JEREMIA 20 - Bawm Common Language Bible Version

Bâwlpu Pasur Hen Jeremia Anna Remlonâk

¹ Biakin ah bâwlpu lakah a lian mi Imer fapa bâwlpu Pasur nih chubang thu ka sim mi a theih rawh chun,

² hawng ka vuak ding hen thu a pêk le, thîr chikchîn hen rêng an hawng ka khimh le, Biakin ah Benjamin Kulh kawtkâ an ti mi kiang tlûnlei ah an ka siah.

³ A thâituan ah rêng an hawng ka khimh mi hawng ka suah rawh chun a sinah, “LALPA nih na min ah Pasur a nan ti lai lo rawh. Min a nan pêk mi chu “Magor-Misaib” (Munkip Ṭihnungkâi) a nan ti lai rawh.

⁴ LALPA amah tak nih, ‘Nangmah rangah leh na hâwi tla rang khawm ah ṭihnungkâi ah ka nan siam awt, mêlma tla nih nâmsâu hen an thah na mi zawzawng na muh lai. Juda mi tla chu Babulon lalchem thiltikhonâk tangah ka siah na awt; mi zeimaw mi chu sal ah a ram leiah a put na lai le, a dang tla chu a thah na lai.

⁵ An mêlma tla chu hi khuapi mi neih zawzawng tla ka rawktir na lai le, an thil-le-rî leh neih zawzawng tla, Juda lalchem tla thil siahnâk tiang ka lâktir na lai le, Babulon ah ka puttir hep na lai.

⁶ Pasur, nang khawm na dâwngsung hen an tleih na lai le, Babulon ah an kalpi na lai. Chunah chun na thi lai le, na hâwi tla âwkrâwl tam tak na simh mi tla hen an vûi na lai,’ ” a ti.

LALPA Sinah Jeremia Vûirâmnâk

⁷ LALPA, na ka perpet le, perpet hen ka um rawh. Kei ngâk hen nang chu na chak dauh le, na thiltikhonâk hen na ka neh. Mikip nih an ka nihsanh le, nî tlâk hen an ka tluktlak.

⁸ Thu ka sim kip ah “Zângnâwrnâk! Siatnâk!” ti hen ṭap hen âu ding ka suak. LALPA, na thuchah ka phuang ruangah zeiliau zawng ah nihsanh leh zauhnawmh hen ka um.

⁹ Sikhawmsele, “LALPA hi ka philh lai le, amah min hen thu ka sim lai lo rawh,” ka ti awt chun, na thuchah chu mei hâwi hen ka sung thûk tak ah a kâng. Ka ti kho ri ka sûm le, sikhawmsele ka derh kho lo rawh.

¹⁰ Mikip nih, “Mun kip ṭihnung a kâi rawh! Thuneitu tla sinah kan sim lai! ” ti hen thu thup an ruat mi ka theih. Ka hâwikawmh ṭha tla khawm nih, niamh hen ka um ding mi an ka bawh ko. “Perpet asi kho lai mawh,” asi kho chun, “Kan tleih lai le, phû kan lam lai,” an ti.

¹¹ Sikhawmsele, LALPA, nang chu keimah leiah ṭângṭawm mi na si, na chak hen na vak le, hawng ka nehsawhtu tla chu an tlawlh lai. Anna dingchang lo ruangah mualpho hen an um kumza lai. An ningzaknâk chu zeiliau khawm philh asi lai lo!

¹² Sikhawmsele, Zeizawng tikho LALPA, rep tak hen mi chu na nik na, an thinlung leh an dawnnâk ah zei a um ti na theih. Churuangah ka harsatnâk zawzawng chu na sinah ka hawng siah asi. Nangmah nih ka mêlma lakah phû na lam mi chu hawng ka muhtir rawh.

¹³ LALPA sinah la sak ule; LALPA chu sawr u! Misual thiltikhonâk ah nehsawh hen um mi chu ruang a suah na.

¹⁴ Ka suak ni siatbarh le, ka nu nih hawng ka ring ni chu philh hen um seh!

¹⁵ Mipa ngâksia asi! Mipa fa na nei rawh! ti thâwng ka pa rangah simh hen lawmhtirtu chu siatbarh hen um seh.

¹⁶ Khuaruatnâk nei lo thlo hen LALPA nih a râwk mi khuapi hâwi si seh.

¹⁷ Ka suak lânah hawng ka thah lo ruangah, zînglei chun nganfâk ruangah ṭap hâu theih sele, nî sûn liauah râltuk hâu theih seh. Ka nu sûl chu ka thlân asi lai rawh.

¹⁸ Zei rangah ka hawng suak êu? Ka san dawngh leiah nawknâk leh ngaihsiatnâk mualphonâk cho ma asi awt?