ISAI 61 - Bawm Common Language Bible Version

Suahnâk Thâwngthâng Ṭha

¹ LALPA zahkâi nih a thlarau hen hawng ka khattir. Mipâm tla sinah thâwngthâng ṭha sim ding, Thinlung fâk mi tla damh ding, Sal tang tla sinah suahnâk thu sim ding, Rêngtlâ sinah suaknâk thu sim ding hen Hawng ka thîm le, hawng ka fial.

² LALPA nih a mi tla ruang a suah na ding mi leh Mêlma tla a neh piak ding mi tik a tlung rawh Ti sim ding hen hawng ka fial. Mi ngaihsia tla sinah thlangamh ding hen hawng ka fial.

³ Zion ah lungfâk mi tla sinah ngaihsiat ngâk hen Lâwm leh lâwptlonâk pêk ding hen, Lungzûr ngâk hen sawrnâk la sak ding hen hawng ka fial. LALPA amah tak nih a phun na mi, Thing tla hâwi an si lai. A dik mi zawzawng an ti lai le, Pathian chu a thilti ruangah sawr hen a um lai.

⁴ Hun sâwt tak siat leh râwk hen A um mi khuapi chu sak nawlh asi lai.

⁵ Ka mi tla, ramdang mi tla nih Nan nâwl an zulh na lai. Nan ranrual tla an zauhkhenh lai le, Nan ram tla lakah phâisen na tuah lai le, Nan grep tla an bulsan piak na lai.

⁶ Nannih lam chu LALPA bâwlpu, Kan Pathian to-aw ti hen theih nan si lai. Phun tla neih lakah nanna lâwm lai le, Nan tâ si hen zûm phahnâk ah nan mang lai.

⁷ Nan mualphonâk leh ningzaknâk a dawng rawh. Nanmah ram takah nan um lai le, Nan neih chu a leh khat hen a pung lai le, Nan a lâwmnâk chu zungzâl tiang asi lai.

⁸ LALPA nih, “Repnâk chu ka duh le, Nehsawhnâk leh thilsual chu ka hua. Ka mi tla chu zumhkâi tak hen lâwmman ka pêk na lai le, An sinah zungzâl thudântuk ka siam lai.

⁹ Phun tla lakah an min a thang lai le; Mikip anmah muhtu tla nih mal ka sâwm na mi Minung tla an si ti an theih lai,” a ti.

¹⁰ Jerusalem, LALPA nih thil a ti mi ruangah a lâwm rawh. Anih chu umh liauah â thuam mi hâwi asi. Pathian nih ruangsuahnâk leh nehnâk puan a aihtir.

¹¹ A chî a keuh hen a hawng ṭhang tatak rawh chun, LALPA Zahkâi nih a mi tla ruang a suah na lai le, Phun zawzawng nih amah an sawr lai rawh.