JEREMIA 33 - Bawm Common Language Bible VersionThutiamnâk Dang Lungumnâk 1 Kulh sungah ka tâng liauah LALPA thuchah ka sinah a hawng tlung nawlh. 2 LALPA, tual siamtu; tuahtu leh a mun ah siahtu nih ka sinah thu a sim. A min LALPA si mi nih chun, 3 “Hawng ka auh ule, ka nan sâng na lai, nan theih dahlo mi thilchê tak ka nan simh na lai. 4-5 Kei, LALPA, Israel Pathian nih Jerusalem mi in tla leh Juda lal in chu siat asi lai ti ka sim asi. Babulon mi tla nih kulh hual hen tualpawng an siam mi chu suak hen va do na ding chu zeikhawm a ṭhatvaknâk a um lo. Ka thinthawknâk leh ka hehhârnâk hen ka thah na ding mi ruak hen khuapi chu a khat lai. A sungah minung tla nih thilsual an ti ruangah hi khuapi hi ka hertâk asi. 6 Sikhawmsele hi khuapi leh a mi tla hi ka damh na lai le, nung dam hen ka umtir nawlh na lai. Thlangamnâk leh himnâk tam tak ka muhtir na lai. 7 Juda leh Israel tla chu sul-le-lam tluang tak hen ka siam na lai le, a lânah mi hâwitê hen ka dirh nawlh na lai. 8 Ka lakah sualnâk an ti mi chu ka thiangtir na lai le, an sualnâk leh an helnâk chu ka ngaihdam na lai. 9 Jerusalem chu lâwmnâk, zahnâk, ka rangah putso ding mi bul asi lai, Jerusalem mi tla rangah thil ṭha ka ti mi tla leh khuapi lakah sul-le-lam tluangnâk ka tlungtir mi an theih tikah laikulh phun kip tla lâu hen an thir lai rawh,” a ti. 10 LALPA nih, “Mi nih hi mun hi ramkaro hâwi asi, a sungah minung leh ramsa khawm a um lo an ti. A dik ngâk, Juda khuapi leh Jerusalem khualâi tla chu a karo hen a um; ran leh minung khawm an um lo. Sikhawmsele chu mun ah chun lâwmnâk leh lâwptlonâk hâu, nupi umhnâk puai tuah hâu tla theih asi nawlh lai. 11 Mi nih ka Biakin ah lâwmnâk thil ap an hawng put liauah la an sak mi nan theih lai. ‘A ṭhatnâk leh dâwtnâk dawnglo ruangah LALPA Zeizawng tikho sinah lâwmthu sim u,’ an ti lai. Hi ram hi a lânah mi hâwitê hen sul-le-lam tluang tak hen ka siam lai. Kei, LALPA nih ka sim asi,” a ti. 12 LALPA, Zeizawng tikho nih, “Hi ram minung leh ran umlonâk ramkaro hâwi mi lakah hin, dawrâpu tla nih an dawrâ tla râwlno an tlâttir nawlh lai. 13 Tlângram a mi khuapi tla ah, tlângbul ah leh Juda ram simlei tla, Benjamin ram tla ah, Jerusalem kiangkam mi khua tla ah, Juda khuapi tla ah dawrâpu nih an dawrâ an rêl nawlh lai. Kei, LALPA nih ka sim asi,” a ti. 14 LALPA nih, “Israel leh Juda mi tla sinah thutiamnâk ka siam mi rangtlingtir ding tik chu a tlung rawh. 15 Chu tik chun David thlâk rep tak chu lalchem ah ka thîm lai. Chu lal nih chun ram pumpi ah thil dik leh rep tak a ti lai. 16 Juda mi tla leh Jerusalem mi tla chu ruangsuah hen an um lai le, him tak hen an um lai. Khuapi chu ‘LALPA kan ruangsuaknâk’ an ti lai. 17 Kei, LALPA nih, David thlâk chu Israel lalchem si kumza ding leh 18 bâwlpu ah ka rianṭuan ding leh duahphung thil ap, fâng thil ap leh bâwlnâk thil ap aptu ding mi chu Levi phun lakah mi si kumza ding hen ka tiamh asi,” a ti. 19 LALPA nih ka sinah, 20 “Sûn leh zân lakah a tiktê um vima ding leh chu thudântuk chu a râwk lonâk ding hen thudântuk ka siam. 21 Chu hâwi ber hen ka to-aw David sinah thudântuk ka siam le, a thlâk tla lakah lalchem siding mi um kumza ding hen leh Levi phun lakah mi bâwlpu tla sin khawm ah keimah rianṭuan kumza ding leh chubang thutiam chu râwk lo rawh ding hen thudântuk ka siam. 22 Ka to-aw David thlâk tla leh Levi phun lakah mi bâwlpu tla chu vân ah ârfi rêl châwklo leh tipi kapah sep rêl châwklo hâwi hen ka pungtir na lai,” a ti. 23 LALPA nih ka sinah, 24 “Israel leh Juda dâwngsungkhur panih ka thîm na mi ka nawng ti hen mi nih an sim mi na theih ma? Churuang chun mi nih ka mi tla chu an zauhnawmh hen phun khawm ah an rêl na lo. 25 Sikhawmsele Kei, LALPA nih sûn leh zân lakah thudân ka tuk le, ka dân siam nih tual leh vân lâi a rêl. 26 Hi ka ti mi hâwi hen ka to-aw Jakob leh David thlâk tla chu ka kilkâwi na awt. David thlâk lakah mi pakhat, Abraham, Isak leh Jakob thlâk tla tlûnah lâirêltu ding mi ka thîm awt. Ka mi tla tlûnah khua ka ruat lai le, an sul-le-lam ka tluangtir nawlh na lai,” a ti. |
Bawm Common Language Bible © Bangladesh Bible Society, 2004. All rights reserved.
Bangladesh Bible Society