JEREMIA 37 - Bawm Common Language Bible Version

Zedekiah Nih Jeremia Rangah A Ngiarnâk

¹ Babulon lalchem Nebukadnezar nih Jehoiakim fapa Jehoiakin fapa mun ah Josiah fapa Zedekiah chu Juda lal ah a siam.

² Sikhawmsele Zedekiah leh a rianṭuantu tla leh zapi minung tla nih LALPA thuchah chu an ngâi duh lo.

³ Lalchem Zedekiah nih Selemiah fapa Jehukal leh Maaseiah fapa bâwlpu Zephaniah chu kan phun ruangrûl ah LALPA, kan Pathian sinah keimah nih thlacham ding ngiar ah a hawng fial na.

⁴ Kei khawm rêng ah ka tlâ lo rih le, mi zapi sinah thawsuak tak hen tlawng leh lêng hen ka um.

⁵ Babulon kawrsen tla nih Jerusalem chu an hual le, sikhawmsele Aigupta kawrsen tla nih ramri an hawng kanh ti an theih chun anna nâwp.

⁶ Churawhchun, LALPA Israel Pathian nih, Zedekiah sinah thusim ding hen hawng ka simh,

⁷ “Aigupta kawrsen tla chu nangmah ṭangpi ding hen an hawng le, sikhawmsele in leiah an kîr nawlh lai.

⁸ Babulon mi tla an hawng kîr lai le, khuapi chu an do lai le, an lâk lai le, an duah hep lai.

⁹ Babulon chu hawng ding nget an si ruangah Kei, LALPA nih ka nan simhkan na mi lakah hin Babulon mi tla chu an hawng kîr lo ding hen thinlung ah ruat lah u.

¹⁰ Babulon kawrsen zawzawng tla chu nan neh na hen, anna liam mi puanin ah an it ko mi tla cho um na menza khawmsele, chubang tla chu an hawng thawk lai le, khuapi chu an duah nget lai,” a ti.

Jeremia Chu Tleih Hen Leh Rêngah Thlâk Hen A Um

¹¹ Babulon kawrsen tla chu Aigupta kawrsen an hawng ruangah Jerusalem thawk hen an kîr rawh.

¹² Churawhchun, Jerusalem chu mâk hen ka dâwngsung thil ka tingvo va lâk ding hen Benjamin ram ah ka va kal.

¹³ Sikhawmsele, Benjamin kulh kawtkâ ka va tleng le, kawrsen hotu chunah rianṭuan mi a min Irijah Selemiah fapa Hananiah tupa nih a hawng ka dîrtir le, “Babulon leiah tek mi na si!” hawng ka ti.

¹⁴ Kei nih ka sâng le, “Chu hâwi asi lo! Ka tek lo,” ka ti. Sikhawmsele Irijah nih chun ka thu rêng a ngâilo. Ngâi ding ngangâk hen a tleih lam hawng ka tleih le, rianṭuantu sinah hawng ka put.

¹⁵ Annih tla chu an ro a thawk le, hawng ka vuak ding hen thu an suah, lâirêlnâk ah lasuirîntu Jonathan in, rêngin ah an mang mi sungah an hawng ka khumh.

¹⁶ Tual khur kardang sung ah ni sâwt tak siah hen ka um.

¹⁷ A nehnûn chun lalchem Zedekiah nih hawng ka kawh le, lal in ah a thuptê hen thu hawng ka deih, “LALPA thawk hen thuchah a um ma?” a ti. “Kei nih, “Um ta a,” ti hen ka sâng le, “Babulon lalchem sinah pêk hen na um lai,” ka ti.

¹⁸ Churawhchun, kei nih, “Nang leh na rianṭuantu tla leh hi bang minung tla lakah rêngin ah hawng ka khumh rê ding hen zei thilsual me ka ti?

¹⁹ Nangmah mawh ram mawh Babulon lalchem nih a nan do lai loh ti hen an simhtu na khuavâng tla tlûnah zei a hawng tlung rawh ne?

²⁰ Tuah, Bâwipa, ka thu ngâi ding leh ka nan deih mi hawng ka ti piak ding hen ka nan ngiar. Zângfahtê hen Jonathan in ah mi rêngin ah hawng ka kîrtir rîlmâl lah. Na ka kîrtir chun chunah chun ka thi ngelchel lai,” ka ti.

²¹ Churawhchun, lalchem Zedekiah nih lal in kulh sungah khumh ding hen thu a suah. Chunah chun ka um le, khuapi ah mi sang a dih lânlo chu nisiar hen sang siamtu sinah mi sang an hawng ka pêk.