JEREMIA 12 - Bawm Common Language Bible Version

Jeremia Nih LALPA Rangah Thu A Deih

¹ LALPA, ka thunawk hi na sinah ka sim chun Nangnih a dik ti na theih lai. Sikhawmsele, a dik dân thu ka nan deih awt. Zei rangah misual hi an sul-le-lam a tluang zia? Zei rangah mi zumhkâilo tla anna dingchang?

² Na phun na le, ram an thlâk; an ṭhang le, rah an suah. Ṭha hen a nan sim kumza le; sikhawmsele, nangmah sunhsaknâk tatak an nei lo.

³ Sikhawmsele; LALPA, ka thilti leh ka nan dâwt zia chu na theih hen na ka muh. Dawrâ thah ding hen an ruai mi hâwi hen hi misual tla hi nûk na le; thah ding tik a tlung tiang hen vêng rêt na.

⁴ Zei tiang riamruam me kan ram tla hi a châr hen phâisen kip ah belh tla hi a uai awt? Kan mi tla sual ruangah leh mi nih “Kan thilti Pathian nih a muh an ti ruangah ramsa leh va tla chu an thi rawh,” a ti.

⁵ LALPA nih, “Jeremia, minung tek zuam hen na dî thlo asi chun, Zeitin rang tla rangah tek na zuam kho awt? Ram lak men ah na dîr kho lo asi chun, Jordan vakap mâng ah zeitin na um kho awt?

⁶ Na dâwngsungkhur lakah mi na unau tla men nih a nan perpet hen nangmah do ding hen anna bawp. Kawmh tak hen thu sim na khawmsele zumh lah na,” a ti.

A Mi Tla Ruangah LALPA Thinlung Fâknâk

⁷ LALPA nih, “Israel chu ka kaltâk le; ka phun thîm tla chu ka nawng rawh. Ka dâwt mi minung tla chu an mêlma thiltikhonâk lakah ka pêk na rawh.

⁸ Ka mi thîm tla chu keimah dotu ah anna chang le; tumun lakah mi chakeibaknei hâwi hen an ka hûk nawh, churuangah ka hua na rawh.

⁹ Ka mi thîm tla chu munkip ah mû nih va tla a râl na mi hâwi an si. Puai eipi na ding hen ramsa tla kawh na u!

¹⁰ Ramdang mi lâirêltu tam tak tla nih ka grep zûn tla an râwk ver le; ka phâisen tla an lamh dip; ka ram duhtak chu a karo hen an siam thlo.

¹¹ Ramkaro ah an tuah le; ka mâika ah lâwng tlo hen a um rawh. Ram pumpi chu a karo hen a um le, âukhawm nih a zauhkhenh lo.

¹² Ramkaro mun sâng tla pal hen rûn ding hen mi tla an hawng. Ram pumpi veih ding hen râltuknâk ka tlungtir le; âukhawm thlangam tak hen an um kho lo.

¹³ Ka mi tla nih fâng an tuh le, sikhawmsele belh an pumh le; tha fâk tak hen rian an ṭuan le, sikhawmsele zeikhawm an tawng lo. Ka thinthawknâk fâk ruangah an thlâi chîng tla a vei hep,” a ti.

Israel Zâwlbâwm Tla Sinah LALPA Thutiam

¹⁴ LALPA nih, “Israel zâwlbâwm tla, ka mi Israel rangah ka pêk na mi ram râwktu thu sim ding zeimawh ka nei. Chubang misual tla chu thil phun mi a ram phâwi zek mi hâwi hen an ram lakah mi ka lâk ving na lai le, anmah lakah mi Juda tla chu ka hum na awt.

¹⁵ Sikhawmsele ka lâk ving na nûnah an lakah khua ka ruat lai le; anmah ram leh anmah umnâk chiauah ka kîrpi nawlh na lai.

¹⁶ An thinlung zawzawng hen ka mi tla phung an pawm awt hen ‘LALPA a nung kar vial chu’ ti hen thu anna tiam chun Baal sinah thutiam ding hen ka mi tla veikhat an sîntir na hâwi hen ka mi tla lakah mi an si bâk lai le, an sul-le-lam a tluang lai.

¹⁷ Sikhawmsele, zei phun zawng zûl duhlotu an si chun ka phâwi zek lai le, ka veih na awt. Kei, LALPA nih ka sim asi,” a ti.