JEREMIA 42 - Bawm Common Language Bible Version

Mi Zapi Tla Nih Thlacham Ding Hen Jeremia An Ngiar

¹ Churawhchun, kawrsen ruitu tla zawzawng Kareah fapa Johanan leh Hosaiah fapa Azariah chu zapi lakah murui kip tla hen an hawng le, ka sinah,

² “Zângfahtê hen kan deih mi chu hawng kan ti piak! LALPA, kan Pathian sinah thla hawng kan cham piak. A vei bang tla zawzawng rangah thla hawng kan cham piak. Na kan muh mi hâwi hen veikhat rangah chun tam tak kan si le, tu lam chu tâwmtê cho kan si rawh.

³ Kan kalnâk ding lampi hawng kan muhtir ding leh kan ti ding mi hawng kan theihtir ding hen LALPA, kan Pathian sinah thla hawng kan cham piak,” an ti.

⁴ Kei nih ka sâng le, “A ṭha asi, chu hâwi asi chun, nan ka deih mi hâwi hen LALPA, kan Pathian chu ka ngiar lai le, a sim mi zawng chu kan simh na lai. Nan lakah zeikhawm ka pheh lai lo,” a ti.

⁵ Churawhchun, annih nih ka sinah, “LALPA kan Pathian nih kan rangah thu hawng kan pêk mi zawzawng kan zûl lo chun kan lakah LALPA chu theihpitu dik tak zumhkâi si seh.

⁶ Kan rangah lawmhnâk si seh silah seh deih ding hen kan ngiartir mi LALPA kan Pathian thu chu kan ngâi lai,” an ti.

LALPA Nih Jeremia Thlachamnâk A Sâng

⁷ Ni râ nûnah LALPA nih ka sinah thu a sim;

⁸ churawhchun Johanan leh a sinah mi kawrsen ruitu zawzawng leh midang tla ka pumh na.

⁹ An sinah, “LALPA, Israel Pathian a sinah thil ngiar ding hen nan ka fial mi nih,

¹⁰ ‘Hi ram ah nung dam hen um vima ding nan duh mi asi chun, râwk lo ding hen ka nan dîrh na lai le; phâwi lo ding hen ka nan phun na lai. Nan lakah siat leh râwknâk ka tlungtir mi ruangah thungâi ka lung a fâk.

¹¹ Babulon lalchem chu ṭih lah u rawh. Nan sinah ka um, a thiltikhonâk lakah mi ka nan hum na lai.

¹² Kei chu mikhuaruat mi kasi le, nan tlûnah khua ka ruat tir lai le, in lei a nan tlungtir na lai. Kei, LALPA nih ka sim asi,’ a ti.

^13-15 “Sikhawmsele, nannih Juda ram ah um mi nih LALPA nan Pathian thu nan ngâilo ding asi lo, hi ram ah um khawm hi nan êl ding asi loh. ‘Silo, Aigupta ram ah, tuknâk um lonâk ah, râltuk thu leh sungvâng umlonâk mun ah kan kal awt’ nan ti ding asi lo. Chu hâwi nan ti chun, LALPA Zeizawng tikho, Israel Pathian nih, Aigupta ram ah kal hen um ding nan tum mi asi chun,

¹⁶ râltuk nan ṭih mi nih a nan tanh na lai le, sungvâng nan ṭih mi nih a nan zûl na lai le, Aigupta ram ah nan thi lai.

¹⁷ Aigupta ram ah kal hen um tumtu zawzawng chu, râltuknâk ah mawh, sungvâng hen mawh râi lakah mawh an thi lai. An lakah pakhat khawm an him lai lo, an lakah siatnâk ka tlungtir ding mi lakah pakhat khawm an âwl lai lo,’ a ti.

¹⁸ “LALPA, Israel Pathian nih, ‘Aigupta ram ah nan kal mi asi chun, ka thinthawknâk Jerusalem mi tlûnah ka tawih mi hâwi hen nan tlûnah ka thinrunnâk ka tawih lai. Minung mit muhnâk ah ṭihnungkâi rê hen nan um lai le; mi nih an zauhnawmh na lai le, nan min ah siatbarh ti nan si lai. Hi mun hi nan muh nawlh lai lo rawh,’ ” a ti.

¹⁹ Churawhchun, ka sim vima le, “Nannih Juda ram ah um mi tla, Aigupta ram ah kal lo ding hen LALPA nih a nan simh na.

²⁰ Churuangah tuah thihnâk rê hen thil diklo nan ti ti ka nan simhkan na. LALPA kan Pathian sinah thla an cham piak na ding hen nan hawng ka ngiar le, thupêk zawzawng ti ver ding thu nanna tiam.

²¹ Tu chun LALPA kan Pathian nih a nan simh na ding hen hawng ka fial mi thu nan ngâilo ti ka nan simh na.

²² Churuang chun hi hi theih u: um ding duh hen nan va kalnâk ram ah, râltuknâk ah mawh, pâmnâk ah mawh, râi lakah mawh nan thi lai,” a ti.