JEREMIA 50 - Bawm Common Language Bible Version

Babulon Lâk Asi Nâk

¹ Hi hi Babulon khuapi leh a mi tla thu ah LALPA nih thuchah a hawng ka pêk mi chu asi:

² “Phun tla chu thâwngthâng simh na u! Phuang u! Singsiahnâk pêk ule, thâwngthâng phuang u! A thuptê hen kil ko lah u! Babulon chu a tlû rawh! A pathian Marduk khawm râwk dep asi rawh! Babulon milem chu ningzak saih asi le, a milem fihnungkâi tla khawm â râwk rawh.

³ “Mârlei thawk hen a hawng mi phun nih Babulon chu a do lai le, a karo hen a siah lai. Ran leh minung tla an tek phin lai le, âukhawm chunah chun an um lai lo,” a ti.

Israel Kîrnâk

⁴ LALPA nih, “Chu tik chu a hawng tlung chun, Israel leh Juda tla chu Kei an Pathian hawng ka hâwl hen ṭap bû hen an hawng vevê lai.

⁵ Zion lampi an deih lai le, chu lei chun an kal lai, ka sinah zungzâl thudântuk an siam lai le, an buar lai lo rawh.

⁶ “Ka mi tla chu dawrâ a dâwngpu nih tlâng sâng takah a thlâu na mi hâwi an si. Dawrâ rual hâwi hen tlâng khat thawk hen tlâng dang tla khawm ah an vâi le, an umnâk in khawm an theih lo rawh.

⁷ Anmah hâwltu tla nih an do na. An mêlma tla nih, ‘LALPA lakah thilsual titu an si, churuangah thil kan ti mi hi kan diklo mi asi lo. An thlâktu tla nih LALPA an rinhsan le, a lakah zumhkâi tak hen an um,’ an ti.

⁸ “Israel mi tla, Babulon mi tla thawk hen tek u! Ram mâk thlap u! Kaltâk masa chemnâk si seh!

⁹ Mârlei mi phun chak tak ka thawktir na lai le, Babulon mi tla ka dotir na lai. Râldo ding hen ram lakah an hawng a tlar lai le, an neh lai. Kah thiam mi minung tla an si le, anna sêl mi chu chanhtiang hen kah ṭhelh dahlo mi an si.

¹⁰ Babulon chu râwk hen a um lai le, a râwktu tla nih an duh mi thil zeizawng an lâk lai. Kei, LALPA nih ka sim asi,” a ti.

Babulon Tlûknâk

¹¹ LALPA nih, “Babulon mi tla, ka phun chu na rûn na. Na lâwm hen na lâwptlo le, chawpinu nih fâng a chîl mi mawh, rang a âwn le â sawk mi hâwi na si,

¹² sikhawmsele, na khuapi rokual chu ningzak saih leh nâutir hen a um lai. Babulon mi tla chu phun zawzawng lakah herhnâk leikângah a mêchem mi asi lai; a châr hen ramkaro tî umlonâk asi lai.

¹³ Ka thinthawknâk ruangah Babulon ah âukhawm an um lai lo le; râwk dep hen mâk asi lai le, a paltu zawng chu an lâu khit lai le, chê an ti lai.

¹⁴ “Chanhtiang kahtu tla, Babulon do ding hen a tlâr ule, hual u. Kei, LALPA lakah thilsual a ti ruangah nan chanhtiang thalzum hen Babulon kah u.

¹⁵ Khuapi hêl dak hen râltuk hâu suah u! Tu chun Babulon â pêk rawh. A kulh tla chu â râwk hen a chim rawh. Babulon mi tla rangah lehrûl ka sam rawh. Churuangah an lakah nan phû lam ule, midang an nehsawh na mi hâwi hen nehsawh bâk na u.

¹⁶ Chu ram ah chun thlâi chî tuh hen um lah seh, fâng khawm ât hen um lah seh. Ramdang minung chunah um mi tla khawm kawrsen râltuk ṭih ruangah an in leiah an kîr ver lai,” a ti.

Israel Kîrnâk

¹⁷ LALPA nih, “Israel mi tla chu chakeibaknei nih dawrâ tla a ṭhâwl na le a rekrâwitir na mi hâwi an si. A masa chem hen Asiria lal nih a do na le, chu nûnah Babulon lalchem Nebukadnezar nih an ruh a khelh.

¹⁸ Churuang chun, Kei, LALPA Zeizawng tikho Israel Pathian nih Babulon lalchem Nebukadnezar leh a ram chu Asiria lal ka rêp mi hâwitê hen ka rêp awt.

¹⁹ Israel mi tla chu an ram ah ka umtir nawlh na lai, Karmel tlângah leh Basan ram ah fâng an chîng mi tla an ei lai le, Efraim leh Gilead ram ah an chîng mi zawzawng an duh duh mi an ei lai.

²⁰ Chu tik chu a hawng tlung chun Israel lakah leh Juda lakah sualnâk leh ṭhatlonâk muh asi lai lo rawh, an nungnâk ka zuah na mi tla chu ka ngaihdam na awt ruangah. Kei, LALPA nih ka sim asi,” a ti.

Babulon Mi Tla Tlûnah Pathian Lâirêlnâk

²¹ LALPA nih, “Merathaim leh Pekod mi tla chu do na u. Thah na ule, veih dep na u. Thu ka nan pêk na mi zawng chu ti u. Kei, LALPA nih ka sim asi.

²² Ram lakah râltuk hâu theih hen a um le, siatnâk fâk tak a um.

²³ Babulon mi tla nih laikulh pumpi a tukboh hen a mântir dip le, tuah chu tukboh chu râwk asi rawh! Chu ram ah thil a hawng tlung mi chu phun zawzawng an lâu.

