JEREMIA 10 - Bawm Common Language Bible Version

Milem Sawnhnâk Leh Sawnhnâk Dik

¹ Israel mi tla, LALPA nih nan sinah thu a sim mi chu ngâi u.

² LALPA nih chun, “Phundang tla umdân châwng lah u; vân ah muh dahlo mi muh ruangah a nawktir lah u, phun dang tla nih ṭih na khawmsele.

³ Hi bang minung tla phung veih hi zeikhawm si lo. Thing mun ah mi thing chu hâu hen thing kertu nih a ruakhâu hen a ker le,

⁴ ngûn leh tangka hen an thuamh. A tlâ lonâk ding hen thîrling hen an khenh.

⁵ Chubang hâwi milem tla chu chawngmazil phâisen ah langâk tla ṭih ding hen siam mi hâwi asi; an hawlh kho lo; an kal kho lo ruangah put an ngâi. Chubang tla chu ṭih na lah u: Zei nganfâk khawm an pêk na kho ding asi lo, ṭhat khawm an ṭhattir kho na ding asi lo,” a ti.

⁶ LALPA, nang hâwi mi âukhawm an um lo; nang chu na chak le, na min chu a rokual hen thil a tikho.

⁷ Phun zawzawng tla lalchem, âunih a nan zah lo lai? Nang chu zah tlâk na si. Phun tla lakah mifing zawzawng leh an lalchem tla lak khawm ah nang hâwi pakhat khawm an um lo.

⁸ An ektê hen an â hen ê-aw an ngâilo. Thing milem thawk hen zei me theihnâk an nei kho?

⁹ An milem tla Spain ram ah mi tangkasa hen an luanh, Uphaz ram ah mi ngûn hen an luanh, chubang zawzawng chu thilsiam thiamtu tla rianṭuan ver asi; puan senduk leh dumpâwl, puan tah thiam mi tla nih an tah mi hen an thuamh na.

¹⁰ Sikhawmsele, LALPA, nang lam chu Pathian dik tak, Pathian nung, Zungzâl lalchem na si. Na thin a thawk liauah laikulh a thir, phun tla nih na thinthawknâk an tuar lo.

¹¹ (Nannih mi zapi tla, tual leh vân siam kholotu pathian chu veih asi lai ti simh na u. Hi tual tlûn zei mun khawm ah an um lai lo rawh.)

Pathian Sawrnâk La

¹² LALPA nih tual chu a thiltikhonâk hen a siam le; a finghnâk hen laikulh a siam le, vân tla a pharh.

¹³ A thupêk hen chung vân ah mi tî nih hâu a suah; tual dawnghnâk thawk hen vândâwm tla a hawng tir. ruah lakah mîmthlâ a lektir le, a siahnâk thawk hen thli tla a hawng fial.

¹⁴ Chu chu an muh ruangah zeikhawm theihnâk nei lo hen an â thlo; milem siamtu tla khawm nih an pathian siam tla chu diklo leh nungnâk nei lo mi an si ruangah theihthiamnâk an nei rawh.

¹⁵ Mangtlâklo leh zauhnawmh ding mi an si le; LALPA, anmah do ding hen a hawng tik chun an vei lai.

¹⁶ Jakob Pathian lam chu anmah hâwi asi lo; zeizawng siamtu asi le, Israel mi tla chu amah mi tak siding hen a thîm na. A min chu LALPA Zeizawng tikho asi.

Sal Tâng Ding Mi

¹⁷ Jerusalem mi tla, hual hen nan um rawh! Na neih pumh rawh.

¹⁸ LALPA nih hi ram thawk hen an lawnh ving awt; pakhat khawm âk lo ding hen nan vei ver tiang hen siatnâk a tlungtir awt. LALPA nih a sim asi.

¹⁹ Jerusalem mi tla an âu le, “Kan tuar zia a fâk a! Kan liammâ tla chu a dam lai lo rawh. Kannih nih hi hi tuar kho ding mi thil zeimawh ah kan ruat!

²⁰ Kan puanin tla chu â râwk rawh; a rêngnâk ri khawm a chat rawh. Kan fa tla khawm an kal hep rawh, kan puanin zâr nawlhtu ding pakhat khawm a um lo rawh; a puanzâr thlâitu ding pakhat khawm an um lo rawh,” an ti.

²¹ Kei nih ka sâng le, “Kan ruitu tla khawm an mâwl le; ruitu ding ah LALPA an ngiar lo. Chu tak chu an palhnâk asi le, kan mi le khawm anna rek ver rawh.

²² Ngâi u! Thâwngthâng a hawng tlung! Marlei mi phun lakah nawknâk rokual tak a tlung sut; a kawrsen tla nih Juda khuapi chu an râwk phin le, kâwlui umnâk mun asi rawh,” ka ti.

²³ LALPA, âukhawm mah um ding dân theihthiamtu a um lo ti ka theih, âukhawm nih mah nungnâk hi an thu hen an umtir kho lo.

²⁴ LALPA, na mi tla chu diktir na le, sikhawmsele na thinthawk hen hawng kan rêp khawm ah fâk tuktarâi lah seh; chu chu kan dawngnâk asi lai.

²⁵ Nangmah a nan sawnh lotu leh a nan duhlotu phun tla tlûnah na thinthawknâk tlungtir. Na mi tla chu an thah na le, hawng kan veih dep le, kan ram khawm râwk dep hen an mâk thlap.