JEREMIA 22 - Bawm Common Language Bible Version

Juda Lal Dâwngsung Sinah Jeremia Thuchah

^1-2 LALPA nih Juda lalchem David thlâk in ah va kal hen a lalchem leh rianṭuantu tla leh Jerusalem mi tla chu LALPA thusim ngâi ding hen simh na hawng ka ti:

³ “Repnâk leh diknâk ti ding hen, Kei, LALPA nih thu ka nan pêk na asi. Mi perpê nih a perpet mi chu hum rawh. Ramdang mi, mi ngâkṭah, numei tla nehsawh lah na; hi mun thenhlimh ah hin sualnâk nei lo mi tla thah lah na.

⁴ Ka thupêk ziatê hen thil nan ti chun David thlâk lal sinâk chu a um vima lai. An rianṭuantu tla leh an mi tla nih hi lal kawtkâ lakah hin kari leh rang tlûnah chuan hen an lût hen an lan lai.

⁵ Sikhawmsele ka thupêk nan zûl lo mi asi chun, hi lal in hi râwk ding hen thu ka nan tiamh na asi. Kei, LALPA nih ka sim asi.

⁶ “Juda lal in chu kei rangah chun Gilead ram leh Lebanon Tlâng hâwi hen â dawh le; sikhawmsele ram lâwng âukhawm umlonâk mun ah ka siam awt.

⁷ Râwktu ding hen mi tla ka fial na. An reitlung tla an hawng put lai le, sidar thing phun dawh tak tla chu an hâu lai le, mei ah an paih lai.

⁸ “Chu nûnah chun, ramdang mi tam tak nih an pal lai le, zei zia me si hi khuapi rokual lakah LALPA nih hi bang hâwi thil a ti aw ti hen anna deih lai.

⁹ Churawhchun, nan Pathian sinah nan thudântuk nan kal tâk hen pathian dang tla sawnh hen a rian nan ṭuan ruangah asi ti hen an sâng lai,” a ti.

Joahaz Ruangah Jeremia Thuchah

¹⁰ Juda mi tla, lalchem Josiah chu ṭappi lah ule, a thihnâk khawm ulh lah u. Sikhawmsele a fapa Joahaz an kalpi ving mi hawng kîr lo rawh hen, a suaknâk ram muh lo rawh ding mi rangah lungfâk tak hen ṭap u.

¹¹ LALPA nih chun Juda lalchem Josiah fapa Joahaz, a pa ruangrûl ah Juda lalchem si mi thu a sim, “Hinah mi kîr lo rawh ding hen a kal ving rawh.

¹² An kalpinâk ram ah a thi lai le, hi ram hi a muh nawlh lai lo rawh,” a ti.

Jehoiakim Thu Ruangah Jeremia Thuchah

¹³ Diklo tak hen a in saktu leh zumhkâilo hen kâutirtu; a ram mi minung an rianṭuan man pêk lo hen zeikhawm lo hen rianṭuantirtu chu a vânduai asi.

¹⁴ “In rokual tak, a tlûn chuanh kardang sung tatak tla siam hen ka sak lai” titu chu a vânduai asi. A in chu langawtkawt tla a siam le, sidar thing hen a thuamh le, rawng sen a buaih.

¹⁵ Sidar thing hen in na sak hen, in dang ngâk hen dawh dauh hen a um mi nih lal ṭha dauh ah a nan siam ma? Na pa chu a san tlum tiang lâwm tak hen a um. A dik hen a ṭha kumza le, a thilti zawzawng sul-le-lam tluang hen a um.

¹⁶ Mipâm tla chu nunsimhnâk ṭha tak a pêk le, an ektê hen ṭha tak hen an zûl. Chu chu asi LALPA theihtu umdân chu.

¹⁷ Sikhawmsele nangmah kawngkâ cho na ruat le; a sual lo mi rangah na thah le, na mi tla chu zângran ko hen na nehsawh na. LALPA nih a sim asi.

¹⁸ Churuangah Juda lalchem Josiah fapa, Jehoiakim thu chu LALPA nih a sim le, “Âukhawm nih a thihnâk ulh hen ‘Ṭihnung a kâi chiam e! Kawi, ṭihnung a kâi chiam e!’ an ti lai lo. Âukhawm amah ṭappi hen, ‘Ka bâwipa! Ka lalchem!’ an ti lai lo.

¹⁹ A vûinâk zahkâi chu sanatung nih a nûk ving lai le, Jerusalem kulh lênglei ah lawnh hen a um lai,” a ti.

Jerusalem Râwknâk Thu Ah Jeremia Thuchah

²⁰ Jerusalem mi tla, Lebanon ah kal ule, âu u, Basan ram ah kal ule, ṭap u; nan murui tla neh hen an um ruangah Moab tlâng thawk hen âu u.

²¹ Sul-le-lam tluang tak hen nan um liauah LALPA nih nan sinah thu a sim le, sikhawmsele nan ngâi duh lo. Chu tak chu nan dam sung zawng ah nan thilti asi; LALPA thu rêng nan ngâi duh lai lo.

²² A nan rui natu tla chu thli nih a ranh ving na lai le, nan murui tla chu râltuknâk ah an tleih hep na lai, nan khuapi tla chu thilsual nan ti mi tla ruangah ningzak leh mualpho hen a um lai.

²³ Lebanon tlâng thawk hen lâk mi sidar thing tla lakah him tak hen na dîn le; sikhawmsele nunau faring hâwi hen nganfâk nih a nan tlunh tik chun zângfâk na ti awt chiam e!

Jehoiakin Tlûnah Pathian Lâirêlnâk

²⁴ LALPA nih Juda lalchem Jehoiakim fapa lalchem Jehoiakin sinah, “Kei, Pathian nung tatak kasi, nang chu, ka kut vawrhlei ah ka min dehnâk pizung sikhawm le, kan lît ving lai le,

²⁵ na ṭih mi minung, thah ding hen a nan duhtu tla sinah ka nan pêk awt. Babulon ah mi lalchem Nebukadnezar leh a kawrsen tla sinah kan pêk awt.

²⁶ Nang leh na nu chu zângran ko hen sal ah kan kaltir na awt. Nan suaknâk silo mi ram ah nan va kal lai le, chunah nan thi vevê lai.

²⁷ Hi ram hi muh ding nan duh thlo lai le, sikhawmsele nan hawng kîr lai lo rawh,” a ti.

²⁸ Kei nih, “Lalchem Jehoiakin chu bêl kuai lawnh rawh mi âunih khawm duh lo mi hâwi asi rawh na maw? Zei rangah anih chu a fa tla hen an theih dah lonâk ram ah sal ah put ving hen an um le?” ka ti.

²⁹ Aw ram, ram, ram! LALPA thusim hi ngâi rawh:

³⁰ “Hi minung hi a fa tla thlâu na ding leh a mun luahtu umlo rawh ding hen mawhtir asi. David mun luahtu ding ah Juda ram lâirêltu ding hen thlâk a nei lai lo. Kei, LALPA nih ka sim asi,” a ti.