ISAI 60 - Bawm Common Language Bible Version

Hi Nûnah Jerusalem Rokualnâk Ding

¹ Jerusalem thawk le, nî hâwi hen chêu rawh; LALPA rokualnâk na tlûnah a chêu!

² Phundang tla chu mûi nih a khuh pang lai le, Sikhawmsele nang tlûnah lam chun LALPA chêu a chêu lai le; A nan umpinâk chêu chu na sinah a um lai.

³ Phun tla nih na chêu chu an hawng naih lai le, Lalchem tla nih na ni thar khuadei chu an hawng fûk lai.

⁴ Na kiangkam zei thil a hawng tlung zauh rawh; Na mi tla chu in leiah hawng tlung ding hen anna pûm liau, Lât tak thawk hen na fapa tla an hawng lai le; Na fanu tla chu ngâksia tla hâwi hen hawngpi an si lai.

⁵ Hi hi na muh lai le, lâwm hen na khat lai; Thinlung thawk ruangah na thir lai. Phun tla neihnâk chu na sinah an hawng put lai; Tipi tan hen an neih tla a hawng tlung lai.

⁶ Sangâwngsâu hen khualtlâwngtu murui tla tam tak, Midian leh Ephah thawk hen an hawng lai. Seba thawk hen ngûn leh rimthâw tla put hen an hawng lai. Mi tla nih LALPA thilti thâwngthâng ṭha an sim lai!

⁷ Kedar leh Nebaioth ah mi dawrâ zawzawng Bâwlnâk ding ah na sinah an hawng put lai le, LALPA lawmhtir ding hen mâichâm ah an ap lai. LALPA nih a Biakin chu a lânah mi ngâk a rokual dauh hen a siam lai.

⁸ Zei lawng tla masi sûm hâwi hen kal zulmal mi leh Vaṭhu in leiah kîr mi hâwi khi?

⁹ Ram lât tak thawk hen Pathian mi tla in leiah An hawng putnâk lawng tla asi. LALPA Israel Pathian thenhlimh, Phun zawzawng mi tla Zah ding hen siamtu min zahnâk ding hen; Ngûn leh tangka tla an hawng put.

¹⁰ LALPA nih Jerusalem sinah, “Ramdang mi nih na kulh tla chu a siam lai le, An lal tla nih na nâwl an zulh lai. Ka thinthawk ruangah ka nan rêp le, Sikhawmsele tu lam chun ka nan sunhsaknâk leh Khua ka ruatnâk kan zauhtir lai.

¹¹ A sûn a zân hen, na kulh kawtkâ tla chu â awng lai le, phun lakah lalchem tla nih An neihnâk tla na sinah an hawng put khonâk ding hen.

¹² Sikhawmsele, na nâwl zulh duh lo phun tla chu veih dep an si lai.

¹³ “Nang, Jerusalem, an sak nawlhnâk ding hen, Ka Biakin tla dawh tak a sak ding hen, Ka khuapi tla rokual tak a siamnâk ding hen, Far thing, junipar thing, far thing chi dang, Thing ṭha chem Lebanon tumun ah mi an hawng put lai.

¹⁴ Nangmah a nan nehsawhtu fapa tla an hawng lai le, An zah ti theihnâk ding hen na mâika ah an kûn lai. A nan zauhnawmhtu tla nih na kezaphah bul ah an mâimûk lai. ‘LALPA khuapi’ ‘Zion, Israel Pathian Thenhlimh khuapi’ a nan ti lai.

¹⁵ “Kaltâk leh huat hen um mi, khuapi râwk leh a karo hen Um mi na si lai lo rawh. Zungzâl hen lâwmnâk mun, rokual tak leh dawh tak hen ka nan siam lai.

¹⁶ Nu nih a fa a zauhkhenh mi hâwi hen, Phun tla leh lalchem tla nih a nan zauhkhenh lai. Kei, LALPA nih ka nan hum mi leh Israel Pathian chak nih ka nan suah asi ti na theih lai rawh.

¹⁷ “Dâr ruangrûl ah ngûn, thîr leh thing ruangrûl ah Tangkasa leh dâr, lung ruangrûl ah thîr ka nan put lai. Nan lâirêltu tla nih a nan nehsawh na lai lo rawh; Rep tak leh thlangam tak hen lâirêltu ding hen ka siam na lai.

¹⁸ Siat leh râwknâk rihâu chu theih asi lai lo rawh; Siatnâk nih nan ram chu a râwk nawlh lai lo rawh. Kulh hâwi hen ka nan hum hen ka nan vêng lai; Ruang ka nan suah ruangah na ka sawr lai.

¹⁹ “Sûn ah Nî chu na rangah chêu asi lai lo rawh, Zân khawm ah thlâpa chu na rangah chêu asi lai lo rawh; Kei, LALPA chu na zungzâl chêu kasi lai le, Ka rokualnâk chêu chu na tlûnah a chêu lai.

²⁰ Na ngaihsiatnâk ni chu a dawng lai rawh. Kei, LALPA chu na zungzâl chêu, Nî leh thlâ ngâk hen chêu kumza mi chu kasi lai.

²¹ Na mi tla nih thil dik an ti lai le, Ram chu anna ting kumza lai. An ektê sinah ka rokualnâk langh ding hen, Ka phun hen ka siam na mi an si.

²² Na dâwngsungkhur tâwm chem leh nâu chem khawm, Phun rokual thiltikho tak an si lai. Tik dik tak a hawng tlung chun ka umtir sawm lai. Kei LALPA kasi!” a ti.