JEREMIA 11 - Bawm Common Language Bible Version

Jeremia Leh Thudântuk

¹ LALPA nih ka sinah,

² “Thudântuk thu chu ngâi rawh.

³ Kei, LALPA, Israel Pathian nih, thudântuk thu hi zûllotu kip tlûnah siat ka barh mi thu Juda mi leh Jerusalem mi tla rangah simh na.

⁴ Aigupta ram, an rangah meialh hâwi mi thawk hen ka suakpi na liauah an thlâktu tla sinah thudântuk ka siam mi chu asi. Ka thu ngâi ding leh thu ka pêk na mi zeizawng ti ding hen ka simh na. An zûl mi asi chun, ka mi tla an si lai le, Kei, an Pathian kasi lai ti ka simh na.

⁵ Churawhchun, an thlâktu tla sinah tuah an umnâk ram neihnâk leh ram ṭha ka pêk na mi lakah ka thutiam chu ka theihkumza lai,” a ti. Chun, kei nih, “Asi, LALPA,” ka ti.

⁶ Churawhchun, LALPA nih ka sinah, “Juda khuapi tla leh Jerusalem khua lâi ah va kal rawh. Chunah mi tla sinah ka thuchah phuang le, ka thudântuk ngâi ding leh zûl ding hen simh na.

⁷ Aigupta thawk hen an thlâktu tla ka suakpi na liauah, ka thu ngâi ding hen bir tak hen ka simh na mi chu tusûn ni tiang hen ka simh kumza na.

⁸ Sikhawmsele, an zûl hen an ngâi duh lo. Chu ngâk hen mikip nih an lung an khung tir hen an sual nget rih. Thudântuk zûl ding hen thu ka pêk na le, sikhawmsele an êl. Churuangah an lakah rêpnâk rîn hen um mi zawzawng chu ka tlungtir,’’ a ti.

⁹ Churawhchun, LALPA nih ka sinah, “Juda mi leh Jerusalem mi tla nih an hawng ka phiar.

¹⁰ Ka thusim êltu tla chu an thlâktu tla sual leikângah an kîr le, pathian dang tla an sawnh. Juda leh Israel an panih hen an thlâktu tla sinah thudântuk ka siam mi chu an buar.

¹¹ Churuang chun, tuah, Kei, LALPA nih, an lakah siatnâk ka tlungtir awt mi ka simhkan na le, an âwl rîlmâl lai lo. Ka sinah ṭangpi hawng ngiar na khawmsele, ka ngâi piak na ding asi lo.

¹² Churawhchun, Juda mi leh Jerusalem mi tla chu bâwlnâk an pêk mi pathian tla sinah kal hen ṭangpi an deih lai. Sikhawmsele hi siatnâk a hawng tlung tik chun chubang pathian tla nih a hum kho na ding asi lo.

¹³ Juda mi tla nih khuapi tla an nei hâwi hen pathian tam tak an nei le, Jerusalem ah um mi tla nih chun khuapi ah zâwllâi tla ah um mi hâwi hen Baal pathian fihnungkâi sinah bâwlnâk ding hen mâichâm tam tak an siam.

¹⁴ Jeremia, hi bang minung tla ruangah hin ka sinah thlacham hen hawng ka ngiar lah. An lawksawng ni ah ṭangpi hawng ka ngiar na khawmsele ka ngâi piak na awtlo,” a ti.

¹⁵ LALPA nih, “Ka dâwt mi minung tla nih thilsual an ti. Ka Biakin ah tingvo zei me an nei? Bâwlnâk ah ran ap leh thutiamnâk siam hen siatnâk vêng kho ding hen ma an ruat? Chu nih chun a lawmhtir na awt ma?

¹⁶ Veikhat chu oliv thing nah dawh tak leh rah dawh tak mi ka nan ti le, sikhawmsele tu lam chun khuarît hâwi hâu suah hen a nah chu mei hen ka duah lai le, a ṭeng tla ka khiak awt.

¹⁷ “Kei, LALPA Zeizawng tikho nih, Juda leh Israel chu ka phun na le; sikhawmsele tu chun siatnâk hen ka lauh na. Thil diklo an ti ruang chun hi bang hi anmah nih an lakah an tlungtir le, Baal sinah bâwlnâk pêk hen ka thin an ka thawktir,” a ti.

Jeremia Thah Ding Hen Phiarnâk

¹⁸ Ka mêlma tla nih an hawng ka phiarnâk thu LALPA nih hawng ka simh.

¹⁹ Dawrâ fa zumhkâi thah ding hen put mi hâwi kasi le, ka lakah thilsual ti an tum mi khawm ka theih lo. “Thing a dawr ṭha liau takah kan hâu lai le; âukhawm nih theihlo rawh ding hen kan thah ving lai,” an ti.

²⁰ Churawhchun, thla ka cham le, “LALPA Zeizawng tikho, nang chu lâirêltu rep na si; minung thinlung dawn leh theihnâk tla chu na nik. Ka lawksawngnâk chu na kut ah kan ap, churuang chun hi minung tla lakah lehrûl na sam mi hawng ka ngâktir,” a ti.

²¹ Anathoth mi tla nih thah an ka duh le, LALPA thuchah ka phuang kumza chun thah ding an ka tum ti an ka simh.

²² Churuangah, LALPA Zeizawng tikho nih, “Ka rêp na lai! An tlangvâl tla chu râltuknâk ah an thi lai le, an fa tla chu buh ngei hen an thi lai.

²³ Anathoth mi tla lakah siatnâk tlung ding hen tik ka ruat rawh, chu chu a tlung tik chun pakhat khawm an dam lai lo,” a ti.