JEREMIA 32 - Bawm Common Language Bible Version

Jeremia Nih Phâisen A Châwk

¹ Juda lalchem Zedekiah a lal mi kum rânâk, chu chu Babulon lalchem Nebukadnezar a lal mi kum leiriat a sinâk ber ah LALPA nih ka sinah thu a sim.

² Chu liau tak chun Babulon lalchem Nebukadnezar kawrsen tla nih Jerusalem an do le, kei lam chu lal in kulh sungah renh pang hen ka um.

³ LALPA nih, “Hi khuapi hi Babulon lalchem ka lâktir le, lalchem Zedekiah chu a suak lai lo.

⁴ Babulon lalchem sinah pêk hen a um lai; mêl leh mêl muh hen anna sâwn lai.

⁵ Zedekiah chu Babulon ah kalpi hen a um lai le, amah ka va veh lânlo chu chunah chun a um lai. Babulon mi tla chu do na menza khawmsele a neh na lai lo. Kei, LALPA nih ka sim asi,” a ti, ka ti mi ruangah lal Zedekiah nih hawng ka phiar le, chunah rêng ah hawng ka thlâk.

⁶ LALPA nih ka sinah,

⁷ “Ka patê Salum fapa Hanamel chu Benjamin ram ah Anathoth a mi a phâisen a hawng ka châwktir ding hen ka sinah a hawng awt, kei chu a taksa tlâi naih chem kasi le, ka rangah châwk kho kasi ruangah.

⁸ LALPA nih a sim mi hâwitê hen Hanamel chu kulh sungah ka sinah a hawng le, phâisen châwk ding hen hawng ka simh. Churuangah LALPA nih ka sinah a sim mi tak asi ti ka theih.

⁹ Hanamel phâisen chu ka châwk le, tangka chu ka pêk le; a man chu tangka leisarih asi.

¹⁰ Ka min chu ka rîn le, ka singsiah le, theihpitu tla kan siam le, tangka chu khinghnâk hen kan khingh rawh.

¹¹ Châwknâk lasui chu ka lâk le, singsiahnâk a banghpi dang a lâknâk leh a tidân tla, a langpâu hen siah mi a banghpi,

¹² Maaseiah tupa Neriah fapa Baruk sinah ka pêk. Hanamel leh theihpitu châwk mi lakah min rîntu leh kulh sungah totu zawzawng tla mâika ah ka pêk rawh.

¹³ Chubang tla mâika ah Baruk sinah chun,

¹⁴ “LALPA zeizawng tikho, Israel Pathian nih hi bang thilti tla châwk mi singsiahnâk leh a langân hen banghpi siah mi tla chu tual bêl ah siah ding hen thu a nan pêk, hi nûnthâi kum tam tak rangah kil asi khonâk ding hen.

¹⁵ LALPA, Zeizawng tikho, Israel Pathian nih, in tla, phâisen tla, grep zûn tla hi ram ah mi hi châwk nawlh ding asi,” a ti.

Jeremia Thlachamnâk

¹⁶ Châwknâk lasui Baruk sinah ka pêk nûn chun thla ka cham,

¹⁷ “LALPA zahkâi, nangnih tual leh vân na thilti rokual leh chaknâk hen na siam le; nang rangah chun thil zeikhawm a har tuk mi a um lo.

¹⁸ Sâng tam tak tla sinah na dâwtnâk dawnglo na zauhtir le, sikhawmsele an nu leh an pa sualnâk ruangah mi tla na rêp na. Nang chu Pathian rokual leh thiltikho tak na si; nang chu LALPA Zeizawng tikho na si.

¹⁹ Fing tak hen thilti ding na ruat le, thil rokual na ti; mikip nih thil an ti mi na muh, an thilti zia hâwi vima hen lâwmman na pêk na.

²⁰ A lân khawm ah Aigupta ram ah singsiahnâk leh thilchê tla na ti le, tusûn ni tiang khawm ah Israel ram ah leh phundang tla nâwngah na ti vima rih, churuang chun tu chun mun kip ah theih hen na um rawh.

²¹ Thilchê leh singsiahnâk hen kan mêlma tla chu na lâutir le, Aigupta ram ah na mi Israel tla chu na thiltikhonâk leh na chaknâk mang hen na suakpi na.

²² ‘An thlâktu rangah thu na tiamh na mi hâwi hen hi neihnâk leh ram ṭha hi na pêk na.

²³ Sikhawmsele hi ram an hawng kal rawh chun mun an khuar le, na thupêk tla ngâilo hen na sîntir na mi hâwi hen khawm an um lo; ti ding hen thu na pêk na mi khawm an ti lo. Churuangah hi bang hâwi siatnâk zawzawng hi an tlûnah na hawng tlungtir rawh.

