JEREMIA 5 - Bawm Common Language Bible Version

Jerusalem Sualnak

¹ Jerusalem mi tla, nan khuadung suak hen tek u! A kiangkam tla a hawi! Nangmah tak a zauh! Sumtuah mun tla hâwl. Pathian lakah zumhkâi hen um tumtu leh thil dik titu pakhat tal na muh kho ma? Na muh kho mi asi chun, Jerusalem chu LALPA nih a ngaihdam lai.

² LALPA sawnh ding hen sim khawm le, na sim mi chu na tum lêm lo.

³ LALPA nih zumhkâinâk a hâwl. A nan vuak le, sikhawmsele a thu na ngâi duh lo. A nan râwk le, sikhawmsele sîn ding na duh lo. Na lung a khung hen na sual na lêt duh lo.

⁴ Churawhchun ka dawn le, “Hi bang tla hi mipâm leh mi mâwl cho an si. An umdân khawm a mâwl tuk; an Pathian nih a duh dân khawm an theih lo, LALPA nih ti ding hen a duh na mi khawm an theih lo.

⁵ Chu minung tla sinah chun thiltikhonâk hen ka kal lai le, ka sawnh na lai. An Pathian nih a duh dân leh LALPA nih ti ding hen a duh na mi chu an theih lai rawh,” ti ka ruat. Sikhawmsele an ektê hen LALPA thuneihnâk chu an duh lo le, a thu zûl ding an duh lo.

⁶ Churuang chun tumun ah mi chakeibaknei nih a thah na lai le, ramkaro ah mi chingngia nih a sâm dip na lai le, keitê nih an khuapi tla ah seh ding hâwl hen a ṭawl lai. Chubang minung tla chu an suak chun, an sual a tam ruangah leh zeiliau zawng ah Pathian an hawitâk lemang ruangah sâm ver hen an um lai.

⁷ LALPA nih, “Ka mi tla sualnâk zei rangah ka ngaihdam lai? An ka kaltâk le, pathian tak silo mi tla an sawnh. Ka mi tla chu an khim lânlo ka châwm na, sikhawmsele ṭângdang an pawm le, â zuar mi nunau tla hen an tik an mang.

⁸ Rang bit tak châwm mi a hur mi hâwi an si le, an zâwlbâwm nupi an ngarh chiau.

⁹ Hi bang thil tla ruangah hin ka rêp na hen chubang tla ruangah chun phun tla tlûnah phû ka lam awtlo ma?

¹⁰ Ka mi tla grep hâu piak na ding hen mêlma tla ka fial lai le, sikhawmsele veih lam chu ka veih dep na lai lo. Chubang ṭeng tla chu ka tâ an si lo ruangah thlangh ver na ding hen ka simh na lai.

¹¹ Israel leh Juda mi tla nih an hawng ka tleihtir tatak rawh. Kei, LALPA nih, ka sim asi,” a ti.

LALPA Nih Israel A Nawng

¹² LALPA mi tla nih amah chu an duh lo le, “Zei thil khawm a ti tatak lai lo. Tik harsa kan tawng lai lo; râltuk mawh pâmnâk mawh kan tawng lai lo,” an ti.

^13-14 Khuavâng tla khawm zeikhawm an si lo, thli bâwm leh LALPA thawk hen thuchah an nei lo an ti. LALPA Pathian Zeizawng tikho nih ka sinah, “Jeremia, mi zapi tla nih kha bang hâwi thu an sim ruangah ka thu chu na kâ ah mei hâwi hen ka siam lai. Zapi tla chu thing hâwi an si lai le, mei nih a khangh hep na lai,” a ti.

¹⁵ Israel mi tla, nangmah do ding hen LALPA nih ram lât tak a thawk hen phun a hawng put. A lânah mi phun chak tak, an hawlh na theih lo mi phun asi.

¹⁶ A chanhtiang kahtu kawrsen tla chu chak tak khuaruat lo tak hen thahtu an si.

¹⁷ Na buh leh na fâng tla an ei hep lai le; na fapa leh fanu tla an thah na lai. Na ranrual leh na ran tla an thah lai le, na grep zûn leh theipi tla an râwk lai. An kawrsen tla nih na sirhsanh mi kulhnei khuapi tla an râwk lai.

¹⁸ LALPA nih, “Sikhawmsele, chu ni tla khawm ah chun ka mi tla chu ka veih dep na lai lo rih.

¹⁹ Jeremia, hi zawng thil hi zei rangah ka ti, ti an deih tikah, an hawng ka hawitâk hen ramdang pathian tla rian an ram ah an ṭuan hâwi hen, anmah ram silo ah ramdang mi tla rian an ṭuan ding mi simh na,” a ti.

Pathian Nih A Mi Tla A Simhkan Na

²⁰ LALPA nih, “Jakob thlâk tla leh Juda mi tla chu simh na:

²¹ Nannih mi â leh mi lungkhung, mit nei ko hen muh kholotu leh nâ nei ko hen theih kholotu tla, ngâi u.

²² Kei, LALPA kasi; zei rangah nan ka ṭih zah lo zia? Zei rangah ka mâika ah nan thir lo zia? Tipi â rînâk rangah sep ka siah le, um kumza mi ramri kanh kho lo mi asi. Tipi chu tlingtlawk khawmsele, a pîn leiah a kal kho lo; tî tlingtlawk chu a hâu a suah kho, sikhawmsele a tâwn kho lo.

²³ Sikhawmsele nannih mi zapi tla, nan lungkhung hen nan hel le; nanna kiang le, nan hawng ka mâk thlap.

²⁴ Fângzûn liau ruah leh fûr tlâk tîr ruah ka sûrtir le, kumsiar hen fângzûn tik ka nan pêk na khawm ah, hawng ka zah ding nan awt dahlo.

²⁵ Chubang ding ngâk hen, nan sualnâk nih chubang thil ṭha tla chu an dawktir na asi.

²⁶ “Misual tla ka mi le lakah an um le; mi nih va tleih ding hen lên a zâr le, it bû hen an ngâk mi hâwi an si, sikhawmsele minung tla tleih ding hen thang an tunh.

²⁷ Sa kahtu nih a bâwm chu va hen a khattir phak mi hâwi hen, an in tla chu rawk mi thil hen an khattir. Churuangah asi thil an tikho hen an nei le,

²⁸ an bit hen an ei a thaw mi chu. An thilsual ti nih tâwk rî a nei lo. Mi ngâkṭah leh nehsawh hen um mi tla rangah chun diknâk leh repnâk an langh lo.

²⁹ Sikhawmsele, Kei, LALPA nih hi bang thil ruangah kan rêp na lai le; hi phun lakah lehrûl ka sam lai.

³⁰ Ram lakah thil ṭihnungkâi lâu khit ding mi a hawng tlung:

³¹ khuavâng tla nih âwkrâwl thu lo chu zeikhawm an sim lo; khuavâng tla thupêk hâwi hen bâwlpu tla nih lâi an rêl le, ka mi tla nih êlnâk an nei lo. Sikhawmsele a dawnghnâk a hawng tlung tikah zeitin an ti awt rawh?” a ti.