JEREMIA 31 - Bawm Common Language Bible Version

Israel In Leiah A Kîrnâk

¹ LALPA nih, “Israel phun zawzawng Pathian ka siding mi leh ka mi tla an siding mi tik chu a tlung rawh.

² Thihnâk thawk hen suak mi tla sinah ramkaro ah khuaruatnâk ka langh.

³ Israel mi tla nih din ding an duh thlo liauah lât tak thawk hen an sinah ka langh. Israel mi tla, ka nan dâwt kumza na; churuang chun ka dâwtnâk dawnglo chu nan sinah ka langh kumza lai.

⁴ Veikhat chu ka nan dirh nawlh na lai. Veikhat chu nan khuang tla put hen lâwm hen nan lâm nawlh lai.

⁵ Veikhat chu Samaria tlângah grep nan phun nawlh lai le, a phuntu tla nih grep a rah mi chu an ei nawlh lai.

⁶ Asi, vêngtu nih Efraim tlângah, ‘LALPA, kan Pathian sinah Zion tlângah kan kâi lai, ti hen âu ding mi tik chu a tlung rawh,’ ” a ti.

⁷ LALPA nih, “Phun zawzawng lakah phun rokual chem Israel rangah lâwm hen la sak u. A vei bang, LALPA nih a mi tla ruang a suah na rawh ruangah sawrnâk la sak u.

⁸ Marlei thawk hen ka hawngpi na lai le, tual dawnghnâk ah mi chu ka pumh na lai. Mitchâw leh kekhêng tla, nunau a râi mi leh fa a ring awt mi tla anmah tla sinah an hawng bâk lai. Phun rokual tak an hawng si lai.

⁹ Ka mi tla chu ṭap bû leh thlacham bû hen ka kîrpi na lai. Tinungva leiah suih bah umlonâk lam tluang ah ka kalpi na lai. Israel tla lakah chun pa hâwi kasi le, Efraim lam chu ka fa upachem asi,” a ti.

¹⁰ LALPA nih, “Phun tla, ka thu ngâi u, ka thu tla chu tiva kap lât takah va phuang u. Ka mi tla chu ka rektir phin na le, sikhawmsele ka pumh nawlh na lai le, dawrâpu nih a dawrâ rual a vêng na mi hâwi hen ka vêng na lai.

¹¹ Israel mi tla chu an tângnâk ah mi ka suah na le, phun chak tak lakah mi ruang ka suah na.

¹² Zion tlângah an hawng kal lai le, lâwm hen la an sak lai, ka thilpêk fâng leh uain, oliv sariak, dawrâ rual leh ranrual tla lakah anna lâwm lai. Dûm tikhurchawh hen châwm mi hâwi an si lai le, an herh mi zawzawng an nei lai.

¹³ Churawhchun, nungâk tla chu lâwm hen an lâm lai le, upa, ngâksia leh tar anna lâwm lai. Annih tla chu thla ka ngamh na lai le, an ngaihsiatnâk chu lâwmnâk ah ka changtir lai le, an thinlung fâknâk chu lâwmnâk ah ka changtir lai.

¹⁴ Bâwlpu tla chu ei ding cherkhet hen ka khimtir na lai le, ka mi tla chu an thilherh zawzawng hen an lung ka âwitir na lai. Kei, LALPA nih ka sim asi,” a ti.

Israel Tlûnah LALPA Khuaruatnâk

¹⁵ LALPA nih, “Ramah ah lungfâk tak hen ṭap hâu theih hen a um. Rakil chu a fa tla an um lo rawh ruangah a ṭap le, a thla a ngam kho lo.

¹⁶ Na ṭap mi bâng le, na mitthli nâwt. Nan fa tla rangah thil nan ti mi zawng tla chu lâwmman pêk lo hen a um lai lo le, mêlma ram a mi an hawng kîr nawlh lai.

¹⁷ Nan mâilei ding mi lakah lungumnâk a um; nan fa tla in leiah an hawng kîr nawlh lai. Kei, LALPA nih ka sim asi.

¹⁸ Israel mi tla nih ngaihsiat bû hen, ‘LALPA, ramsa a ngam lo mi hâwi kan si le, sikhawmsele ê-aw ngâi ding hen na hawng kan sîntir an ti mi ka theih. Hawng kan kîrtir nawlh le, nang LALPA kan Pathian sinah kîr ding hen kanna tîm rawh.

¹⁹ Nangmah lakah mi chu kâng dang leiah kanna her le, sikhawmsele sâwtlotê ah hawng kîr ding kan duh. Na kan rêp nûn chun, lungzûr tak hen kan lû kan thlâi thlo. Kan ngâksia liauah thilsual kan ti ruangah ningzakkâi leh mualpho hen kan um,’ an ti.

