JEREMIA 1 - Bawm Common Language Bible Version

Jeremia

¹ Hi lasuibu hi Hilkiah fapa Jeremia, Benjamin ram ah Anathoth khua mi bâwlpu tla lakah pakhat nih a sim mi thâwngthâng asi.

² LALPA nih Jeremia sinah Amon fapa Josia, Juda lalchem a sinâk kum leithumnâk ah thu a sim le,

³ chun, Josia fapa Jehoiakim lal asi liau khawm ah a sim fâwn. Chu nûnah chun Josia fapa Zedekiah lâirêl kum leikhatnâk tiang hen LALPA nih a sinah vei tam tak thu a sim. Chu kum a thla nga nakah Jerusalem ah mi tla chu sal ah put hen an um.

Jeremia Kawh Hen A Umnâk

⁴ LALPA nih ka sinah,

⁵ “Nungnâk kan pêk lânah leh na suak lânah phun tla sinah khuavâng siding hen kan thîm rawh mi na si,” ati.

⁶ Kei nih, “LALPA zahkâi, thusim ding dân ka thiamlo, ka ngâksia tuktarâi,” ka ti.

⁷ Sikhawmsele LALPA nih ka sinah, “Ka ngâksia tuk ti lah, sikhawmsele, ka nan fialnâk mi tla sinah va kal le, sim ding hen kan simh mi zawzawng simh na.

⁸ Annih chu ṭih na lah, a nan hum ding hen na sinah ka um awt ruangah. Kei, LALPA nih ka sim mi asi!” a ti.

⁹ Churawhchun, LALPA nih a kut a zo le, ka mûr a hawng tawngh le, ka sinah, “Ngâi rawh, na sim ding mi thu ka nan pêk hi.

¹⁰ Tusûn ni ah hin, phun tla leh, lalram phâwi leh siat ding hen, râwk leh lawnh ding hen, dirh leh phun ding hen thuneihnâk ka nan pêk asi,” a ti.

Langhnâk Panih Tla

¹¹ LALPA nih, “Jeremia, zei na muh?” hawng ka ti. Kei nih, “Almon thing ṭeng ka muh,” ti hen ka sâng.

¹² LALPA nih, “Na dik asi, ka thu a dik mi muh ding hen ka ngâk ko,” a ti.

¹³ Chun, LALPA nih ka sinah thu a sim nawlh. “A dang zei na muh?” ti hen hawng ka deih. Kei nih ka sâng le, “Marlei kângah bêl a tlawk mi ka muh le, hi leikângah a kâ nih a hawih,” ka ti.

¹⁴ Anih nih ka sinah, “Marlei ah mi phun zawzawng hawng ding hen ka kawh na awt ruangah,

¹⁵ siatnâk a tlawk mi chu marlei thawk hen hi ram lakah a um mi tla tlûnah a hawng liam awt. An lalchem tla nih Jerusalem kulh kawtkâ tla ah leh a kulh kiangkam tla ah, Juda ram khuapi dang kiangkam tla khawm ah an laltophah an toh lai.

¹⁶ Ka mi tla chu an sual hen an ka kaltâk le, pathian dang tla sinah bâwlnâk ap hen milem tla an siam le, an sawnh ruangah ka rêp na awt.

¹⁷ Jeremia, a tîm rawh; kal le, sim ding hen thu ka nan pêk mi zeizawng va simh na. Tu chun anmah tla ṭih lah na, chu hâwi silo chun an sinah na um tikah anmah ṭih ding hen zer khun hen kan siam awt.

^18-19 Jeremia, ngâi rawh! Hi ram ah mi mikip Juda lalchem tla, rianṭuantu tla, bâwlpu tla leh mi zapi tla chu nangmah dotu an si lai. Sikhawmsele tusûn ni ah anmah do na ding hen chaknâk ka nan pêk asi; nang chu kulhnei khuapi hâwi leh thîrtung leh dâr kulh hâwi na si lai. Nangmah an hum ding hen na sinah ka um awt ruangah an neh ding asi lo. Kei, LALPA, nih ka sim asi,” a ti.