JEREMIA 41 - Bawm Common Language Bible Version

¹ Chu kum a thla sarihnâk ah Nethaniah fapa lsmael, Elisama tupa lal dâwngsungkhur leh lalchem hotu tla lakah pakhat chu minung parâ hen Gedaliah va muh ding hen Mizpah ah an va kal.

² Mun khat hen buh an ei liau chirah, Ismael leh a sinah mi minung parâ tla nih an nâmsâu an phâwi le, Gedaliah chu an thah.

³ Ismael nih Gedaliah sinah Israel tla Mizpah ah um mi zawzawng leh Babulon kawrsen chunah an hawng mi tla chu a thah hep na.

⁴ A thâituan ah Gedaliah an thah mi thu âukhawm nih an theih lânah,

⁵ minung sâwmriat Sekem, Siloh leh Samaria thawk hen an hawng tleng. An khamul an mêt le, an nipuan tla an thlêk le, anna ât. Fâng leh rimthâw tla Biakin ah ap ding an put.

⁶ Churawhchun, Ismael chu ṭap bû hen anmah tla va tawng ding hen Mizpah ah mi a suak. An sinah a va tleng rawh chun an sinah, “Zângfahtê hen Gedaliah muh ding hen hawng lût u,” a ti.

⁷ Khuapi sungah an va lût kâ hen Ismael leh a hâwi tla nih an thah na le, an ruak tla chu tikhurchawh lakah an lawnh na.

⁸ Sikhawmsele, chu murui lakah mi parâ tla nih, Ismael sinah, “Zângfahtê hen hawng kan thah lah! Phâisen ah fâng, oliv sariak leh khuaitizû thuh mi kan nei,” an ti. Churawhchun, a zuah na.

⁹ Ismael nih mi a thah na mi ruak a lawnhnâk tikhurchawh chu lalchem Asa nih Israel lalchem Baasa nih a do liauah a tikhurchawh lian tak pakhat asi. Ismael nih chu tikhurchawh chu ruak hen a khattir.

¹⁰ Churawhchun, lal fanu tla leh Mizpah ah um rih mi tla zawzawng hotu Nebuzaradan nih Gedaliah zauhkhenh ding ah a siah mi zawzawng rêng a thlâk hep na. Ismael nih sal ah a tleih na le, Amon ram leiah a put hep na.

¹¹ Johanan leh a sinah mi kawrsen ruitu zawzawng nih Ismael thilsual ti chu an theih rawh.

¹² Churawhchun, a minung tla hen an va ṭhâwl le, tikhurchawh lian tak kiangah mi Gebeon ah an va phanh.

¹³ Ismael nih rêng a thlâk mi tla nih Johanan leh a sinah zapi ruitu tla an muh na rawh chun thungâi anna lâwm le,

¹⁴ churawhchun anna her le, an sinah an va tek.

¹⁵ Sikhawmsele Ismael leh a hâwi pariat tla chu Johanan lakah mi thawk hen an suak le, Amon ram leiah an tek.

¹⁶ Churawhchun, Johanan leh a sinah zapi ruitu tla nih Ismael nih Gedaliah kawrsen tla, nunau tla, ngâksia tla leh mi tilkhei tla a thah na nûnah Mizpah thawk hen sal ah a put na mi tla chu an rui na rawh.

^17-18 Ismael nih Gedaliah, Babulon lalchem nih ram lâirêltu rangah a siah mi a thah ruangah Babulon mi tla chu thungâi an ṭih na. Churawhchun, Babulon mi tla lakah mi chu suak ding hen Aigupta ram leiah an kal. Lampi ah Bethlehem kiangah Chimham ah anna dîn.