JEREMIA 14 - Bawm Common Language Bible Version

Ni Khua Kheu Ṭihnungkâi

¹ Ni khua khêu thu ah LALPA nih ka sinah,

² “Juda chu ngaihsiatnâk ah a um le; a khuapi tla khawm thi ding mi hâwi asi. A mi tla khawm ngaihsia hen tual ah an rîl phut. Jerusalem chu ṭangpi hauh hen a âu.

³ Minei tla nih an to-aw tla tî than ding hen an fial na le; tipang leiah an va kal le, sikhawmsele tî an tawng lo; an bêl karo hen an kîr nawlh. Lungdawng leh thinlung nawk hen an mêl an thuh.

⁴ Ruah a um lo ruangah tual a châr hep, phâisen nâwntu tla chu an thinlung a fâk tuktarâi le, an mêl an thuh.

⁵ Sazuk nunau nih phâisen ah belh a um lo ruangah a fano a kaltâk.

⁶ Ram sanatung tla chu tlângah an dîr le, kâwlui a dî mi hâwi hen an thâw an suah le, râwl an tawng lo ruangah an mit tla a hivâi.

⁷ Ka mi tla nih an ka auh le, ‘LALPA, kan sual nih hawng kan mawhtir khawmsele, thu nâ tiam mi hâwi hen hawng kan ṭangpi rawh.’ Vei tam tak kâng dang leiah kan hawitâk le, na tlûnah thilsual kan ti.

⁸ Nang chu Israel tla lungumnâk na si le, siatnâk lakah hawng kan humtu na si. Zei rangah kan ram ah mikhual hâwi leh khualtlâwng minung zân khat cho riak mi hâwi hen na um?

⁹ Zei rangah mi chê tinâk hen a khat mi hâwi leh kawrsen mi ṭangpi ding hen thiltikhonâk nei lo mi hâwi hen na um? LALPA, ngelchel hen kan sinah na um asi! Na mi tla kan si, hawng kan kaltâk lah,’ ” a ti.

¹⁰ LALPA nih chu minung tla thâwngthâng chu a sim le, “Ka sinah mi tek ding an duh le, anna sûm lai lo. Churuangah an tlûnah ka lâwm lo. An thilsual ti chu ka theihkumza lai le, an sualnâk ruangah ka rêp na lai,” a ti.

¹¹ LALPA nih ka sinah, “Hi bang minung tla ṭangpi ding hen hawng ka ngiar lah.

¹² Buh ngei na menza khawmsele, ṭangpi deih hen an âu mi ka ngâi piak na awtlo; duahphung thil ap leh fâng thil ap ka sinah hawng ap na khawmsele, an lakah ka lâwm awtlo. Chu ngâk chun, râltuknâk leh sungvângnâk leh râi hen ka thah na awt,” a ti.

¹³ Churawhchun, kei nih, “LALPA Zahkâi, khuavâng tla nih mi zapi sinah tuknâk leh pâmnâk a um awtlo, kan ram lakah thlangamnâk lâwng a um awt ti na tiamh na ruangah an sim mi na theih ko,” ka ti.

¹⁴ Sikhawmsele LALPA nih a sâng le, “Khuavâng tla nih ka min hen âwkrâwl thu an sim, mi tla chu Kei nih ka fial na mi an si lo, an sinah thu ka pêk na lo, kâ khat khawm an sinah thu ka sim lo. Langhnâk thu an sim mi khawm Kei thawk hen mi asi lo; an simkannâk tla an ruat mi khawm zeikhawm asi lo.

¹⁵ Kei, LALPA nih, chubang khuavâng keimah fial lo mi khuavâng tla tlûnah thil ka ti ding chu ka nan simh na asi, sikhawmsele ka min hen râltuknâk leh pâmnâk hi ram ah hin a hawng tlung awtlo titu tla chu râltuk leh pâmnâk hen ka thah na awt.

¹⁶ An va simh na mi minung tla khawm chu hâwi hen thah hen an um lai. An ruak tla chu Jerusalem zâwllâi ah an lawnh lai le, âukhawm vûitu an um lai lo. Chubang tla chu anmah lakah leh an nupi tla, an fapa tla leh an fanu tla lakah a hawng tlung lai. An sual man ka pêk na awt,” a ti.

¹⁷ LALPA nih chun, ka lawksawng thu tla zapi sinah va sim ding hen thu hawng ka pêk le: “Ka mit ah mi mitthli chu a sûn a zân hen luang seh, ka mi tla chu anna liam zia a fâk ruangah leh fâk tak hen nganfâk pêk an si ruangah ka ṭap bâng lah seh.

¹⁸ Phâisen ah ka kal le, râltuknâk ah a thi mi ruak tla ka muh; khuapi ah ka va lût le, sungvâng hen a thi mi tla ka muh. Khuavâng tla leh bâwlpu tla nih an rian chu an ṭuan le, sikhawmsele zei an ti ti khawm an theih loh.”

Mi Zapi Tla Nih LALPA An Ngiar

¹⁹ LALPA, Juda chu na nawng thlo rawh mu? Zion mi tla chu na hua na mu? Zei rangah dam kho lo thlo ding hen nganfâk hi tluk na kan pêk? Thlangamnâk kan hâwl le, sikhawmsele thil ṭha zeikhawm a hawng tlung lo; dam ding kan lungum mi lakah ningṭihnâk lam a hawng um.

²⁰ LALPA, na lakah thilsual kan ti, kanmah sual leh kan thlâktu sualnâk tla na sinah kan hawng phuang asi.

²¹ Na thutiam theihkumza le, hawng kan thlawrhthlâu lah; na laltophah rokual umnâk Jerusalem chu ningzaknâk tlungtir lah. Kan lakah thudântuk na siam mi khawm râwk lah.

²² Phun tla milem pakhat khawm nih ruah a sûrtir kho lo, vân khawm nih a mah thu hen a sûrtir kho lo. LALPA, kan Pathian nangmah lakah lungumnâk kan nei, hi bang thil tla titu chu nangmah lâwng na si ruangah.