ISAI 62 - Bawm Common Language Bible Version

¹ Jerusalem fawrhnâk thu ka sim lai le; Him tak hen a um lânlo leh a nehnâk chu Zân ah mi meifâr hâwi asi lânlo chu ka dâisip awtlo.

² Jerusalem, phun tla nih na nehnâk an muh lai! An lalchem zawzawng nih na rokualnâk an muh lai. LALPA amah tak nih an phuah mi min thar hen kawh na si lai.

³ LALPA rangah lallukhuh dawh tak hâwi na si lai.

⁴ “Kaltâk mi” ti hen kawh na si lai lo rawh le, Na ram khawm “Nupi mâkchia” ti hen kawh asi lai lo rawh. Na min thar chu Heph-zi-bah (Pathian a sinah â lâwm mi) ti asi lai. Na ram chu Beaulah (Lâwm tak hen umpi mi) ti asi lai. LALPA chu na lakah â lâwm ruangah leh Na ram rangah chun pasal hâwi asi ruangah.

⁵ Tlangvâl nih nungâk thenhlimh mo a lâk mi hâwi hen A nan siamtu nih a nan umpi lai. Pasal chu a nupi thar lakah â lâwm mi hâwi hen, Na Pathian chu na lakah â lâwm lai.

⁶ Jerusalem, na kulh tlûnah râlvêngtu ka siah le; A sûn a zân hen an dâisip ding asi lo rawh. LALPA thutiam chu an tharh nawlh lemang lai le, Anna philhtir lai lo rawh.

⁷ Jerusalem chu dirh asi lânlo chu an dîntir awtlo, Khuapi chu laikulh pumpi sawr tlâk ah siam ding hen.

⁸ LALPA nih thutiam bir tak a siam le, A thiltikhonâk hen a zulhpeh vima lai: “Nan fâng tla chu na mêlma tla tî-le-râwl rangah asi lai lo rawh. Ramdang mi nih nan uain hâng an din lai lo rawh.

⁹ Sikhawmsele, nanmah a tuhtu Leh fâng âttu nih sang chu Nan nei lai le, LALPA chu nan sawr lai. Nanmah a ṭuantu leh grep pumhtu nih ka Biakin Tualmâi ah grep hâng chu nan din lai,” a ti.

¹⁰ Jerusalem mi tla, khuapi sungah mi suak ule, Nan mi hawng kîr mi tla rangah lampi siam u! Lamlian timhtuah ule, lung tla thianh u! Singsiahnâk siam u.

¹¹ LALPA nih laikulh pumpi ah thu a sim mi chu Phun tla nih theih kho ding hen: “LALPA chu ruang a nan suah na ding hen a hawng le, Ruang a suah na mi tla a hawngpi na mi Jerusalem mi tla chu simh na u,” ti hen.

¹² “Pathian mi thenhlimh” “LALPA nih ruang a suah na mi tla,” ti nan si lai. Jerusalem chu “Pathian dâwt mi khuapi,” “Pathian nih a kaltâk lo mi khuapi” ti asi lai.