JEREMIA 44 - Bawm Common Language Bible Version

Aigupta Ah Um Mi Israel Tla Rangah LALPA Thuchah

¹ LALPA nih Aigupta ram ah um mi Israel zawzawng Migdol, Tahpanhes leh Memphis khuapi tla ah um mi leh simlei ram ah um mi tla thu ka sinah a sim.

² LALPA, Zeizawng tikho, Israel Pathian nih, “Jerusalem leh Juda khuapi dang tla zawzawng tlûnah siatnâk ka hawng tlungtir mi tla chu nanmah ngelchel nih nan muh.

³ An mi tla nih thilsual an ti mi leh ka thin an ka thawktir mi ruangah tu khawm ah râwk kumza hen an um nget rih le, pakhat khawm chunah chun an um lo. Anmah khawm nih, nanmah khawm nih a nan thlâk natu tla khawm nih an sawnh dahlo mi pathian dang tla sinah bâwlnâk an ap le, a rian an ṭuan.

⁴ Ka to-aw khuavâng tla, hi thil ṭihnungkâi ka hua mi hi ti lo rawh ding hen an simh na ding hen ka hawng fial kumza.

⁵ Sikhawmsele, nan âwva lo hen ngâi khawm nan ngâi duh lo. Pathian dang tla sinah bâwlnâk thilsual nan ti mi nan lêt duh lo.

⁶ Churuangah, ka thinthawknâk leh ka thinrunhnâk chu Juda khuapi tla leh Jerusalem khua zâwllâi ah ka thlêt le, mei hen ka duah na. Râwk dep hen an um le, muhnâk ah lâu kâi rê hen tu chun an um rawh.

⁷ “Churuang chun, Kei, LALPA Zeizawng tikho, Israel Pathian nih, zei rangah chubang thilsual chu nan ti ti hen tuah ka nan deih na. Mipa tla leh nunau tla, ngâksia leh fasêm tla, nan mi tla pakhat khawm âk lo ding hen an tlûnah siatnâk tlungtir nan duh mu?

⁸ Um ding hen nan hawngnâk Aigupta ram ah hin milem tla sawnh hen pathian dang tla sinah a bâwl hen zei rangah ka thin nan ka thawktir? Tual tlûnah mi phun kip nih a nan zauhnawmh na ding leh siatphurh min nan put ding hen nanmah siat leh râwknâk ding ah hi hi nan ti mi asi lo ma?

⁹ Juda khuapi tla leh Jerusalem zâwllâi ah a nan thlâk natu tla, Juda lalchem tla leh an nupi tla, nanmah leh nan nupi tla nih thilsual nan ti mi zawzawng tla nan philh ver rawh na maw?

¹⁰ Sikhawmsele tutiang khawm ah thinlung nâunâk rêng nan nei lo. Nanmah leh an thlâk natu sinah dân ka nan pêk na mi zawzawng hâwi a um hen kei rangah nan hawng ka zah lo thlo.

¹¹ “Chu hâwi asi ruangah, Kei, LALPA Zeizawng tikho, Israel Pathian nih, ka nan hertâk na lai le, Juda zawzawng ka veih hep awt.

¹² Juda mi tla, um rih mi Aigupta ram ah kal hen um tumtu tla chu an ektê hen an vei dep mi chu ka zauhnik lai. Râltuknâk ah mawh, pâmnâk ah mawh a lian a mê hen Aigupta ram ah an thi hep lai. Zauhnâkah lâu kâi rê hen an um lai le; mi tla nih an zauhnawmh lai le, siatbarh min an puttir na lai.

¹³ Jerusalem chu râltuk leh pâmnâk leh râi hen ka rêp mi hâwitê hen Aigupta ah um mi tla chu ka rêp na awt.

¹⁴ Juda mi tla um rih mi, Aigupta ram ah va um ding hen kaltu tla chu pakhat khawm an âwl hen an suak lai lo. Chunah um nawlh ding hen duhtu tla chu pakhat khawm Juda ram ah an hawng kîr lai lo. A tek mi tâwmtê tla cho lo chu âukhawm an kîr lai lo,” a ti.

¹⁵ Churawhchun, pathian dang tla sinah an nupi tla nih bâwlnâk an ap ti theihtu tla zawzawng leh chunah nunau dîr mi zawzawng Israel tla Aigupta simlei ah um mi, zapi minung tam tak nih ka sinah,

¹⁶ “LALPA min hen ngâi ding hen na kan simh mi thu chu kan êl.

