ISAI 9 - Bawm Common Language Bible Version

Hi Nûn Ding Mi Lalchem

¹ Zebulun leh Naphtali chu veikhat chu ningzakkâi tak hen an um le, sikhawmsele, hi nûnah lam chun Mediteranian saklei thawk hen Jordan varâl lei ram leh ramdang mi umnâk Galili ram tiang hen zumhkâinâk hi ram ah hin a hawng um lai.

² Mûi ah kaltu tla nih chun chêu rokual tak an muh. Dâidul ram ah an um le, sikhawmsele tu lam chun chêu nih a cherh na.

³ LALPA nangnih lâwmnâk rokual tak na pêk na le; Lâwptlo hen na siam na. Mi tla an fângzûn liauah anna lâwm mi hâwi hen mawh râltuknâk ah an kal mi neih anna ṭhen liauah anna lâwm mi hâwi hen thil na ti mi lakah anna lâwm.

⁴ An dâr ah vuaknâk fung tla leh an ngâwng khimh rit tak tla na khiak piak na. A lânah Midian kawrsen tla na neh na mi hâwi hen na mi tla nehsawhtu leh naunehtu phun chu na neh rawh.

⁵ Rûntu kawrsen pheikawk tla leh an thisen buaih mi nipuan tla chu mei nih a khangh hep lai.

⁶ Kan lakah ngâksia a hawng suak! Fapa pêk hen kan um! Anih chu kan lâirêltu asi lai. “Remruattu Che,” “Pathian chak,” “Zungzâl Pa,” “Remnâk Lal” an ti lai.

⁷ A lal thiltikhonâk chu a lian dadauh lai le; a lalram ah chun remnâk a um kumza lai. Lalchem David ruangrûl ah lâi a rêl lai le, a thiltikhonâk chu dik tak leh rep tak hen tu thawk hen tik dawngh tiang a um lai. LALPA Zeizawng tikho nih hi zawzawng ti ding a tum asi.

LALPA Nih Israel Tla A Rêp Na Awt

⁸ LALPA nih Israel lalram mi Jakob thlâk tla tlûnah lâirêlnâk thu a phuang.

⁹ Israel mikip Samaria khuapi ah um mi zawzawng nih a ti ngâk mahi ti an theih teh lai. Tu lam chun anna zûm hen anna ûngtir.

¹⁰ “Tual rawh in chu a tlû le, sikhawmsele chu mun ah chun lungin kan sak lai. Theipi thing kân chu an râwk le, sikhawmsele chu mun ah chun a ruangrûl ah sidar thing ṭha kan mang lai,” an ti.

¹¹ LALPA nih anmah do na ding hen an mêlma tla thinlung a thawktir.

¹² Saklei ah Siria mi leh thlanglei ah Philistia tla chu Israel veih ding hen an kâ an âng. Chu hâwi tluk asi khawm ah LALPA thinthawknâk chu a reh dahlo rih; rêp ding hen a kut chu a zangh nget rih.

¹³ LALPA Zeizawng tikho nih Israel tla chu rêp na menza khawmsele, amah leikângah rim hen an kîr dahlo rih.

¹⁴ Ni khat sungah LALPA nih Israel ruitu tla leh a mi tla chu a rêp na lai le, an lû leh an mei a tan piak rel na lai.

¹⁵ Anmah lakah tar leh mi zahkâi tla chu lû an si le, mei chu khuavâng âwkrâwl thusimtu tla chu an si!

¹⁶ Chu tla nih diklo tak hen mi an rui na le, an ektê hen an vâi hep.

¹⁷ Churuangah Lalpa nih tlangvâl pakhat khawm a zuah na lai lo le, mi zapi tla chu pathian nei lo leh misual thu sual karo simtu an si ruangah numei leh mipâm tla lak khawm ah lungkhamnâk a nei awtlo. Chu hâwi tluk khawm ah LALPA thinthawknâk chu a dawng awtlo le, sikhawmsele rêp ding hen a kut a zangh nget lai rih.

¹⁸ Mei nih bualingnei leh bua tla a khangh mi hâwi hen mi zapi sualnâk nih a khangh. Ram a kâng mi meikhû a dîr luai mi hâwi hen a kâng.

¹⁹ LALPA Zeizawng tikho chu a thinthawk ruangah, a rêpnâk nih chun ram pumpi mei hâwi hen a khangh le, mi zapi tla a veih na, mikip mah rang chiau asi.

²⁰ Ram lakah mun kip ah chuh bû hen buh an tawngnâk zawng ah an ei le, sikhawmsele an sungvâng chu a reh lêm lo. An fa le tla tiang an ei!

²¹ Manaseh leh Efraim mi tla anna do le, an panih bawp hen Juda rangah an do. Chu hâwi tluk khawm ah LALPA thinthawknâk chu a reh lo le; a kut chu rêp ding hen a zangh nget rih.