JEREMIA 26 - Bawm Common Language Bible Version

A Thurêl Ding Hen Jeremia An Hawngpi

¹ Josiah fapa Jehoiakim Juda lalchem asi mi hun sâwtlotê ah, LALPA nih ka sinah,

² “Zapi minung Juda khuapi thawk hen chunah Pathian sawnh ding hen hawng mi tla sinah, sim ding hen thu ka nan pêk mi zawzawng Biakin kulh sungah va dîr le, phuang rawh. Zeikhawm relh lah.

³ Mi nih an ngâi hen an umdân an lêt lai rawh. An lêt mi asi chun, an thilsual ti zawzawng ruangah siatnâk an tlûnah tlungtir ding ka tum mi thu ah ka thinlung ka lêt lai,” a ti.

⁴ LALPA nih mi zapi sinah thusim ding hen hawng ka simh, “Kei, LALPA nih, ka sîntirnâk thu ka nan pêk na mi zûl hen leh

⁵ ka to-aw khuavâng tla nan sinah ka hawng fial lemang na mi thu ngâi hen ka thu nan zûl ding asi. An thusim nan zûl dahlo.

⁶ Ka thu nan ngâilo nget mi asi chun, hi Biakin hi Siloh ah ka ti mi hâwi hen ka ti lai le, laikulh phun zawzawng nih a min ah siatbarh mi khuapi an ti lai,” a ti.

⁷ Hi bang thu zawzawng Biakin ah ka sim mi tla chu bâwlpu tla leh khuavâng tla leh mi zapi zawzawng nih an theih le,

⁸ LALPA nih sim ding hen thu hawng ka pêk mi ka sim lîm kâ hen an ka tleih le, an âu, “Hi ruang hin nang chu thah ding mi na si!

⁹ Zei rangah hi Biakin hi LALPA min hen Siloh hâwi asi lai le, khuapi khawm a râwk lai le, a sungah pakhat khawm an um lai lo, na ti zia?” an ti. Churawhchun, zapi minung tla chu ka kiang an hawng khat zat.

¹⁰ Juda ruitu tla nih chu hâwi thil a hawng um mi an theih rawh chun, lal in ah mi chu mawhsareh hen Biakin ah an hawng kal le, Kulh Kawtkâ Thar mun an hawng luah.

¹¹ Churawhchun, bâwlpu leh khuavâng tla nih ruitu tla leh zapi tla sinah, “Hi minung nih hin kan khuapi râwk ding hen a sim ruangah thi tlâk asi. Nanmah nâ ngelchel hen nan theih,” an ti.

¹² Churawhchun, kei nih, “Hi Biakin leh hi khuapi râwk ding hen thu ka sim mi nan theih mi chu LALPA nih sim ding hen hawng ka fial mi asi.

¹³ Nan umdân tla, thil nan ti mi tla nan lêt hen LALPA nan Pathian lakah ê-aw nan ngâi ding asi. Chu hâwi nan ti mi asi chun, nan tlûnah siatnâk ka hawng tlungtir awt a ti mi thu ah a thinlung a lêt lai.

¹⁴ Kei lam chu nanmah thu thu hen ka um! Dik leh ṭha nan ti zia zawng hen hawng ka ti ko u.

¹⁵ Sikhawmsele hi hi theih u: hi simhkannâk hi an pêk na ding hen LALPA nih hawng ka fial mi asi ruangah nan ka thah mi asi chun, nannih leh hi khuapi ah um mi tla chu sual nei lo mi thahtu misual nan si lai,” a ti.

¹⁶ Churawhchun, ruitu leh zapi tla nih, bâwlpu leh khuavâng tla sinah, “Hi minung hi LALPA kan Pathian min hen kan sinah thu a sim ruangah thah ding asi lo,” an ti.

¹⁷ Churawhchun, upa lakah zeimaw mi tla an dîr le, mi zapi an hawng a pûm mi tla sinah,

¹⁸ “Hezekiah Juda lalchem asi liauah, Moreseth ah mi khuavâng Mikah nih LALPA Zeizawng tikho thusim chu zapi tla sinah a sim, ‘Zion chu phâisen nâwn mi hâwi asi lai le, Jerusalem chu thilsia pawng mi asi lai le, Biakin tlâng chu thingmun asi lai,’ a ti.

¹⁹ Lalchem Hezekiah leh Juda mi tla nih Mikah chu an thah lo. Chu ngâk hen Hezekiah nih LALPA chu a ṭih le, dâwt lawh hen a um. LALPA nih an tlûnah siatnâk ka hawng tlungtir awt ti hen a sim mi chu a lêt rawh. Tu hin mah lakah siatnâk lam kan tlungtir awt,” an ti.

²⁰ (Minung pakhat dang, Keriath Jearim ah mi Semaiah fapa Uriah a um le, LALPA min hen khuapi leh phun tla râwk ding mi thu Jeremia hâwitê hen simtu a um.

²¹ Lalchem Jehoiakim leh a kawrsen tla leh a rianṭuantu tla nih Uriah thusim chu an theih le, lalchem nih thah ding a awt. Sikhawmsele Uriah nih chu chu a theih le, a ṭih ruangah a tek le, Aigupta ah a kal ving.

²² Lalchem Jehoiakim nih Akbor fapa Elnathan leh midang tla Uriah tleih ding hen Aigupta ah a fial na.

²³ Lalchem Jehoiakim sinah an hawngpi le, anih nih chun a thah le, zatlâng vûinâk mun ah a ruak chu an lawnh.)

²⁴ Sikhawmsele, ṭangpitu Saphan fapa Ahikam ka nei ruangah zapi tla sinah pêk hen thah hen ka um lo.