ISAI 8 - Bawm Common Language Bible Version

¹ LALPA nih ka sinah, “Rînnâk ding ah a rua lian ual lâk le, lasuiṭial lianpi hen a tlûnah rîn: ‘Râwk sawm le, Rang tak hen rûn.’

² Mi zumhkâi panih, bâwlpu Uriah leh Jeberekiah fapa Zekaria chu rianṭuan ding hen theihpitu ah hawng put na,” a ti.

³ A nehnûn dauh ah chun, ka nupi a râi rawh. Kan fapa a hawng suak rawh chun LALPA nih ka sinah, a min chu “Maher-salal-has-baz” (Râwk-sawm, Rang tak hen rûn) ti hen sak.

⁴ Chu ngâksia chu ‘Ka nu, ka pa,’ a ti kho lânah Damaska neihnâk zawzawng leh Samaria ah an rawk mi thil zawzawng chu Asiria lalchem nih a put hep lai,” a ti.

Asiria Lalchem A Hawng Kalnâk

⁵ LALPA nih ka sinah thu a sim nawlh.

⁶ “Hi bang mi tla nih Siloah tivatê mi tî an duh lo ruangah leh lalchem Rezin leh lalchem Pekah mâika ah an thir ruangah,

⁷ Kei, LALPA nih Asiria lal lianchem leh a mi tla chu Juda tla do ding hen ka hawng put na awt. Eufretis tiva tî a lian le, tiva kâwr khat phak a luang mi hâwi hen an hawng kal lai.

⁸ Juda ram chu tîlian hâwi hen a hawng nîm lai le, liang tiang a sâng lai le, thil zeizawng a khuh dep lai,” a ti. Pathian chu kan sinah a um! A thla tla a zâr mi nih ram chu a hum.

⁹ Nannih phun tla, lâu hen hawng a pûm u! Tual tlûn mun lât takah um mi tla, ngâi u. Râltuk ding hen a tîm ule, sikhawmsele ṭih u. Asi, a râlring le, sikhawmsele ṭih rawh!

¹⁰ Nan ti dân ding a thluk u! Sikhawmsele anna dingchang lai loh. Nan duh tâwk hen hawlh u! Sikhawmsele Pathian kan sinah a um ruangah a thawt ver asi.

LALPA Nih Khuavâng A Simhkannâk

¹¹ LALPA nih a thilti rokual tak hen, mi zapi tla kalnâk lampi ah kal lo ding hen hawng ka simhkan rawh.

¹² “Mi zapi tla thiltum lak khawm ah va a ṭawm lah le, an ṭih mi thil khawm ṭih lah.

¹³ Kei, LALPA Zeizawng tikho, a thenhlimh mi na ṭih ding mi chu kasi ti theihkumza.

¹⁴ Ka thenhlimhnâk chê tak ruangah zapi tla tlûknâk lung hâwi kasi le, Juda lalram sungah mi leh Israel tla leh Jerusalem mi tla awhtu thang hâwi kasi.

¹⁵ Tamtak anna suih lai le, an tlû hen an vei lai. Thang nih a awh na lai,” a ti.

Mi Thi Rangah Thu Deihnâk Ruangah Simhkannâk

¹⁶ Nannih ka ṭhiruai tla chu, Pathian nih thuchah hawng ka pêk mi vêngtu leh kiltu ding nan si.

¹⁷ LALPA chu a mi tla lakah mi â thup le, sikhawmsele amah chu ka zumh hen a sinah lungumnâk ka siah.

¹⁸ Hinah hin LALPA nih hawng ka pêk mi fa tla hen kan um. LALPA Zeizawng tikho, Zion Tlâng tlûnah a laltophah um mi nih chun thuchah nung hâwi hen Israel mi tla sinah hawng ka fial.

¹⁹ Sikhawmsele, mi nih chamchawh thiam leh mithi sawnhtu, chamchawh hen âwn salamtu rangah thu deih ding hen a nan simh lai. Annih nih, “Zeizawng nûnah mi tla nih a nung mi ruangrûl ah thlarau leh mithi sawnhtu rangah thu an deih ding asi,” an ti lai.

²⁰ Nannih nih, “LALPA nih a nan sîntir na mi hi ngâi u! Mithi sawnh thiam thu ngâi lah, a nan simh na mi thu chu nan rangah zeikhawm a ṭhatnâk a um lai loh,” ti hen nan sâng ding asi.

Lawksawngnâk Tik

²¹ Mi tla chu ram pumpi ah thinlung dawng leh sungvâng hen an vâi chur lai. An sungvâng hen an thinthawk tukah lalchem leh an Pathian rangah siat an barh lai.

²² Vânlei an zauh lai le, tual lei an bih lai le, sikhawmsele, lawksawngnâk leh mûinâk, mûi ṭihnungkâi ah nar hen an umnâk lo chu zeikhawm an muh lai loh. Chu nawknâk tik lakah mi chu suak khonâk lampi rerêng an rangah a um lai lo rawh.