JEREMIA 3 - Bawm Common Language Bible Version

Israel Zumhkâilo

¹ LALPA nih, “Mi nih nupi a mâk hen, amah a kaltâk nûnah midang nupi asi rawh chun a lâk nawlh kho lai lo rawh. Chu nih chun ram chu a nawmh dep lai. Sikhawmsele, Israel, duh mi tam tak na nei le, tuah ka sinah hawng kîr ding na duh!

² Tlâng tlûn tla khi zauhnik. Nunau â zuar mi hâwi hen na ti lonâk mun rerêng a um ma? Arab mi nih ramkaro ah mi thah ding an bawh mi hâwi hen lamvâu ah na duh mi tla na bawh vima na. Na zuarnâk hen ram chu na nâwmtir.

³ Churuangah asi, ruah sûrlo hen fûr a tla lonâk chu. Nang chu nunau â zuar mi na bangh le; ningzaknâk na nei lo.

⁴ “Chun tuah, ka sinah, ‘Nang chu ka pa na si le, ka ngâksiatê thawk hen na ka dâwt.

⁵ Na thinthawk kumza lai lo rawh; ka lakah kalh hen na um kumza lai lo rawh,’ na ti. Israel chu hâwi hen thu na sim le, sikhawmsele thilsual na ti ding mi chu na ti nget,” a ti.

Israel Leh Juda Chu An Rim Ding Asi

⁶ Josia a lal liauah LALPA nih ka sinah, “Israel, nunau zumhkâilo nih thil a ti mi khi na muh ma? Ka lakah mi hawng ka hawitâk le, tlâng sâng kip leh thing ring tangah nunau â zuar mi hâwi hen thil a ti.

⁷ Chubang hâwi a ti nûnah chun ka sinah a hawng kîr nawlh ding ka ruat. Sikhawmsele a hawng kîr lo le, a unaunu zumhkâilo Juda nih a muh hep.

⁸ Israel chu hawng ka hawitâk hen nunau â zuar mi asi rawh ruangah ka mâk le, ka nar ving mi Juda khawm nih a muh. Sikhawmsele Juda, Israel zumhkâilo unaunu nih a ṭih lo thlo. Amah khawm â zuar le,

⁹ ningzak theihlo thlo hen a um. Lung leh thing sawnh hen ṭângdang a pawm le, ram a nâwmtir.

¹⁰ Hi bang zawzawng nûnah, Juda, Israel zumhkâilo unaunu chu ka sinah hawng kîr ding a tum salam mi cho asi le; zumh a kâi lo. Kei, LALPA nih ka sim asi,” a ti.

¹¹ LALPA nih ka sinah, Israel nih hawng ka hawitâk menza khawmsele, Juda zumh a kâi lo mi ngâk hen chun a ṭha dauh hen a lang.

¹² Israel sinah kal hen thu va sim ding hen hawng ka simh, “Zumhkâilo Israel, ka sinah hawng kîr rawh. Kei chu mi khuaruat mi kasi, ka thin a run lai lo; na lakah ka thinrun kumza ding asi lo.

¹³ Na sual mi leh LALPA na Pathian lakah na hel mi chu a pêk lam a pêk ko. Thing ring tang kip ah ramdang pathian tla sinah na dâwtnâk na pêk mi leh ka thupêk na ngâilo mi chu thutluang vâwr rawh. Kei, LALPA nih ka sim asi.

¹⁴ “Mi zumhkâilo tla, hawng kîr u; ka tâ nan si. Khuapi kip ah mi pakhat vima leh chi kip ah mi panih vima kan lâk na lai le, Zion Tlângah ka nan kîrpi na lai.

¹⁵ Ka lakah ê-aw ngâi mi lâirêltu tla ka nan pêk na lai le, finghnâk leh theihthiamnâk hen lâi an rêl piak na lai.

¹⁶ Churawhchun, chu ram ah nan tam rawh chun, mi tla nih ka Thudântuk Bâwm thu an sim lai lo rawh. A dawn khawm an dawn lai lo, a theih khawm an theih lai lo; a herh khawm an herh lai lo le, a dang khawm an siam lai lo.

¹⁷ Chu tik chu a hawng tlung chun, Jerusalem chu, ‘LALPA laltophah’ an ti lai le, chunah chun phun zawzawng tla hawng ka sawnh ding hen anna pûm lai. An lungkhung thil an ti lai lo rawh le, thinlung sual thu an sim lai lo rawh.

¹⁸ Israel leh Juda chu anna fawnh lai le, munkhat hen marlei ram thawk hen sal ah tâng mi an hawng kal lai le, an thlâktu tla sinah ting pawt ding hen ka pêk na mi ram ah an hawng kîr lai,” a ti.

Pathian Mi Tla Milem Sawnhnâk

¹⁹ LALPA nih, “Israel, ka fapa hâwi hen an nei ding ka nan duh le, Ram duhkâi tak, laikulh pumpi ah ram dawh chem ka nan pêk. Ka sinah mi kâng dangah a hawi lo rawh ding hen Pa ah na ka ruat ding hen ka nan duh.

²⁰ Sikhawmsele, nupi zumhkâilo hâwi hen, ka lakah zumhkâilo hen na um. Kei, LALPA nih ka sim asi,” a ti.

²¹ Tlâng tlûnah hâu theih hen a um: Israel mi tla nih LALPA an Pathian philh hen sual tak hen an um ruangah ṭap hen an ngiar mi asi.

²² Kâng dang leiah LALPA hertâktu zawzawng, hawng kîr u; a nan damh na lai le, zumhkâi hen a nan siam na lai. Nannih nih, “Asi, kan Pathian asi ruangah LALPA sinah kan hawng.

²³ Tlâng tlûnah lunglo pathian kan sawnh mi nih hawng kan ṭangpi lo thlo. Israel rangah ṭangpinâk chu LALPA thawk hen cho a hawng kal.

²⁴ Sikhawmsele, Baal, ningzaknâk pathian kan sawnh mi ruangah kan ran leh ranrual tla, kan fapa leh kan fanu tla, thil zeizawng hawng kan thlâktu nih a lânah an ṭuan mi tla hawng kan veih phahtir ver.

²⁵ Ningzak hen kan rîl thlo lai le, kan ningzaknâk nih hawng kan khuh seh. Kan thlâktu leh kanmah khawm LALPA kan Pathian lakah kan sual kumza; a thupêk khawm kan ngâi dahlo,” nan ti.