JEREMIA 23 - Bawm Common Language Bible Version

Mâilei Rang Lungumnâk

¹ Lâirêltu tla, a mi tla veihtu leh rektirtu tla tlûnah LALPA lâirêlnâk chu a fâk awt chiam e!

² LALPA Israel Pathian nih a mi tla zauhkhenhtu ah lâirêltu a ruat na mi thu a sim mi chu hi hi asi: “Ka mi tla chu nan zauhkhenh na lo le; nan rekrâwitir na hen nan nar phin na. Tuah thilsual nan ti mi ruangah kan rêp na awt.

³ Ka mi tla ka rekrâwitir na mi ram thawk hen a um rih mi tla vial chu ka pumh na lai le, anmah ram leiah ka kîrpi nawlh na lai. Fa tam tak an nei lai le, cherkhet an zan lai.

⁴ Anmah zauhkhenhtu ding hen lâirêltu tla ka ruat lai. Ka mi tla chu an ningṭih hen an lâu lai lo rawh le, rêp khawm ka rêp nawlh na lai lo rawh. Kei, LALPA nih ka sim asi,” a ti.

⁵ LALPA nih, “David thlâk rep tak lakah mi lalchem ka thîm ding mi tik chu a tlung rawh. Chu lal nih chun fing tak hen lâi a rêl lai le, dik tak leh rep tak hen ram pumpi ah thil a ti lai.

⁶ Lalchem asi tikah Juda mi tla chu him tak hen an um lai le, Israel mi tla chu thlangam tak hen an um lai. Anih chu ‘LALPA kan Ruangsuahnâk’ mawh ‘Lalpa kan repnak’ ti asi lai.

⁷ LALPA nih, “Pathian nung, Aigupta ram ah mi Israel tla suakpitu keimah min sâl hen thu anna tiam lo rawh ding mi tik chu a tlung rawh.

⁸ Chu ngâk chun, Pathian nung, Israel mi tla marlei ram ah mi leh ram dang dangah rekrâwi hen um mi tla suakpitu keimah min hen thu anna tiam lehlam lai rawh. Churawhchun, anmah ram ah an um lai rawh,” a ti.

Khuavâng Tla Ruangah Jeremia Thuchah

⁹ Ka thinlung â râwk le, ka thir LALPA ruangah, a thu thenhlimh ruangah, uain a din tam tuk le, a rî mi hâwi kasi.

¹⁰ Ram chu LALPA lakah mi zumhkâilo tla hen a khat; sual tak hen an um le, an thiltikhonâk khawm an mang diklo. LALPA siatbarhnâk ruangah ram nih a tuar le, ram ningno tla khawm a châr hep.

¹¹ LALPA nih, “Khuavâng leh bâwlpu tla khawm pathian nei lo mi an si; Pathian Biakin takah thilsual an ti mi ka tleih na.

¹² An kalnâk lampi chu a nâl hen a mûi lai; suih leh bah hen ka siam na lai. An lakah siatnâk ka tlungtir awt; an rangah rêpnâk tik a hawng tlung rawh. Kei, LALPA nih ka sim asi.

¹³ Samaria khuavâng tla sualnâk chu ka muh: Baal min hen thu an sim le, ka mi tla chu an vâipi na.

¹⁴ Sikhawmsele, Jerusalem khuavâng bilik nih an sual khun mi ka muh: ṭângdang pawmtâk hen âwkrâwl thu tla an sim; thil diklo ti ding hen mi tla an ṭangpi na, Mi âukhawm nih thilsual ti an bâng lonâk ding hen. Kei rangah an ṭhatlo zia chu an ektê hen Sodom leh Gomorah mi tla hâwi hen an ṭhalo.

¹⁵ “Churuang chun, hi hi Kei, LALPA Zeizawng tikho nih Jerusalem ah khuavâng tla thu ka sim mi chu asi: Ram pumpi ah Pathian sunhsaklo hen umnâk an zanhtir ruangah, annah khâ ei ding leh tûr din ding ka pêk na lai,” a ti.

¹⁶ LALPA Zeizawng tikho nih Jerusalem mi tla sinah, “Khuavâng thusim ngâi lah u; lungumnâk diklo hen an khattir na lai. Keimah thusim silo hen anmah thinlung thu an simh na mi asi.

¹⁷ Ka thu sim ngâi duhlotu tla sinah, nan lakah zeizawng â rêlkhâwng vima lai an ti na. Mi lungkhung tla sin kip ah siatnâk nih a nan tawngh lai loh,” ti hen an simh na.

