ISAI 7 - Bawm Common Language Bible Version

Lalchem Ahaz Rangah Thuchah

¹ Lalchem Ahaz, Jotham fapa, Uziah tupa nih Juda lakah lâi a rêl liauah râltuknâk a hawng um. Siria lalchem Rezin leh Israel lalchem Remaliah fapa Pekah nih Jerusalem an do le, sikhawmsele an lâk kho lo.

² Israel ram ah Siria kawrsen tla an um ti hen Juda lalchem sinah thu a hawng tlung le, amah leh a mi tla chu an ningṭih tuktarâi le, thing tla thli nih a ninh mi hâwi hen an thir.

³ LALPA nih Isai sinah, “Na fapa Sear Jasub put le, lalchem Ahaz hen tawng ding hen va kal. Puan siamtu umnâk mun ah mi lampi ah, a tlûnlei mi tili thawk hen tî luangnâk chawh mi dawng ah na va muh lai.

⁴ Râlring zet hen dâisip um ding hen va simh, ningṭih hen a thinlung a nawktir lah seh. Lalchem Rezin leh a mi tla leh Lalchem Pekah chu ṭhianṭhunh panih mei nih a muat mi khû tluk hen khawm ṭihnung an kâi lo.

⁵ Siria leh Israel leh an lalchem tla hen thu an thlûk.

⁶ Juda rûn an tum le, anmah leiah ṭângṭawm ding hen mi tla an ṭhih na le, Tabeel fapa chu laltophah ah an totir.

⁷ “Sikhawmsele, Kei, LALPA nih ka sim asi, chu hâwi hen rêng a um lai lo.

⁸ Zei ruangah? Siria chu Damaska ngâk hen a chak dauh lêm lo, a khuapi leh Damaska khawm lalchem Rezin ngâk hen a chak dauh lêm lo. Israel lam châng chu kum sâwmruk leh kum nga sungah phun ti ding umlo rê hen a vei dep lai.

⁹ Israel chu Samaria ngâk hen a chak dauh lêm lo, a khuapi leh Samaria chu lalchem Pekah ngâk hen an chak dauh lêm lo. “Na zumhnâk a bir lo chun nangmah khawm na bir lai lo,” a ti.

Immanuel Singsiahnâk

¹⁰ LALPA nih Ahaz sinah thuchah dang a thanh:

¹¹ “LALPA na Pathian chu singsiahnâk deih. Laikulh thihnâk sungah mi mawh vân sâng ah mi mawh a si kho,” ti hen.

¹² Ahaz nih a sâng le, “Singsiahnâk rerêng ka deih awtlo. LALPA nik ding ka duh lo,” a ti.

¹³ Chu lakah chun Isai nih a sâng le, “Lalchem David thlâk, tuah ngâi rawh. Minung na hamhtir mi men na rangah a ṭhalo tuktarâi rawh mi lakah Pathian khawm na hamhtir awt nget rih na maw?

¹⁴ Churuangah Lalpa amah tak nih singsiahnâk a nan pêk lai: Nungâk Thenhlimh a râi mi nih fapa a ring lai le, a min ah ‘Immanuel’ sak asi lai

¹⁵ Amah lakah lungfiang tâwk hen a upa tik chun, mi tla chu nûk hâng leh khuaitizû an din lai.

¹⁶ Chu a tik tlung lân khawm ah a nan ṭhih natu lalchem panih ram chu kaltâk asi lai.

¹⁷ “LALPA nih na tlûnah, na mi le tla tlûnah, lal dâwngsung tla zawzawng tlûnah Israel ram Juda lakah mi â ṭhennâk thawk hen a hawng tlung mi ngâk a nawknâk zual kâi dauh a hawng tlungtir awt, anih nih chun Asiria lalchem a hawngpi awt.

¹⁸ “Chu chu a hawng tlung tikah Aigupta mi tla chu Nile tiva ṭeng mun lât chem thawk hen matho hâwi hen an hawng kal lai le, Asiria tla chu an ram thawk hen khuai hâwi hen hawng kal ding hen LALPA nih sûrsîk hen a kawh na lai.

¹⁹ A tumhupi hen tivakuam leh lungpûk tla an khat ver lai le, ling leh bua nâwng tla khawm an khat phak lai.

²⁰ “Chu chu a hawng tlung tikah, Lalpa nih Asiria lal lianchem Eufretis varâl lei mi mul mêttu chu a chah lai le, nan khamul tla, na lû ah mi sam tla, nan tak mul tla a mêt peng lai.

²¹ “Chu chu a hawng tlung tikah, phâisen nâwntu chawpê pinu pakhat leh kêl panih cho hum kho khawmsele,

²² nûk a herh zat zawng an suah piak kho lai. Asi, a thibang tâwmtê ram lakah an um mi khawm nih nûk leh khuaitizû ei ding an nei lai.

²³ “Chu chu a hawng tlung tikah, grep zûn a ṭha mi ṭeng kip nih ṭeng sâng a suah mi, tangka man chiau chu ling leh bua nih a khuh pang lai.

²⁴ Chunah chun mi tla an chanhtiang leh a thalzum tla hen sa kah ding hâwl hen an kal lai. Asi, ram pumpi chu bua leh ling hen a khat lai.

²⁵ Tlâng thlâi chîngnâk tla chu bua lingnei hen a khat zat lai le, âukhawm chunah chun an kal lai lo. Ranrual leh dawrâ rual tlawngnâk mun asi lai,” a ti.