²⁴ Babulon mi tla, na hawng ka sualpi le, thang kan tunh piak mi nih a nan awh rawh, sikhawmsele na theih lo thlo.

²⁵ Kei, LALPA Zeizawng tikho zahkâi nih, Babulon mi tla rangah ti ding mi chu ka ṭuan rawh ruangah ka râlthuam ka siahnâk in chu ka awng le, ka thinthawknâk hen ka thuak na rawh.

²⁶ Munkip thawk hen do ule, an fâng siahnâk mun tla chu phawngh u! Fâng an pawng mi hâwi hen râllâk thil tla pawng u! Ram râwk dep u! Zeikhawm mâk lah u!

²⁷ An kawrsen zawzawng thah na u! Veih dep na u! Babulon mi tla chu an vânduai rawh! An rangah rêpnâk ding tik a tlung rawh,” a ti.

²⁸ (Babulon thawk hen a tek mi tla chu Jerusalem ah an hawng le, LALPA, kan Pathian nih Babulon mi tla nih a Biakin ah thil an ti mi ruangah lawhbâ a sam na mi thu an sim.)

²⁹ “Chanhtiang mangtu tla chu Babulon do ding hen simh na u. Chanhtiang fung leh thalzum mang thiamtu tla chu fial na u. Khuapi hual ule, pakhat khawm suaktir lah na u! Kei, Israel Mi Thenhlimh tlûnah zûm tak hen thil a ti ruangah, thil a ti mi hâwi hen a lakah ti ule, midang a ti na mi hâwi hen ti bâk u.

³⁰ Churuangah a tlangvâl tla chu khuapi zâwllâi ah thah hen an um lai le, a kawrsen tla khawm chu ni ah veih an si lai. Kei, LALPA nih ka sim asi.

³¹ “Babulon mi tla, thungâi nanna zûm le, churuang chun, Kei, LALPA Zahkâi, Zeizawng tikho nih ka nan do asi! Ka nan rêp ding mi tik a tlung rawh.

³² Phun zûm takah na ruat mi chu na suih lai le na tlû lai, âukhawm nih ṭangpi hen an thawh lai lo. Na khuapi tla ka duah lai le, a kiangkam ah mi thil zeizawng râwk hen a um lai,” a ti.

³³ LALPA Zeizawng tikho nih, “Israel mi leh Juda mi chu nâuneh hen an um. Anmah tleihtu tla nih nâi tekah an vêng na le, an suaktir na lai loh.

³⁴ Sikhawmsele, anmah tla ruangsuahtu chu a chak asi, a min chu LALPA Zeizawng tikhotu asi. Amah nih an tuar ding mi chu tuar hen tual ah thlangamnâk a tlungtir lai le, sikhawmsele Babulon mi tla rang chun lawksawngnâk asi lai,” a ti.

³⁵ LALPA nih, “Babulon mi tla rangah thihnâk! A mi tla, a lâirêltu tla, a mi fing tla tlûnah thihnâk!

³⁶ A khuavâng âwkrâwl thusimtu mi â tla rangah thihnâk! A kawrsen, ṭihnungkâi tak si mi tla rangah thihnâk!

³⁷ A rang tla leh a kari tla râwk u! A kawrsen a lâk mi tla, chaklo tak mi tla rangah thihnâk! A thil siahnâk mun râwk ule, rûn ule, râwk u.

³⁸ Ram lakah ni khua khêutir ule, a tiva tla kangtir u. Babulon chu milem ṭihnungkâi umnâk ram asi le, chu chu zapi minung ât phahnâk asi.

³⁹ “Churuangah Babulon chu khuri leh thlarau sual tla leh va thianglo tla nih an luah lai. Chunah chun minung an um lai lo rawh le, tik a hawng um ding mi lak khawm ah an um lai lo rawh.

⁴⁰ Sodom leh Gomorah leh a kiangkam ah khuapi tla ka râwk na liau mi hâwitê hen Babulon lakah a hawng tlung lai. Âukhawm chunah chun an um nawlh lai lo rawh. Kei, LALPA nih ka sim asi.

⁴¹ “Mârlei thawk hen ram lât takah mi phun chak tak tla an hawng; lalchem tam tak râltuk ding anna tîm.

⁴² An chanhtiang leh an nâmsâu tla an lâk le, mi ṭhalo leh mi khuaruat lo an si. Rang tlûnah anna chuan mi hâu chu tipi hâu hâwi asi. Babulon mi tla do ding hen tîm zet hen an um.

⁴³ Babulon lalchem nih thâwngthâng a theih le, a kut a thlâi thlo. Lawksawngnâk nih a tleih le, nunau nganfâk mi hâwi asi rawh.

⁴⁴ “Chakeibaknei thing mun thawk hen a hawng suak le, Jordan va dung zawh hen ram ningno leiah a kal mi hâwi asi. Kei LALPA, ka hawng kal lai le, Babulon mi tla an khuapi ah mi chu lâkkhatko ah ka tektir phin na awt. Churawhchun, ruitu ka thîm mi nih phun lakah lâi a rêl lai. Âu hen nan hawng ka tahkhiat kho awt? Âunih hawng ka zuam ngam awt? Zei lâirêltu nih hawng ka do kho awt?

⁴⁵ Churuangah Babulon khuapi tlûnah thil ka tum mi leh a mi tla lakah ti ka tum mi chu ngâi rawh. An fa le tla tiang ka nûk phin lai le, mikip nih an ṭih lai.

⁴⁶ Babulon a tlûk tik chun an hâu nih tual pumpi a tlirh lai le, ṭap hâu chu phun dang tla nih an theih lai,” a ti.