JEREMIA 38 - Bawm Common Language Bible Version

Jeremia Tipang A Kang Mi Lakah Um Mi

¹ Matan fapa, Sephatiah, Pasur fapa Gedaliah, Selemiah fapa Jehukal leh Malkiah fapa Pasur tla nih

² “Âuzawng hi khuapi lakah umtu chu râltuknâk ah mawh, pâmnâk ah mawh, râi lakah mawh an thi lai. Sikhawmsele âuzawng suak hen Babulon mi tla sinah â pêk mi chu thah asi lai lo le, a nungnâk chu zuah asi lai,” LALPA nih a ti mi mi zapi tla sinah ka sim mi chu an theih.

³ “Khuapi khawm Babulon kawrsen sinah ka pêk lai le, an lâk lai,” LALPA nih a ti mi khawm ka simh na.

⁴ Churawhchun, rianṭuantu tla chu lalchem sinah an va kal le, a sinah, “Hi minung hi thah ding mi asi. Hi hâwi thu a sim mi nih khuapi lakah kawrsen tla a zertir ver le, khuapi lakah um mi mikip sinah hi hâwi hen a ti. Midang rangah ṭangpi ding a awtlo le, nganfâk pêk na ding cho a duh,” an ti.

⁵ Lalchem Zedekiah nih a sâng le, “A ṭha ma chu, nan duhzia zawng hen a tlûnah ti u; kan khap na lo,” a ti.

⁶ Churawhchun, an ka kalpi le, Malkiah tipang ah ri hen an hawng ka thlâk le, chu chu lal in kulh sungah a um mi asi. Chu tipang lak chun tî a um lo le, nêng karo asi le, chu lakah chun ka tlâ rawh.

⁷ Sikhawmsele, Sudan mi Ebedmelek, mi tilkhei, lal in ah rian a ṭuan mi nih tipang lakah an hawng ka siah mi chu a theih rawh. Chu liau chun lalchem chu Benjamin kawtkâ mi lâirêlnâk mun ah a um.

⁸ Ebedmelek chu chunah lal um mi sinah a va kal le,

⁹ “Bâwipa, zahkâi, hi minung tla thilti hi a diklo. Jeremia chu tipang ah an siah le, chunah chun sungvâng hen a thi ding ko rawh, khuapi khawm ah ei ding a um lo rawh mi,” a ti.

¹⁰ Churawhchun, lalchem nih Ebedmelek sinah minung sâwmthum hen ka thih lânah tipang a mi chu nûk ding hen thu a pêk.

¹¹ Churawhchun, Ebedmelek chu, chu minung tla hen lal in ah mi thil siahnâk kardang sungah nipuan a li mi an lâk le, chu chu rirual hen ka sinah an hawng thlâk.

¹² Chu puansia chu ka zak tangah danh ding hen an hawng ka simh le, rirual nih hawng ka fâktir lonâk ding hen. Chu hâwi hen ka ti le,

¹³ chu tipang a mi chu an ka nûk le, an ka suah rawh. Chu nûn chun kulh sungah an hawng ka siah rawh.

Zedekiah Nih Jeremia Rangah Thu A Deih

¹⁴ Tik dangah lalchem Zedekiah nih Biakin tualmâi a pathumnâk ah hawng ka kalpi le, ka sinah, “Thu kan deih awt, thudik zawzawng hawng ka simh ding hen ka duh,” a ti.

¹⁵ Kei nih ka sâng le, “Thudik kan simh chun na hawng ka thah lai, thu ka nan simh khawm ah na ngâi duh ding asi lo,” ka ti.

¹⁶ Churawhchun, lalchem Zedekiah nih a thuptê hen thu hawng ka tiamh, “Pathian nung, nungnâk hawng kan pêktu Pathian min sal hen ka tiam asi, ka nan thah lai lo le, nangmah thah ding duhtu sinah khawm kan pêk lai lo,” a ti.

¹⁷ Churawhchun, LALPA Zeizawng tikho, Israel Pathian nih a sim mi chu Zedekiah ka simh, “Babulon lalchem milian tla sinah na pêk mi asi chun, na nungnâk zuah asi lai le, khuapi khawm duah asi lai lo, nang leh na dâwngsung chu zuah nan si lai.

¹⁸ Sikhawmsele, nâ pêk lo mi asi chun, khuapi chu Babulon mi tla kut ah pêk asi lai le, annih nih an duah lai le, an kut lakah mi na suak lai lo,” a ti.

¹⁹ Sikhawmsele, lalchem nih a sâng le, “Kan ram minung Babulon leiah tek ding mi chu thungâi ka ṭihpi na, kei khawm an sinah pêk leh rêp hen ka um kho,” a ti.

²⁰ Kei nih, “An lakah pêk na si lai lo. LALPA thuchah hi ngâi ding hen kan ngiar asi; chu tikah na rangah zeizawng a tluang lai le, na nungnâk khawm zuah asi lai.

²¹ Sikhawmsele, na pêk duh lo chun thil a hawng tlung ding mi chu muhnâk lakah LALPA nih hawng ka muhtir ver rawh.

²² Juda lal in ah nunau um mi zawng chu Babulon lalchem milian tla sinah put hen an um mi ka muh. An kal liauah an thusim ngâinik: ‘Lalchem chu a hâwi ṭha chem tla nih mah lo leiah an kalpi le, a tlûnah lâi an rêl. Tu chun a kê chu nêngthû lakah a pil le, a hâwi le nih an kaltâk rawh,’ ” an ti.

²³ Thu dang ka sim nawlh le, “Na nupi leh na fa tla chu Babulon leiah an put lai le, nangmah khawm na âwl lai lo. Babulon lalchem nih an tleih lai le, hi khuapi khawm duah asi lai,” ka ti.

²⁴ Zedekiah nih, “Hi kan thu ruat hi âukhawm theihtir lah na le, na rangah ṭihnung a kâi lai lo.

²⁵ Rianṭuantu tla nih kan sawnh mi hi an theih chun, an hawng lai le, kan thu ruat tla hi an deih lai. Thil zeizawng na simh ver na chun, a nan thah lo ding hen thu anna tiam lai.

²⁶ Chunah rêngin ah thi ding hen an kîrtir nawlh lo ding hen na ka deih mi hâwitê hen simh na,” a ti.

²⁷ Churawhchun, rianṭuantu zawzawng tla chu ka sinah an hawng le, thu an ka deih, lalchem nih sim ding hen hawng ka simh ziatê hen ka simh na. “Âukhawm nih kan thu ruat chu an theih lo ruangah zeikhawm ti khonâk an nei lo rawh.

²⁸ Churawhchun, Jerusalem an lâk ni tiang hen lal in kulh sungah siah hen ka um.