ISAI 6 - Bawm Common Language Bible Version

Pathian Nih Khuavâng Si Ding Hen Isai A Kawh

¹ Lalchem Uziah thih kum ah LALPA ka muh. Laltophah ah a to le, sâng tak ah chungnungtir hen a um le, a kawrfual nih Biakin pumpi a khattir.

² A kiangah chun thilsiam meialh hâwi mi an dîr le, thla paruk seng an nei. Seraphims (Thilsiam) kip nih an thla panih hen an mêl an huh le, panih hen an tak an khuh, thla panih hen an zuang.

³ An ektê hen anna auh tawnh: “A thenhlimh, A thenhlimh, A thenhlimh! LALPA Zeizawng tikho chu a thenhlimh! A rokualnâk nih laikulh a khattir,” ti hen.

⁴ An hâu nih Biakin lungphûm a tlirh, Biakin khawm meikhû hen a khat.

⁵ Kei nih, “Kei rangah lungumnâk a um lo rawh! Thu sual ka simnâk mûr ruangah mi vânduai kasi, thu sual simtu nâwngah um mi kasi. Sikhawmsele, ka mit ngelchel nih Lalchem, LALPA Zeizawng tikho chu ka muh rawh,” ka ti

⁶ Churawhchun, Seraphims (Thilsiam) lakah mi pakhat chu ka sinah a hawng zuang le, Mâichâm thawk hen meiṭil châicheh hen cheh bû hen a hawng put.

⁷ Chu meiṭil hen ka mûr chu a hawng tawngh le, “Hi hen na mûr chu tawngh asi rawh le, tu chun na mawhnâk a um lo rawh, na sualnâk ngaihdam asi rawh,” a ti.

⁸ Churawhchun, Lalpa thusim ka theih, “Âu me ka fial lai? Kan mifial chu âu asi awt?” a ti. Kei nih ka sâng le, “Keimah ka kal lai! Hawng ka fial rawh!” ka ti.

⁹ Churawhchun, hi thuchah hi mi zapi simh na ding hen kal ding hen hawng ka fial rawh: “Zei ti tal hen ngâi khawm ule, nan theihthiam ding asi lo. Zei ti tal hen zauh khawm ule, zei a hawng tlung nan theih ding asi lo,” ti hen.

¹⁰ Churawhchun, ka sinah, “Hi minung tla thinlung hi mawlâwttir, an nâ sêttir, an mit tla châwtir, an muh kho lo hen an theih kho lo hen, an theihthiam lonâk ding hen. Chu hâwi asi lo chun, keimah leiah an hawng a her lai le, damh an si lebang lai,” a ti.

¹¹ Kei nih, “Chu hâwi hen zeitiang asi awt, Lalpa?” ka ti. Anih nih a sâng le, “Khuapi â râwk hen a karo asi hen, in tla luahtu umlo hen ram chu râwk dep hen kaltâk asi tiang hen.

¹² Mi tla chu lât takah ka fial na lai le, ram chu a lâwng thlo lai.

¹³ Chu lak chun minung parâ lakah pakhattê men um khawmsele veih asi lai. Oak thing hâu mi kung bul hâwi asi lai,” a ti. (A bul nih chun Pathian mi tla a thartê hen dirh ding mi a zauhtir.)