²⁰ “Israel, nang chu ka fapa duh chem, ka nan dâwt chem mi na si. Na min ka sim kip ah ka nan dâwt mi ka dawn tâwn. Na sinah ka thinlung a um le; khua ka ruat lai.

²¹ Theihtirnâk siam le, lampi singsiah; na mâknâk ram ah lampi hâwl nawlh. Israel mi tla hawng kîr u, nan mâk mi khuapi tla ah nan in ah hawng tlung u.

²² Lungnâk nei lo mi tla, zeitiang riamruam me nan zenh awt? Nunau nih mipa a hum dân a dang mi hâwi hen thil zeimawh ka siam mi chu ka thartir le, ka dangtir,” a ti.

Mâilei Ah Pathian Mi Tla Sul-le-lam Tluangnâk

²³ LALPA, Zeizawng tikho, Israel Pathian nih, “Mi zapi tla an ram ah ka umtir nawlh na tikah chun, Juda ram ah leh a khuapi tla ah veikhat chu, ‘LALPA nih a umnâk mun thenhlimh Jerusalem Tlâng thenhlimh chu malsâwm seh,’ an ti nawlh lai.

²⁴ Mi tla chu Juda ram ah leh a khuapi tla ah an um lai le, chunah chun phâisen nâwntu tla leh dawrâ vêngtu an ranrual hen an um lai.

²⁵ A dî mi tla leh a sungvâng hen a uai mi tla chu buh hen ka khimtir hen ka panhlâutir na lai.

²⁶ Chu tikah mi le tla nih, ‘Ka it le, panh ver hen ka thawk,’ an ti lai.

²⁷ Kei, LALPA nih, Israel ram leh Juda ram chu mi zapi leh ran tla hen ka khattir na awt ka ti mi tik chu a tlung rawh.

²⁸ Phâwi hen, siat phin hen, lawnh ving hen, veih ving hen, râwk dep na ding ka tum thlir na mi hâwi hen, anmah phun ding leh dirh ding ka tum thlir awt.

²⁹ Chu chu a hawng tlung tik chun mi tla nih, ‘Nu leh pa tla nih grep rah thur an ei le, Sikhawmsele an fa tla nih a thur, an ti lai lo rawh.

³⁰ Chu ngâk hen âuzawng grep rah thur eitu nih a hâ pârtê hen a chih le, mikip mah sual ruangah a thi lai,” a ti.

³¹ LALPA nih “Israel mi leh Juda tla hen thudântuknâk ka siam ding mi tik chu a tlung rawh.

³² A lânah anmah thlâktu tla sinah thudântuk li ka siam le, kut hen ka tleih na le, Aigupta mi ka suakpi na liau mi hâwi asi lai lo rawh. Kei chu an lakah pasal hâwi kasi khawm ah, annih nih chun thudântuk chu an zûl lo.

³³ Israel mi tla hen thudântuk thar ka siam mi chu hi hi asi lai: An sungah ka dân tla ka siah lai le, an thinlung ah ka rîn lai. Kei, an Pathian kasi lai le, annih chu ka mi le an si lai.

³⁴ A mêchem thawk hen a lianchem mi nih an ka theih awt ruangah, ram lakah mi âukhawm nih LALPA theih ding hen an hâwi le tla sîntir an herh lai lo rawh. An sual tla ka ngaihdam na lai le, an thilsual ti khawm ka theihkumza lai lo rawh. Kei, LALPA nih ka sim asi,” a ti.

³⁵ LALPA nih sûn ah cherhtu rang ding ah nî a pêk le, zân cherhtu rangah thlâ leh ârfi a pêk. Tipi tla a chawk le, hâu a suaktir; a min chu LALPA Zeizawng tikho asi.

³⁶ Laikulh thupêk a um kar zawng chu Israel phun khawm a um lai ti hen thu a tiamh.

³⁷ Vân chu ni khat ah tah kho asi hen, tual lungphûm chu zauhfiang asi tik cho ah an thilti zawzawng ruangah Israel mi tla chu nawng an si lai LALPA nih a sim asi.

³⁸ LALPA nih, “Jerusalem ka khuapi an dirh nawlh tikah thlanglei mi Hananel Insâng thawk hen in ki mi kulh kawtkâ tiang asi lai.

³⁹ Ramri chu thlanglei kângah chu mun thawk chun Gareb tlâng leh Goah kiangkam tiang asi lai.

⁴⁰ Mithi ruak vûinâk leh nâwmtâm lawnhnâk tivakuam ram zawzawng leh Kidron tiva tlûnlei mi phâisen zawzawng saklei kângah rang kawtkâ tiang hen, ka rangah mun thenhlimh asi lai. Khuapi chu siat leh râwk hen a um lai lo rawh,” a ti.