JEREMIA 25 - Bawm Common Language Bible Version

Marlei Mi Mêlma

¹ Juda lalchem Josiah fapa Jehoiakim a lal mi a kum linâkah, Juda mi thu ah LALPA thawk hen thuchah ka tawng. (Chu chu Babulon lalchem Nebukadnezar a lal tîr kum asi.)

² Juda leh Jerusalem mi zawzawng sinah,

³ “Amon fapa Juda lalchem Josiah a lal mi kum leithum thawk hen kum kul leh kum thum tusûn ni tiang hen LALPA nih ka sinah thu a sim mi chu pakhat khawm relhlo hen kan simh hep na. Sikhawmsele nan ngâi duh lo.

⁴ LALPA nih a to-aw khuavâng tla hawng fial vima khawmsele an thu nan ngâi hen nan âwva lai lo.

⁵ Nan umdân sual leh nan thilsual ti bâng ding hen a nan simh na. LALPA nih nanmah leh an thlâk natu tla nih ting pawt ding hen a nan pêk na mi ram ah nan um kumza khonâk ding hen.

⁶ Pathian dang tla sawnh leh a rianṭuan lo ding leh milem nan siam mi tla sawnh hen LALPA thin nan thawktir lo ding hen a nan simh na. LALPA thu ngâi ule chu, a nan rêp na lo ding mi.

⁷ Sikhawmsele, LALPA amah tak nih a thu nan ngâi duh lo mi a sim. Chu ngâk hen milem siam hen a thin nan runhtir le, a nan rêp na nâk chu nanmah nih nan tlûnah nan tlungtir.

⁸ “Churawhchun, a thu nan ngâi duh lo ruangah, LALPA Zeizawng tikho nih,

⁹ ‘Marlei mi minung tla zawzawng leh ka to-aw Babulon lalchem Nebukadnezar ka fial na awt. Juda leh a ram sungah mi tla leh a kiangkam ah mi phun zawzawng tla do ding hen ka hawngpi na awt. Hi phun tla leh a kiangkam ah mi tla ka râwk na lai le, sia dep hen ka mâk na lai le, ṭihnungkâi leh lâu khit ding hen a um lai. Kei, LALPA nih ka sim asi.

¹⁰ An lâwptlonâk leh lâwmnâk hâu leh nupi puai lakah lâwmnâk hâu tla ka rehtir lai. An meichêu rangah a hâng an nei lai lo le, fâng khawm a um lai lo rawh.

¹¹ Hi ram pumpi hi râwk dep hen leh lâu kâi rê hen an mâk lai le, a kiangkam ah phun tla nih Babulon lalchem chu kum sâwmsarih a rian an ṭuan piak lai.

¹² Chu nûnah Babulon mi leh an lalchem chu an sualnâk ruangah ka rêp na awt. Chu ram chu ka râwk lai le, sia dep hen ka kaltâk lai rawh.

¹³ Babulon mi tla chu hi lasuibu ah siatnâk zawzawng rîn mi Jeremia mang hen ka sim mi tla chu phun tla ka ṭhih na mi siatnâk zawzawng hen ka rêp na awt.

¹⁴ Babulon mi tla chu thil a ti mi lehrûl ka sam lai le, phun zawzawng tla leh lal rokual tla nih sal ah an mang na lai,’ ” a ti.

Phun Tla Tlûnah Pathian Lâirêlnâk

¹⁵ LALPA, Israel Pathian nih ka sinah, “Hinah ka thinthawknâk hen a khat mi uain hâi a um. Ka nan fialnâk phun zawzawng tla sinah kal le, hi lakah mi hi dintir na.

¹⁶ An din tik chun, râltuknâk an lakah ka tlungtir awt ruangah, an thinlung a â lai le, an hâwr lai,” a ti.

¹⁷ Churawhchun, LALPA kut ah mi hâi chu ka lâk le, LALPA nih hawng ka fialnâk phun tla chu ka pêk na le, ka dintir na.

¹⁸ Jerusalem leh Juda khuapi zawzawng tla an lalchem tla leh ruitu tla hen chu lakah mi chu dintir an si, siat leh râwk hen ṭihnungkâi leh lâu rê ding leh an thilti liau mi min put hen mi nih siatbarh mi tla an tinâk ding hen.

