JEREMIA 6 - Bawm Common Language Bible Version

Jerusalem Chu Mêlma Tla Nih An Hual

¹ Benjamin mi tla, him ding hen tek u! Jerusalem lakah mi suak u! Tekoa ah tâwtawrâwt tum ule, Beth Hakerem ah theihtirnâk mei chêu u. Marlei thawk hen siat leh râwknâk a hawng tlung awt.

² Zion khuapi chu â dawh thlo, sikhawmsele râwk hen a um awt;

³ chunah chun lalchem tla an kawrsen tla hen mun an khuar lai. Khua hêl dak hen an puanin tla an zâr lai le, âuzawng mah duhnâk zawng ah mun an khuar lai.

⁴ “Jerusalem do ding hen a timhtuah ule, a tîm zet u! Sûn chir ah kan do lai! ” an ti. Sikhawmsele, “A tlâi tuktarâi rawh, nî a tlâ dêng rawh, zânleibâi thlaliah khawm nih a liah dadauh rawh.

⁵ Zân ah kan do ko lai le, a khuapi kulh tla kan râwk lai,” an ti.

⁶ LALPA Zeizawng tikho nih lalchem tla chu Jerusalem hual ding hen thing tla hâu ding leh mualpâwng tla siam ding hen thu a pêk na mi asi. “Hi khuapi hi nâunehnâk hen a khat ruangah ka rêp awt.

⁷ Tikhurchawh nih tî thar a kil mi hâwi hen, Jerusalem nih a thilsual thar chu a kil thlir. Khuapi sungah siat leh râwknâk hâu ka theih; damlonâk leh liam mi tla zawzawng ka muh.

⁸ Jerusalem mi tla, hi bang nawknâk tla hi nan rangah simhkannâk si seh, chu hâwi asi lo chun ka nan kaltâk lai le; ramkaro âukhawm umlonâk hâwi hen na khuapi ka umtir awt,” a ti.

Israel Mihel

⁹ LALPA Zeizawng tikho nih ka sinah, “Israel chu grep zûn lakah mi kawih hep mi hâwi hen thiang ko hen vuak asi lai. Churuangah tik a um liauah mikip nan suak ding asi,” a ti.

¹⁰ Kei nih ka sâng le, “An sinah thu ka sim hen ka simhkan na chun âunih an ka ngâi piak awt? Mi lungkhung an si le, na thuchah khawm an ngâi duh lo; sim ding hen thu na ka simh mi hi an nihsuak tâwk cho lai.

¹¹ An tlûnah na thinthawknâk nih kei lung khawm a fâktir bâk, LALPA, ka tuar kho lo rawh,” ka ti. Churawhchun, LALPA nih ka sinah, “Ka thinthawknâk chu khua dungah ngâksia tla tlûnah leh tlangvâl anna pûm mi tla tlûnah thlêt. Pasal leh nupi tla chu lâk ving hen an um lai le, a tar khen mi khawm zuah an si lai lo.

¹² An in tla chu midang sinah pêk asi lai le, chu hâwi hen an phâisen leh an nupi tla chu pêk asi lai. Hi ram minung tla hi ka rêp na awt.

¹³ Mikip a lian a mê tangka lakah zumhkâilo tak hen an um; khuavâng leh bâwlpu tla tiang nih mi an perpet.

¹⁴ Ka mi le tla liammâ chu kheuh mi hâwi cho hen an ti. Ṭha lo pet hen, ‘A ṭha ver rawh,’ an ti.

¹⁵ Hi bang thil nâwmtâm an ti ruangah an ning a zak ma? Zak lo e, an ning a zak rîlmâl lo; zei hâwi ningzak a kâi ti khawm an theih lo. Churuangah midang an tlû mi hâwi hen an tlû lai le; anmah ka rêp na tikah an dawnghnâk asi lai rawh. Kei, LALPA nih ka sim asi,” a ti.

Israel Tla Nih Pathian Duh Dân An Êl

¹⁶ LALPA nih a mi tla sinah, “Lamṭhuam ah dîr ule, zauh u. A lânah mi lampi tla leh lampi ṭha chem umnâk chu deih u. Chu lakah kal ule, thlangam tak hen nan um lai,” a ti. Sikhawmsele annih nih, “Ihih, kan kal awtlo!” an ti.

¹⁷ Churawhchun, LALPA nih, vêngtu tla chu theihtirnâk tâwtawrâwt ngâi ding hen a ruat. Sikhawmsele, annih nih, “Kan ngâi awtlo,” an ti.

¹⁸ Churawhchun, LALPA nih, “Nannih phun tla, ngâi ule, ka mi le tla lakah zei a hawng tlung awt theih u.

¹⁹ Tual, ngâi rawh! Hi minung tla nih ka sîntirnâk an duh lo hen ka thu an ngâilo ruangah, an ruat mi zawzawng ruangah rêpnâk ding hen siatnâk an tlûnah ka tlungtir awt.

²⁰ Seba ram thawk hen rimthâw mawh ram lât takah mi thing rimthâw ka sinah an hawng put mi hi ka sunhsaknâk zei a um? An thil ap tla chu ka pawm awtlo, anna bâwlnâk ah khawm ka lâwm awtlo.

²¹ Churuangah hi minung tla hi ka suihtir hen ka bahtir na awt. Pa tla leh fapa tla an thi lai le, chu hâwi hen hâwi tla leh zâwlbâwm tla khawm an thi lai,” a ti.

Marlei Thawk Hen Rûnnâk

²² LALPA nih, “Phun chak tak, râltuk ding hen a timhtuah mi marlei ram lât tak thawk hen an hawng kal.

²³ An chanhtiang kûk leh an nâmsâu tla an lâk; misual tak leh khuaruat lo tak an si. Rang tlûnah anna chuan mi hâu chu tipi tlingtlawk hâwi asi. Jerusalem do ding hen anna tîm zet,” a ti.

²⁴ Jerusalem mi tla nih, “Thâwng kan theih le, kan bân uai tlek hen kan thlâi le; nunau nauneih nganfâk liau mi hâwi hen lawksawngnâk leh nganfâknâk nih hawng kan denh rawh.

²⁵ Kan kiangkam ah kan mêlma tla râlthuam leh ṭih ruangah ram ah kan suak hen leh lampi khawm ah kan kal ngam lo,” an ti.

²⁶ LALPA nih a mi le sinah, “Salâpuan aih ule, vachâm nâwngah rîl u. Minung pakhat nanmah veih ding hen hawng kal mi nih an do sâwm na awt ruangah, fapa pakhat tek ruangah nan lung a fâk ding mi hâwi hen mitthli tlâ rê hen lungfâk u.

²⁷ Jeremia, thîr zei hâwi asi rêng ti na nik ding mi hâwi hen, ka mi tla chu nik na.

²⁸ An ektê hen sim ngâilo hen an hel le, dâr leh thîr hâwi hen an chang. Anna râwk dep le, thu zanh ding hen anna sawk.

²⁹ Meialh nih fâk tak hen a rawh le, sikhawmsele thîr chu a zawr hen a vei lo. A sual mi tla chu lâk ving an si lo ruangah ka mi le thiangtir ding chu zeikhawm a ṭhavak lo.

³⁰ Kei, LALPA, nih ka nawng na ruangah, nâwmtâm mang tlâklo ti an si lai,” a ti.