JEREMIA 16 - Bawm Common Language Bible Version

Jeremia Nunchan Ah LALPA Duhkâng

¹ LALPA nih ka sinah thu a sim nawlh le,

² “Hi bang hâwi mun ah nupi nei lah le, fa khawm nei lah.

³ Hinah suak mi fa tla leh an nu leh an pa tla tlûnah zei a hawng tlung awt ka nan simh lai.

⁴ Râi ṭihnungkâi tak hen an thi lai le, âukhawm anmah lungfâk hen vûi natu an um lai lo. An ruak tla chu tual churtirtu pawng mi hâwi hen tual ah an rîl phut lai. Râltuknâk ah leh sungvâng hen an thi lai le, an ruak tla chu va tla leh ramsa tla râwl asi lai.

⁵ “Mithi ulhnâk in khawm ah lût lah. Âu ruang khawm ah lungfâk lah. Ka mi tla chu thlangamhnâk hen mal ka sâwm na lai lo rawh, ka dâwtnâk leh khua ka ruatnâk khawm an lakah ka langh awtlo rawh.

⁶ A nei mi leh a pâm mi hi ram ah hin an thi lai le, âukhawm nih an vûi na lai lo le, anmah ruangah lungfâktu khawm an um lai lo. Âukhawm a lungfâk ti theihnâk ah mah a ât hen a lû a mêt lai lo.

⁷ Dâwt mi thih liauah chun thla va ngamh ding hen âukhawm a ei hen a dinpi lai lo. Nu leh pa nih thihtâk mi tla âumawh rang khawm ah an zângfahnâk an langh lai lo.

⁸ “Mi tla puai einâk in khawm ah va lût lah. An sinah din leh ei ding khawm hen to lah.

⁹ Kei, LALPA Zeizawng tikho, Israel Pathian nih ka sim ding mi chu ngâi rawh. Lâwmnâk leh lâwptlonâk hâu leh umhnâk puai ah lâwmnâk hâu chu ka rehtir awt. Hinah um mi tla hi chubang thil hawng tlung mi muh ding hen an dam lai.

¹⁰ “Hi bang zawzawng hi na simh na tikah, zei rangah chu tluk rak fâk hen rêp ding hawng kan awt zia ti hen a nan deih lai. Zei thil me kan buar hen LALPA kan Pathian lakah zei thilsual me kan ti ti hen a nan deih lai.

¹¹ LALPA nih, ‘Nan thlâktu nih an hawng ka hertâk le, pathian dang tla an sawnh hen a rian an ṭuan. An hawng ka kaltâk le, ka sîntir na mi an zûl duh lo.

¹² Sikhawmsele an thlâktu tla ngâk hen nan thilti a sual dauh. Nan ektê hen nan lungkhung hen nan sual le, ka thu nan ngâilo.

¹³ Churuang chun, hi ram a mi hi kan suah ving na lai le, nanmah leh an thlâk natu theih dah lonâk ram ah kan siah na awt. Chunah chun pathian dang tla rian a sûn a zân hen nan ṭuan lai le, nan tlûnah kei nih khuaruatnâk ka langh awtlo rawh,’ ” a ti ti hen simh na.

Sal Tângnâk Thawk Hen Kîrnâk

¹⁴ LALPA nih, “Pathian nung, Aigupta ram ah mi Israel mi tla suakpitu keimah sâl hen mi nih thu tiamh lo ding tik chu a tlung awt rawh.

¹⁵ Chu ngâk hen, Kei, Pathian nung, Israel mi tla marlei kâng ram ah mi suakpitu leh ram dang zawzawngah ka rekrâwitir na nâkah mi suakpitu keimah min hen thutiamnâk an nei lai. An thlâktu tla sinah ka pêk na mi ram, anmah ram ngelchel ah ka kîrtir na lai. Kei, LALPA nih ka sim asi,” a ti.

Rêpnâk Tlung Ding Mi

¹⁶ LALPA nih, “Hi minung tla tleih na ding hen ngarâltu tam tak hawng ding hen ka chah na. Tlâng sâng kip tlûnah mi leh tlâng tênâu ah mi, lung pûk ah mi kah na ding hen kahtu tam tak ka chah na.

¹⁷ An thilti zeizawng ka muh ver. Kei lakah zeikhawm thuh mi a um lo; an sual tla ka muh lo mi zeikhawm a um lo.

¹⁸ Ka ram chu ruak hâwi hen a nung lo mi milem hen an nâwmtir hen an pathian diklo tla hen an khattir ruangah an ṭhatlonâk leh an sual man chu a lehnih hen ka pêk na awt,” a ti.

Jeremia Nih LALPA Zumh Bû Hen Thla A Chamnâk

¹⁹ LALPA, nang chu hawng ka humtu leh chaknâk hawng ka pêktu na si; lawksawng liauah na hawng ka ṭangpi. Tual dawnghnâk thawk hen phun tla chu na sinah an hawng kal lai le, “Hawng kan thlâktu tla nih chun pathian diklo tla leh zeikhawm mang tlâklo mi milem cho lo chu zeikhawm an nei lo.

²⁰ Mi nih amah rangah pathian tla a siam kho mazei? Siam kho lo e, siam menza khawmsele pathian tak an si lai lo,” an ti lai.

²¹ Churuang chun LALPA nih, “Zeiliau zawng ah, phun zawzawng chu ka thiltikhonâk leh ka chaknâk ka theihtir na lai le, LALPA kasi ti an theih lai,” a ti.