ISAI 56 - Bawm Common Language Bible Version

Pathian Mi Tla Nih Phun Zawzawng An Uap Lai

¹ LALPA nih a mi tla sinah, “Sâwtlotê ah ruang ka nan suah na awt ruangah, a dik mi leh â rep mi chu ti u.

² Dinhni ulh kumzatu leh diklo hen mang lotu chu mal ka sâwm na lai. Thilsual tilotu tla chu mal ka sâwm na lai,” a ti.

³ Ramdang minung, LALPA mi tla sinah teltu tla nih chun, “LALPA nih a mi tla hen amah sawnh ding hawng ka siang lai lo ti lah na seh,” a ti. Mi tilkhei nih chun, fa tla a nei kho lo ruangah Pathian mi tla sinah mi kasi lai lo ti ruat lah seh.

⁴ Chubang mi tla sinah LALPA nih, “Keimah na ka zah ruangah ka dinhni tla na ulh hen, keimah lawmh kâng thil na ti hen ka thudântuk zumhkâi tak hen na zûl chun,

⁵ churawhchun na min chu ka Biakin ah leh ka mi tla sinah fapa leh fanu na nei mi ngâk hen theihkumza asi lai. Zeiliau khawm ah philh na si lai lo,” a ti.

⁶ LALPA nih, ramdang minung tla, a mi tla sinah hawng a pêktu, amah dâwt hen nâwl zulhtu, Dinhni ulh hen a thudântuk zumhkâi tak hen zûltu tla sinah:

⁷ “Ka tlâng thenhlimh Zion ah ka nan kalpi na lai le, ka in ah thlachamnâk ah lâwmnâk ka nan pêk lai le, ka mâichâm ah bâwlnâk nan hawng ap mi chu ka pawm lai. Ka Biakin chu phun zawzawng thlachamnâk in ti asi lai,” a ti.

⁸ LALPA Zahkâi, a mi Israel tla sal ah tâng mi kîrpitu nih, midang tla khawm anmah sinah hawng a fawnh ding hen a hawngpi na awt ti thu a tiamh.

Israel Hotu Tla Mawhtirnâk

⁹ LALPA nih ramdang mi phun tla chu ramsa hâwi a hawng hen a mi tla veih na ding hen a simh na.

¹⁰ An sinah, “Ka mi tla simhfiang ding mi ruitu tla chu mitchâw an si! Zeikhawm an theih lo. Râlvêngtu ui âu lo hen a it le, mang a manh huahmah mi hâwi an si. It an duh châwk a!

¹¹ Annih chu ui hamkah tâwk ti nei lo mi hâwi an si. Hi bang ruitu tla nih theihthiamnâk zeikhawm an nei lo. An ektê hen mah duhzia zia hen thil an ti le, anmah rangah ṭhatnâk cho an hâwl.

¹² Chubang zurî tla nih chun, ‘Uain kan hâwl lai le, kan din kho rirî hen kan din lai! Thâituan ding mi chu tusûn ngâk hen a ṭha dauh lai! an ti,’ ” a ti.