^19-26 Hi hi hâi lakah mi dintu ding tla dang zawzawng rîn mi chu an si: Aigupta lalchem, a rianṭuantu tla leh ruitu tla; Aigupta mi zawzawng leh ramdang mi zawzawng Aigupta ah um mi; Uz ram ah mi lalchem zawzawng; Philistia khuapi, Askelon, Gaza, Ekron leh Asdod ah mi lalchem zawzawng; Edom, Moab leh Amon mi zawzawng tla; Tura leh Sidon lalchem tla zawzawng; Mediteranian ram ah mi, Dedan, Tema leh Buz khuapi mi lalchem zawzawng; an sam tan mi tla zawzawng; Arabia lalchem zawzawng; Ramkaro mi phun lalchem zawzawng; Zimri, Elam leh Media lalchem zawzawng; Marlei mi lalchem tla a lâ leh a nâinâk ah mi, a sang vima hen. Phunkip tual tlûnah mi nih chu lakah mi chu din ding asi. A dawnghchemnâk ah chu lakah mi chu Babulon lal nih a din lai.

²⁷ Churawhchun, LALPA nih ka sinah, “Kei, LALPA Zeizawng tikho, Israel Pathian nih an lakah râltuknâk ka tlungtir awt mi ruangah, an rî le luak hen, an tlû hen thawk kho lo rê tiang hen din ding hen ka pêk na ti simh na.

²⁸ Na kut lakah mi hâi lâk hen din ding an duh lo chun, hi hâi lakah mi hi nan din ngelchel ding asi, LALPA, Zeizawng tikho nih a ti ti hen simh na.

²⁹ Keimah khuapi thawk hen ka râwknâk rian chu ka dawmh awt. Rêp lo hen suak ding ma anna ruat? Si rilmâl lo, rêp an si ngelchel lai, tual tlûnah mi zawzawng tlûnah râltuknâk ka tlungtir awt ruangah. Kei, LALPA Zeizawng tikho nih ka sim asi.

³⁰ “Jeremia, thu ka sim mi zawzawng na va phuang ding asi. Mi tla chu na simh na ding asi: ‘LALPA chu vân thawk hen a hâu a suah lai le, vân sâng thawk hen khua a hawng rî lai. A mi tla tlûnah a hâu a suah lai le; grep sûrtu tla hâwi hen a âu lai. Tual tlûnah mi zawzawng nih an theih lai,

³¹ tual dawngh tiang hen a rî hâu a thangkhâwk lai. LALPA nih phun tla lakah thunawk a nei. Mi zawzawng chu a nik na lai le, misual tla chu a thah na lai. LALPA nih a sim asi,’ ” a ti.

³² LALPA Zeizawng tikho nih chun siatnâk chu phun tla lakah pakhat khat hen a hawng tlungtir lai le, tual khatlei dawnghnâk ah thlipi rokual tak â tîm ti a sim.

³³ Chu ni ah chun LALPA nih a thah na mi chu tual khatlei dawngnâk thawk hen khatlei tiang rek thu hen anna vawrh phut lai. Âukhawm nih an ulh na lai lo le, an lâk hen an vûi na lai lo. Tual churnâk pawng hâwi hen tual tlûnah an rîl phut lai.

³⁴ Nannih ruitu tla, ṭap u, nannih ka mi vêngtu tla, hâu fâk hen ṭap u! Ulh ule, valei lakah rîl u. Nanmah an thah na ding mi tik a tlung rawh, dawrâ chal tla hâwi hen thah nan si lai.

³⁵ Nan rangah suaknâk lampi a um lai lo.

^36-37 LALPA nih a thinthawknâk hen nan phun tla a râwk ruangah leh thlangam hen nan umnâk ram chu râwk hen mâk asi ruangah, nan rûm le, lungfâk tak hen nan ṭap.

³⁸ Chakeibaknei nih a pûk a kaltâk mi hâwi hen, LALPA nih a mi tla chu a kaltâk na rawh. LALPA thinthawknâk leh râltuk ṭihnungkâi nih nan ram chu ramkaro ah a siam.