²⁴ “Babulon mi tla nih lâk ding hen khuapi hêl dak hen an hual hen tualpawng tla an siam, churawhchun an do na rawh. Tuknâk leh sungvângnâk leh râi nih khuapi chu an kut ah a tlûktir. Na sim mi zawzawng chu dik tak hen a hawng tlung ti na muh.

²⁵ Sikhawmsele, LALPA zahkâi, nang chu theihpitu tla mâika ah phâisen châwk ding hen thu hawng ka pêktu na si, sikhawmsele khuapi chu Babulon mi tla nih lâk ding hen a um rawh,” a ti.

²⁶ Churawhchun, LALPA nih ka sinah,

²⁷ “Kei chu LALPA, mi zawzawng Pathian kasi. Ka rangah zeikhawm a har tuk mi a um lo.

²⁸ Hi khuapi hi Babulon lalchem Nebukadnezar leh a kawrsen sinah ka pêk awt; annih nih an lâk lai le,

²⁹ an duah lai. In tla a tlûnah Baal sinah rimthâw an duah mi leh pathian dang tla sinah uain an tawih mi hen ka thin an thawktirnâk chu an duah lai.

³⁰ A tîr thawk hen Israel mi tla leh Juda mi tla thâwngthâng nih an ka lawmhtir lo le, an thilti hen ka thin an hawng ka runhtir.

³¹ Hi khuapi mi minung tla nih hin an dirh tîr thawk hen ka thin an thawktir hen ka heh an ka hârtir.

³² Juda mi leh Jerusalem a mi tla, an lal leh ruitu tla, an bâwlpu leh an khuavâng tla hen thilsual an ti ruangah râwk ding hen ka tum rawh.

³³ Ka sîntir na lemang khawm ah an dunglei an hawng ka sît le, ka thu an ngâi hen an châwng duh lo.

³⁴ Keimah sawnhnâk ding Biakin an sak mi lakah an milem fihnungkâi tla an siah le, an nâwmtir.

³⁵ Hinnom kuamah Baal mâichâm tla an siam le, Molek pathian sinah an fanu an fapa tla bâwlnâk ah an pêk. Chubang tla ti ding hen thu ka pêk na lêm lo, chubang thil tla ti hen Juda mi tla an sualtir na ding hen khawm ka thinlung ah ka ruat lo,” a ti.

Lungumnâk Thutiam

³⁶ LALPA, Israel Pathian nih ka sinah, “Jeremia, mi nih râltuknâk leh sungvângnâk leh râi nih hi khuapi hi Babulon lalchem kut ah a tlûktir an ti. Tuah thudang ka sim ding mi hi ngâi.

³⁷ Ka thinthawknâk leh ka thinrunhnâk hen ka rekrâwitir na mi ram zawzawng thawk hen mi tla chu ka pumh na lai le, hi mun ah hin ka kîrpi nawlh na lai le, him tak hen ka umtir na lai.

³⁸ Annih chu ka mi tla an si lai le, Kei, an Pathian kasi lai.

³⁹ Dam sungah tumnâk pakhat cho ka pêk na lai le; zeiliau zawng ah an hawng ka zah ding hen, anmah leh an thlâk tla ṭhatnâk ding hen.

⁴⁰ Anmah hen zungzâl thudântuk ka siam lai. Ka lakah mi an hawng ka hertâk lo rawhnâk ding hen an rangah thil ṭha ti ka bâng lai lo, an thinlung zawzawng hen hawng ka ṭihtu ding ah ka siam na lai.

⁴¹ An rangah thil ṭha ti ding hen thinlung thawk tak hen ka ti lai le, hi ram hi luah kumza ding hen ka birhtir na lai.

⁴² “An tlûnah siatnâk ka tlungtir mi hâwi hen thil ṭha ka tiamh na mi zawzawng ka pêk na lai.

⁴³ Mi nih hi ram hi ramsa leh minung khawm umlonâk ramkaro hâwi hen an um lai le, chu chu Babulon mi tla rangah pêk asi lai ti hen an sim. Sikhawmsele hi ram ah mi phâisen tla hi veikhat chu châwk nawlh asi lai.

⁴⁴ Mi nih an châwk lai le, chu lakah an min tla an rîn lai le, an singsiah lai le, theihpitu tla an siam lai. Chu chu Benjamin ram ah mi khua tla leh Jerusalem kiangkam ah, Juda khuapi tla ah, tlângram ah mi khua tla ah, tlângbul tla leh Juda ram simlei kâng tla ah a um lai. Mi tla chu an ram ah ka umtir nawlh na lai. Kei, LALPA nih ka sim asi,” a ti.