JEREMIA 34 - Bawm Common Language Bible Version

Zedekiah Rangah Thuchah

¹ Babulon lalchem Nebukadnezar leh a kawrsen tla phun zawzawng leh chi zawzawng amah tangah um mi kawrsen tla nih an hawng ṭangpi hen Jerusalem leh a kiangkam khua tla an do liauah LALPA nih ka sinah thu a sim.

² LALPA, Israel Pathian nih Juda lalchem Zedekiah sinah thusim ding hen hawng ka fial le, “Kei, LALPA nih hi khuapi hi Babulon lal kut ah ka pêk lai le, anih nih a duah phin lai.

³ Nan suak lai lo; tleih nan si lai le, a sinah pêk nan si lai. Mêl leh mêl nanna muh lai le, amah chu na sawnh lai le, chu tikah Babulon ah na kal lai.

⁴ Zedekiah, na thu ka sim mi hi ngâi rawh. Râltuknâk ah chun na thi lai lo.

⁵ Thlangam tak hen na thi lai le, nangmah lânah an thlâktu lalchem tla an vûi na liauah rimthâw an duah mi hâwi hen nang rang khawm ah an duah lai. Nangmah ulhnâk an nei lai le, ‘Kan lalchem chu a thi rawh!’ an ti lai. Kei, LALPA nih ka sim asi,” a ti.

⁶ Churawhchun, Babulon lalchem kawrsen nih khuapi an do liau chirah lalchem Zedekiah Jerusalem mi sinah chu thuchah chu ka sim.

⁷ Kawrsen tla nih Lakis leh Azekah khawm an do le, Juda ram ah kulhnei khuapi tla lâwng an zuah.

Sal Tla Rangah Perpet Hen An Ti Na Mi

⁸ Lalchem Zedekiah leh Jerusalem ah um mi tla nih, Hebrai mi sal tla, nunau mipa hen suah ding hen remnâk an siam, âukhawm nih mah hâwi

⁹ Israel chu sal ah siam an si lonâk ding hen.

¹⁰ Zapi tla leh an ruitu tla nih an sal chu suah hen sal ah siam na lo rawh ding hen rem an ti.

¹¹ An suah na le, sikhawmsele an thinlung an lêt le, an lâk nawlh na le, zângran hen sal ah an siah nawlh na.

¹² Churawhchun, LALPA,

¹³ Israel Pathian nih zapi sinah thusim ding hen hawng ka fial: “Nan thlâktu tla hen Aigupta ram ah mi kan suakpi na hen sal ah mi kan suah na liauah thudântuk ka siam.

¹⁴ Hebrai sal tla chu kum ruk sal rian an ṭuan nûn chun a kum sarihnâk ah suah vima ding asi ti hen ka simh na. Sikhawmsele nan thlâktu tla nih thu ka sim mi chu ngaihlo lêm thlâk hen an ngâi duh lo.

¹⁵ Ni sâwtlotê kar nan thinlung nan lêt le, ka duhzia nan ti. Nan ektê hen nan hâwi Israel tla chu suah na ding hen rem nan ti le, keimah nan ka sawnhnâk Biakin ah ka mâika ah thudântuk nan siam.

¹⁶ Sikhawmsele nan thinlung nan lêt nawlh le, nan hawng ka zah lo thlo rawh. Nan ektê hen anmah duhzia hâwi hen nan suah na mi chu zângran ko hen sal ah nan lâk nawlh na.

¹⁷ Churuangah tuah Kei, LALPA nih, ka thu nan ngâilo ti ka sim asi: nan hâwi Israel rangah thawsuaknâk nan pêk na lo. A ṭha ma chu, asi chun, thawsuaknâk ka nan pêk na lai: râltuknâk, râi, pâmnâk lakah thi ding mi thawsuaknâk chu. Nan lakah thil ka ti mi hen laikulh phun kip ka lâutir na awt.

^18-19 Juda leh Jerusalem ah rianṭuantu tla, lal in ah rianṭuantu tla, bâwlpu tla leh ruitu zawzawng tla hen chawpê tan nih an suah mi kar lakah kal hen ka sinah thudântuk an siam. Sikhawmsele an thudântuk chu an buar le, a thu an zûl lo. Churuangah chawchal lakah an ti mi hâwitê hen hi bang mi tla tlûnah ka ti awt.

²⁰ An mêlma, anmah thah duhtu tla sinah ka pêk na lai le, an ruak chu va leh ramsa tla nih an ei lai.

²¹ Juda lalchem Zedekiah leh a rianṭuantu tla khawm anmah thah duhtu tla kut ah ka pêk na lai. Babulon kawrsen tla nanmah dotu an bâng rawh mi sinah ka nan pêk na lai.

²² Thu ka pêk na lai le, hi khuapi ah an hawng kîr nawlh lai. An do lai le, an lâk lai le, an duah hep lai. Juda khuapi tla chu minung pakhat khawm umlo mi ramkaro hâwi hen ka tuah lai. Kei, LALPA nih ka sim asi,” a ti.