JEREMIA 24 - Bawm Common Language Bible Version

Theipi Bâwm Panih

¹ LALPA nih Biakin tualmâi ah siah mi theipi bâwm panih hawng ka zauhtir. (Chu chu Babulon lalchem Nebukadnezar nih Jehoiakim fapa Juda lalchem Jehoiakin, Jerusalem ah mi Babulon leiah Juda ruitu tla, mi zungthiam leh rianṭuan thiam tla hen munkhat hen an sal ah a kalpi na nûnah mi asi.)

² Bâwm pakhatnâk chu theipi ṭha a min masa mi siahnâk asi, pakhat dang chu theipi ṭhalo ei ding ah a tlâklo mi siahnâk asi.

³ Churawhchun, LALPA nih ka sinah, “Jeremia, zei na muh?” a ti. Kei nih ka sâng le, “Theipi tla, a ṭha mi chu thungâi a ṭha le, a ṭhalo mi chu ei ding ah a ṭhalo mi,” ka ti.

⁴ Churawhchun, LALPA nih ka sinah,

⁵ “Kei, LALPA, Israel Pathian nih Babulon sal ah put hen um mi tla chu theipi ṭha hâwi hen ka ngaih na le, ṭhadektê hen ka ti na awt.

⁶ Ka vêng na lai le, hi ram ah hin ka kîrpi nawlh na lai. Ka dirh nawlh na lai le, ka siat nawlh na lai lo; ka phun na lai le, ka phâwi na awtlo.

⁷ Kei, LALPA kasi ti theih ding duhnâk ka pêk na lai. Churawhchun, ka sinah an thinlung zawzawng hen an hawng kîr awt rawh ruangah annih chu ka mi le an si lai le, Kei, an Pathian kasi lai.

⁸ “Juda lalchem Zedekiah chu a kiangkam ah mi thu thiam tla leh hi ram ah Jerusalem ah um mi mawh Aigupta ram ah kal mi tla lakah um rih mi tla chu Kei, LALPA nih theipi ei ding hen a sia tuktarâi mi hâwi hen ka ti na awt.

⁹ An tlûnah chubang hâwi rêpnâk chu ka tlungtir lai le, laikulh ah phun kip tla an lâu lai. Mi nih an nihsanh na lai le, an pangpi na lai le, an tluktlak na lai, ka rekrâwi na mi mun kip ah an min ah siatbarh mi an ti na lai.

¹⁰ Anmah leh an thlâktu tla ka pêk na mi ram lakah mi chu pakhat khawm âwl lo ding hen an tlûnah donâk, pâmnâk leh râi ka tlungtir lai,” a ti.