JEREMIA 39 - Bawm Common Language Bible Version

Jerusalem Tlûknâk

¹ Juda lalchem Zedekiah lal asi mi kum kua a thla rânâk ah Babulon lalchem Nebukadnezar chu a kawrsen zawzawng hen an hawng le, Jerusalem an do.

² Zedekiah a lal mi kum leikhat a thla kuanâk ah khuapi kulh tla chu a râwk ver rawh.

³ (Jerusalem lâk hen a um rawh chun, Babulon lalchem rianṭuantu lian tla chu an hawng le, a lâi ah mi kulh kawtkâ tla Nergal Sarezer hen Samgar Nebo, Sarsekim leh Nergal Sarezar dang tla an luah.)

⁴ Zedekiah leh a kawrsen tla nih chu hâwi thil a um mi an muh rawh chun zân ah khuapi mi chu suaktâk ding an tum. Lal dûm lei mi lampi hen an kal le, kulh tawnhnâk kawtkâ ah an suak le, Jordan vakuam leiah an kal.

⁵ Sikhawmsele, Babulon kawrsen nih an ṭhâwl na le, Jeriko kiang mi phâi ah Zedekiah chu an tleih rawh. Churawhchun, lalchem Nebukadnezar, Hamat ram ah Riblah khuapi ah a um mi sinah an kalpi le, chunah chun a tlûn thu lâi a rêl piak.

⁶ Riblah ah chun Zedekiah fapa tla chu an pa Zedekiah mitmuh ah an thah na le, Juda rianṭuantu tla khawm an thah na.

⁷ Chu nûnah chun Zedekiah chu a mit an chawih zek le, rêng an khimh le, Babulon leiah an kalpi.

⁸ Chu kar chun lal in chu Babulon mi tla nih an duah le, mi zapi tla in khawm an duah le, Jerusalem kulh tla an chimh ver.

⁹ A dawnghnâk ah chun kawrsen hotu Nebuzaradan nih khuapi ah minung um mi tla chu sal ah Babulon leiah a sinah anna pêk mi tla hen a put na.

¹⁰ Juda ram ah mipâm chem thil-le-rî nei lo tla chu a mâk na le, grep dûm leh phâisen tla a pêk na.

Jeremia Suahnâk

¹¹ Sikhawmsele, lalchem Nebukadnezar nih kawrsen hotu Nebuzaradan chu hi bang thupêk hi a pêk:

¹² “Kal le, Jeremia va hâwl le, ṭhadektê hen zauhkhenh. Nganfâk zeikhawm pêk lah le, a duh mi zawng ti piak,” a ti.

¹³ Churawhchun, Nebuzaradan leh hotu lian dang tla, Nebusazban leh Nergal Sarezer leh Babulon lalram ah hotu dang

¹⁴ tla zawzawng hen lal in kulh sungah ka um mi chu an ka kalpi rawh. Gedaliah, Ahikam fapa Saphan tupa, in leiah him tak hen ka tlung ding muhtu ding mi chu hawng ka zauhkhenhtu ah an siah. Churawhchun, chunah mi tla sinah chun ka um bâk rawh.

Ebedmelek Rangah Lungumnâk

¹⁵ Lal in kulh sungah rêng ka tlâ liauah,

¹⁶ Sudan mi Ebedmelek simh ding hen LALPA Zeizawng tikho, Israel Pathian nih thu hawng ka simh, “Ka ti lai ka ti mi hâwitê hen hi khuapi tlûnah hin siatnâk leh sul-le-lam tluanglonâk ka tlungtir lai. Chubang chu a tlung tikah muh ding hen chunah chun na um lai.

¹⁷ Sikhawmsele, Kei, LALPA nih ka nan hum lai le, na ṭih na mi tla kut ah pêk hen na um lai lo.

¹⁸ Him tak hen ka nan kilkâwi lai le, thah hen na um lai lo. Keimah na hawng ka rinhsanh ruangah na nungnâk chu a him lai. Kei, LALPA nih ka sim asi,” a ti.