JEREMIA 40 - Bawm Common Language Bible Version

Jeremia Gedaliah Sinah A Um

¹ Hotu Nebuzaradan nih Ramah ah hawng ka suah nûnah LALPA nih ka sinah thu a sim. Jerusalem ah midang tla leh Juda ram ah sal tleih mi tla hen Babulon leikângah rêngkhimh bû hen put hen ka um.

² Chu hotu nih chun a dang hen hawng ka kawh le, ka sinah, “LALPA, na Pathian nih hi ram hin siatnâk hen a ṭhih le,

³ tu lam chun ka ti lai a ti mi chu a ti rawh. Na mi tla nih LALPA lakah thilsual ti hen a thu an ngâilo ruangah, hi bang zawng hi a hawng tlung mi asi.

⁴ Tuah na kut lakah rêngkhimh mi chu kan sut piak le, kan suah rawh asi. Na duh mi asi chun ka sinah Babulon ah na hawng kho lai le, keimah nih ka nan zauhkhenh lai. Sikhawmsele kal ding na duh lo mi asi lam chun na kal lo ko lai. Ram pumpi lakah thîm ding na nei, na duhnâk zawng ah na kal kho,” a ti.

⁵ Zeitin khawm ka sâng lo rawh chun, Nebuzaradan nih, “Saphan tupa, Ahikam fapa Gedaliah, Babulon lal nih Juda khuapi tla lakah lâirêltu ah a siam mi sinah va kîr. Amah sinah leh mi zapi tla sin khawm ah na um kho, asi lo leh kal ding na duhnâk zawng ah na kal kho,” a ti.

⁶ Churawhchun, lâwmman leh eibâr tla put ding mi hawng ka pêk le, ka kalnâk lei ding ah chun hawng ka kaltir rawh. Mizpah ah Gedaliah sinah chun ka va kal le, sal ah put bang tla sinah chun ka um rawh.

Juda Ram Lâirêltu Gedaliah

⁷ Juda mi hotu leh kawrsen tla zeimaw mi chu anna pêk lo. Babulon lal nih Gedaliah chu ram lâirêltu ah a siam le, Babulon leiah an put na lo mi, ram lakah mipâm chem tla hotu ding ah a siah ti an theih rawh.

⁸ Churawhchun, Nathaniah fapa Ismael, Kareah fapa Johanan, Tanhumet fapa Seraiah, Ephai fapa tla Netophah leh Jezaniah mi, Maakah thawk hen an mi tla hen Mizpah a mi Gedaliah sinah an va kal.

⁹ Gedaliah nih an sinah, “Babulon mi tla sinah va a pêk ding chu nan ṭih ding asi lo ti kan simh na. Hi ram ah um ule, Babulon lal rianṭuan ule, nan rangah zeizawng a tluang lai.

¹⁰ Keimah ngelchel khawm Mizpah ah ka um lai le, hinah Babulon mi tla an hawng tikah nanmah ruangrûl ka um lai. Sikhawmsele nan luah mi khua tla ah nan um lai le, uain tla, theirah tla leh oliv sariak tla nan pumh lai le, munkhat kâ ah nan siah lai,” a ti.

¹¹ Chu tikah Israel mi tla Moab, Amon, Edom leh ram dangah um mi tla nih Babulon lal nih Israel lakah zeimaw mi tla Juda ram ah um ding a siang na mi leh an lâirêltu ding ah Gedaliah a siah mi chu an theih rawh.

¹² Churawhchun, anna rekrâwinâk mun chu an kaltâk le, Juda ram ah an kîr. Mizpah mi Gedaliah anna pûm le, uain leh theirah tam tak an put piak.

Gedaliah Thah Hen A Um

¹³ Chu nûn chun, Johanan leh kawrsen ruitu tla anna pêk lo mi tla chu Mizpah ah mi Gedaliah sinah an hawng le a sinah,

¹⁴ “Amon mi lal Baalis nih nangmah thah ding hen Ismael a hawng fial ti na theih lo ma?” an ti. Sikhawmsele Gedaliah nih a lung lo.

¹⁵ Churawhchun, Johanan nih a thuptê hen a sinah, “Ismael thah ding hen hawng ka kaltir ko, âukhawm nih an theih vak lai lo. Zei rangah nang rangah an thah êu lai? Chu hâwi a hawng si chun, Juda tla na kiangah anna pûm mi rekrâwitirtu leh Juda ram ah mâk hen an um mi zawzawng tlûnah siatnâk tlungtirtu asi lai,” a ti.

¹⁶ Sikhawmsele Gedaliah nih a sâng le, “Ti rîlmâl lah! Ismael thu na sim mi chu a diklo asi!” a ti.