JEREMIA 4 - Bawm Common Language Bible Version

Rim Ding Hen Kawhnâk

¹ LALPA nih, “Israel mi tla, kîr ding nan duh asi chun ka sinah hawng kîr u. Ka hua mi milem tla nan lawnh hen ka lakah zumhkâi hen nan um chun,

² ka min hen thutiam nan rangah a dik lai. Chu tikah phun zawzawng tla nih anmah malsâwm na ding hen an ka deih lai le, an ka sawr lai,” a ti.

³ LALPA nih Juda mi tla leh Jerusalem mi sinah, “Nan phâisen nâwn lo mi chu nâwn ule; bualingnei nâwngah nan thlâi chî tla tuh lah u.

⁴ Nannih Juda mi leh Jerusalem mi tla, ka sinah thudân nan tuk mi chu kil thlir ule, kei nan LALPA lakah hawng a pêk u. Chu hâwi nan ti lo chun thilsual nan ti mi ruangah ka thinthawknâk nih mei hâwi hen an khangh na lai. A kâng lai le, âukhawm mihtu a um lai loh,” a ti.

Juda Chu Rûnnâk Hen Ṭhih Asi

⁵ Ram pumpi ah tâwtawrâwt tum u! Fiang tak leh hâu fâk tak hen âu u! Juda mi tla leh Jerusalem mi tla chu kulhnei khua tla ah tek ding hen simh na u.

⁶ Zion leikâng fûk u! Him ding hen tek u! Fâwkfual lah u! LALPA nih marlei thawk hen siatnâk leh râwknâk tak a hawng tlungtir.

⁷ Chakeibaknei â thupnâk mun ah mi a hawng mi hâwi hen, phun tla râwktu a hawng suak rawh. Juda tla râwk ding hen a hawng kal. Juda khuapi tla chu râwk dep hen kaltâk asi lai le, a sungah pakhat khawm an um lai lo.

⁸ Churuangah LALPA thinthawknâk fâk tak Juda lakah mi a reh lo ruangah salâpuan aih ule; ṭap leh thinlung fâk hen um u.

⁹ LALPA nih, “Chu ni ah chun lalchem tla leh rianṭuantu tla chu an zer lai le; bâwlpu tla chu lâu khit hen an um lai le, khuavâng tla nih chê an ti lai,” a ti.

¹⁰ Churawhchun, kei nih, “LALPA Zahkâi, Jerusalem khua mi tla chu na perpet dep na asi! Thlangamnâk a um lai ti hen na sim le, sikhawmsele an rawm ah nâmsâu a um rawh,” ka ti.

¹¹ Ramkaro thawk hen thli lum anmah leikângah a hawng râng ding mi thu Jerusalem mi tla simh ding tik chu a tlung rawh. Fahî tla cho ranh ding mi thli salam asi awtlo.

¹² LALPA thupêk hen a hawng ding mi thli chu, chu ngâk chun a chawp dauh awt! LALPA amah tak nih a mi le tla tlûnah lâirêlnâk a sim mi asi.

Juda Chu Mêlma Tla Nih An Hual Dak

¹³ Zauhnik, sûm hâwi hen mêlma tla an hawng. A râltuknâk kari tla chu thli â hêl mi hâwi asi, a rang tla chu mupi ngâk hen an chak. Kan vei mi rawh! Kan vânduai rawh!

¹⁴ Jerusalem, na thinlung ah mi sualnâk chu ṭâwl rawh, na him khonâk ding hen. Zei tiang riamruam me sualnâk na dawn awt?

¹⁵ Dan khuapi leh Efraim tlâng ram khuapi thawk hen mifial hawng kal mi nih thâwng ṭhalo tak an sim.

¹⁶ Phun tla leh Jerusalem mi tla chu ram lât tak thawk hen mêlma tla an hawng kal ti simhkan ding hen an hawng. Chubang mêlma tla nih Juda khuapi tla chu an âu nawh na lai le,

¹⁷ a mi tla chu LALPA lakah an hel ruangah phâisen, mi nih an vêng mi hâwi hen Jerusalem chu an hual dak lai. LALPA nih a sim asi.

¹⁸ Juda, nangmah umdân leh thil na ti mi hen, nangmah tlûnah hi hi na tlungtir mi asi. Na sualnâk nih hi tuarnâk hi a umtir hen na thinlung a sunh asi.

A Mi Tla Ruangah Jeremia Lungfâknâk

¹⁹ A fâk a! A fâk ka tuar kho lo. Ka lung a fâk a! Ka thinlung a fâk chiam e! Tâwtawrâwt hâu leh râltuk hâu ka theih le, ka dâisip kho lo.

²⁰ Siatnâk nûnah siatnâk dang nih a hawng zûl le; ram pumpi chu râwk dep hen a um rawh. Kan puanin tla chu a râwk sawm le; a puanzâr tla chu a tlêk dip rawh.

²¹ Zei tiang riamruam me râltuk chu ka muh hen tâwtawrâwt hâu chu ka theih awt?

²² LALPA nih, “Ka mi tla chu an mâwl tuk le; an hawng ka theih loh. Ngâksia â hâwi an si le; zeikhawm theihthiamnâk an nei lo. Thilsual ti chu an thiam thlo le, sikhawmsele thil ṭha ti ding an tumh loh,” a ti.

Siatnâk A Hawng Tlung Ding Mi Jeremia Muhnâk

²³ Tual ka zauh le, a karo hen a um thlo; vân ka zauh le, chêu khawm a um lo.

²⁴ Tlâng sâng tla ka zauh le, anna nîn le, Tlâng tênâu tla chu khatlei khatlei ah anna ṭhen.

²⁵ Minung khawm umlo hen ka muh le; va tla khawm an zuang phin.

²⁶ Ram ningno tla chu a karo hen a um le; a khuapi tla chu â râwk hep, chu chu LALPA thinthawknâk fâk ruangah asi.

²⁷ (LALPA nih chun, laikulh pumpi chu ramkaro hâwi a hawng si lai le, sikhawmsele ka râwk dep lai lo ti hen a sim.)

²⁸ Tual chu a lungfâk lai le, vân a mûi lai. LALPA nih chun a sim rawh le, a thinlung a lêt lai lo. Thu a thlûk rawh mi chu a lêt nawlh lai lo rawh.

²⁹ Rang tlûnah â chuan mi leh chanhtiang kahtu tla hâu ah mikip an tek hep lai. A zeimaw mi chu thing mun ah an tek lai le, midang tla chu lungpi lakah an kâi lai. Khuapi tla chu a karo hen mâk asi lai le, a sungah âukhawm an um nawlh lai lo rawh.

³⁰ Jerusalem, na vânduai rawh! Zei rangah puansen hen na thuam? Zei rangah lungsung hen na thuam hen rawng na mit ah na buaih? Zeikhawm silo ding vângah dawh tak hen na siam? A nan duhtu tla nih an hua hen thah ding an duh rawh.

³¹ Nunau nganfâk a ṭap mi hâwi leh nunau nih a fa tîr ring liauah a râk mi hâwi hen ṭap hâu ka theih. Jerusalem chu a thawsuah kho lo rê hen a râk le, a kut zo bû hen, “Ka vânduai a! Keimah thah ding hen an hawng ko rawh,” a ti.