An sul-le-lam tluangnâk ding hen thu ka pêk na mi hâwitê um ding hen ka simh na.

²⁴ Sikhawmsele, ê-aw ngâilo hen a ngâi khawm an duh lo. Chu ngâk hen chun, an lungkhungnâk leh an thinlung sual zia hâwi hen thil an ti, ṭhat dauh lei ngâk hen a râwk lam anna râwk dadauh.

²⁵ Aigupta ah mi an thlâk natu an hawng suak ni thawk hen tusûn ni tiang hen ka khuavâng tla, ka to-aw tla nan sinah ka hawng fial kumza na.

²⁶ Sikhawmsele, mi âukhawm nih an âwva hen an ngâi duh na lo. Chu hâwi ding ngâk hen, lungkhung dauh leh an thlâk natu ngâk hen hel dauh hen nan um.

²⁷ “Churuang chun, Jeremia, hi bang thu zawzawng hi ka mi tla sinah na sim lai le, sikhawmsele a nan ngâi duh lai lo; na kawh na khawm ah a nan sâng lai lo.

²⁸ Nan phun tla nih LALPA an Pathian khawm an theih lo, a rêp na mi khawm an theih lo ti hen simh na. Zumhkâinâk chu a thi rawh. A thu khawm sim asi lo rawh.

Hinom Vakuam Ah Sualnâk Thilti Tla

²⁹ “Jerusalem mi tla, ngaihsia tak hen um u; nan sam tan ule, lawnh ving u. Kei, LALPA, ka thinthawk le, ka mi tla ka nawng na ruangah tlâng tlûnah mithi vûinâk la sak u.

³⁰ “Juda mi tla nih thilsual an ti. Ka Biakin ah ka hua tak mi milem an siah le, an nawmh.

³¹ Hinom Kuam ah Topheth an ti mi mâichâm an siam le, chunah chun an fanu leh an fapa bâwlnâk ding hen mei ah an rawh ding hen. Chu hâwi ti ding hen thu ka pêk na lo le, ka thinlung khawm ah chu hâwi ti ding hen a um lo.

³² Churuang chun, Hinom Vakuam mawh Topheth ti lo rawh hen Thahnâk Vakuam an ti ding ni a hawng tlung lai. Mun dang ah vûinâk a um lo ruangah chunah chun mi tla an vûi na lai.

³³ Ruak tla chu va leh ramsa tla râwl asi lai le, âukhawm nih an âwva na lai lo.

³⁴ Ram khawm a karo hen a um lai. Juda khuapi tla ah leh Jerusalem khua lâi ah nuam chenh hâu leh nupa umhnâk puai lawmh hâu tla ka dawngtir lai rawh.