¹⁸ Kei nih, “Hi bang khuavâng tla lakah pakhat khawm nih LALPA nih a thuptê hen a ruat mi an theih dahlo. Pakhat khawm nih a thuchah an theih hen an theihthiam dahlo, a sim mi thu lakah an nâ an thlîr hen an ngâi duh lo.

¹⁹ A thinrunhnâk thlipi leh ruahpi chu misual le lû tlûnah a hawng râng lai,

²⁰ ti ding hen a tum mi a lîm lânlo chu a bâng lai lo. Ni a hawng tlung ding mi lakah a mi tla nih fiang tak hen hi hi an theih lai rawh,” ka ti.

²¹ LALPA nih, “Chubang khuavâng tla chu kei nih ka fial na lo, sikhawmsele an kal. Zei thu khawm ka chah na lo, sikhawmsele ka min hen thu an sim.

²² Ka dawn mi thil thup theih na mi sele chu ka thuchah zapi sinah an phuang lai le, an thilsual ti tla lêt hen an umdân diklo tla an bângtâk lai.

²³ “Kei chu mun kip ah um mi Pathian kasi le, munkhat ko ah um mi kasi lo.

²⁴ Ka muh kho lo ding hen âukhawm anna thup kho lo. Tual leh vân mun kip ah ka um ti nan theih lo ma?

²⁵ Khuavâng tla nih ka min hen âwkrâwl thu an sim le, an mang leiah thuchah ka pêk na mi ti hen an sim.

²⁶ Zei tiang riamruam me hi khuavâng tla nih hin ka mi le tla chu an phuak sawm mi âwkrâwl thu hen mahlo leikângah an kalpi na awt?

²⁷ An mang thu an sim mi hen ka mi le tla nih an pa tla nih an hawng ka philh hen, Baal leikângah an hawng ka hertâk mi hâwi hen an hawng ka philh dep ding hen an ruat.

²⁸ Khuavâng mang nei mi chu mang rarâu ko asi ti hen a sim ding asi, sikhawmsele ka thu theihtu khuavâng lam chu thuchah zumhkâi tak hen a phuang lai. Fapawn leh fâng tahkhiat hen zei mi a ṭha dauh?

²⁹ Ka thuchah chu mei leh tukboh lung neknâk hâwi asi.

³⁰ Chubang khuavâng midang thu lâk hen keimah thuchah hâwi hen simtu chu ka do na asi.

³¹ Chubang khuavâng tla mah thu sim hen, keimah thawk hen mi hâwi hen simtu khawm chu ka do na asi.

³² Kei, LAPA nih ka sim mi hi ngâi rawh! Âwkrâwl karo hen an mang thu simtu khuavâng chu ka do asi. Anna zûmnâk leh âwkrâwl thu hen ka mi tla chu chubang mang thu tla sim hen mahlo leiah an kalpi na. Kei nih kal ding hen ka fial na hen thu ka pêk na mi asi lo, ka mi tla rangah ṭangpitu an si lêm lo. Kei, LALPA nih ka sim asi,” a ti.

LALPA Thilrit

³³ LALPA nih ka sinah, “Jeremia, ka mi tla lakah minung pakhat nih mawh, khuavâng nih mawh bâwlpu nih mawh, ‘LALPA thuchah chu zei me si?’ ti hen a nan deih chun, ‘Nang hi LALPA lakah thilrit na si, a lakah mi a nan lawnh awt’ ti hen na simh ding asi.

³⁴ Ka mi lakah pakhat nih mawh, khuavâng nih mawh, bâwlpu nih mawh ‘LALPA thilrit’ ti thu a mang chun, amah leh a dâwngsung chu ka rêp na awt.

³⁵ Chu ngâk chun mikip nih a hâwi tla mawh a unau tla mawh sinah, ‘A sângnâk ah LALPA nih zei a ti? LALPA nih zei a sim?’ an ti lehlam ding asi.

³⁶ Churuangah ‘LALPA thilrit’ ti thu an mang ding asi lo rawh, a san chu âuzawng nih a ti mi asi chun ka thuchah chu a sinah thilrit takah ka siam lai. Mi nih an Pathian, Pathian nung, LALPA Zeizawng tikho thu chu an râwk.

³⁷ Jeremia nih, khuavâng tla chu, LALPA nih zei hâwi hen an sâng na ne? LALPA nih zei a ti?’ ti hen deih na.

³⁸ Ka thupêk an ngâilo hen ‘LALPA thilrit’ ti thu an mang chun,

³⁹ ka thur ving na lai le, anmah leh an thlâktu tla sinah ka pêk na mi khuapi chu ka sinah mi lât takah ka lawnh ving awt.

⁴⁰ An tlûnah zungzâl ningzaknâk leh mualphonâk philh lo rawh ding mi ka tlungtir lai, ti hen simh na,” a ti.