¹⁷ Thi1 zeizawng ti ding hen kan sim mi chu kan ti awt. Kan pathiannu, vân lalnu sinah bâwlnâk kan ap hen a sinah uain ap mi tla kan tawih awt, kanmah leh hawng kan thlâktu tla, kan lalchem leh hawng kan ruitu tla nih Juda khuapi tla leh Jerusalem zâwllâi ah kan ti mi hâwi hen. Churawhchun, tî-râwl tam tak kan nei, sul-le-lam tluang tak hen kan um le, nawknâk zeikhawm a um lo.

¹⁸ Sikhawmsele vân lalnu sinah bâwlnâk pêk kan bâng hen uain ap mi a sinah kan tawih lonâk thawk hen zeikhawm kan nei lo le, kan mi tla chu râltuknâk leh pâmnâk ah an thi,” an ti.

¹⁹ Chun, chu nunau tla ber nih chun, “Vân lalnu hen bang cho hen sang kan em hen a sinah bâwlnâk kan ap le, a sinah uain ap mi kan tawih le, kan thilti tla chu kan pasal tla nih rem an ti,” an ti.

²⁰ Churawhchun, mipa leh nunau zawzawng chu hâwi hen hawng ka sângtu tla sinah chun,

²¹ “Nanmah leh an thlâk natu, nan lal tla leh an rui natu leh ram lakah mi tla nih Juda khuapi lakah leh Jerusalem khua lâi ah bâwlnâk nan pêk mi tla chu LALPA nih philh leh theih lo ding hen ma nan ruat?

²² Tusûn ni takah hin nan ram chu râwk hen a um le, a sungah pakhat khawm an um lo rawh. LALPA nih nan sualnâk leh nan thilsual ti a ngâi châwklo rawh ruangah zauhnâk ah ṭihnungkâi rê hen a um le, a min ah khawm mi nih siatbarh mi ti asi.

²³ A thupêk zawzawng ngâilo hen pathian dang tla sinah bâwlnâk ap hen LALPA tlûnah thilsual nan ti ruangah tu mi siatnâk hi nan tlûnah a hawng tlung rawh asi,” a ti.

^24-25 Mi zawzawng tla a bîk hen nunau tla, Aigupta ram ah Juda um mi tla sinah LALPA Zeizawng tikho, Israel Pathian nih a sim mi chu ka simh na: “Nanmah leh nan nupi tla hen vân lalnu sinah thutiamnâk bir tak nan nei. A sinah bâwlnâk tla ap ding leh a sinah uain ap mi tla tawih ding hen thu nanna tiam le, nan kil thlir. A ṭha ma chu, chu hâwi asi chun! Nan thutiam hâwi hen um u! Nanna tiam mi chu ti u!

²⁶ Sikhawmsele nannih Aigupta ram ah um mi zawzawng sinah Kei, LALPA Zeizawng tikho, keimah min hen thutiamnâk ka siam mi chu tuah ngâi u: ‘Pathian nung min hen thu ka tiam!’ ti sim hen thutiamnâk rerêng ka min hen nan lakah âukhawm kan neitir na awtlo rawh.

²⁷ Nanna dingchang lo ding mi leh siat leh râwk hen nan um ding mi ka nan zauh na awt ko. Pakhat khawm âk lo hen râltuknâk ah mawh râi lakah mawh nan thi hep lai.

²⁸ Sikhawmsele nan lakah mi tâwmtê thi lo mi chu Aigupta ram ah mi chu Juda ram ah nan kîr lai. Churawhchun, a thibang tla nih keimah thu ma a dik anmah thu ma, âu thu a dik an theih lai.

²⁹ Nan tlûnah siat leh râwknâk hawng tlung ding hen thu ka tiamh mi leh hi mun ah ka nan rêp na ding mi chu a hawng tlung ngelchel awt ti theihnâk, Kei, LALPA nih ka nan pêk na lai.

³⁰ Juda lalchem Zedekiah chu Babulon lalchem Nebukadnezar amah thah duhtu a mêlma sinah ka pêk mi hâwi hen Aigupta lal Hophra chu amah thah duhtu a mêlma sinah ka pêk bâk awt,” a ti.