ISAI 54 - Bawm Common Language Bible Version

LALPA Nih Israel Tla Rangah A Dâwtnâk

¹ Jerusalem, nang chu nunau fa nei lo hâwi na si le, sikhawmsele tu lam chu lâwm ruangah la sak hen âu kho na si rawh. Tu chun nunau, a pasal nih a umpi kumza mi ngâk hen fa tam dauh na nei lai.

² Na umnâk puanin chu kauh le; a puan dung sâutir le, a rêngnâk tung birhtir.

³ Na ramri tla na kauh lai le, tuah phundang tla nih an luah mi ram tla chu na mi tla nih anna ting nawlh lai. Khuapi kaltâk rawh mi chu minung hen an khat lai.

⁴ Ṭih lah, ningzak saih hen na um lai lo rawh le nâutir khawm na si lai lo rawh. Nupi seino tê hâwi hen zumh na kâi lonâk leh numei hâwi hen thim pem hen na um mi tla chu na philh lai rawh.

⁵ Nangmah a nan siamtu a min LALPA Zeizawng tikho chu na rangah pasal hâwi asi lai. Israel Pathian thenhlimh laikulh zawzawng lâirêltu nih ruang a nan suah lai.

⁶ Israel, nang chu seino nungâk a pasal nih a kaltâk le thungâi a lungfâk mi hâwi na si. Sikhawmsele, LALPA nih a nan kawh nawlh le, na sinah:

⁷ “Sâwtlotê kar chu ka nan mâk le; dâwtnâk fâk tak hen ka nan lâk nawlh lai.

⁸ Sâwtlotê cho ka thinthawk ruangah ka nan hertâk le, sikhawmsele ka nan dâwtnâk ka nan muhtir kumza lai rawh,” a ti. Churuangah LALPA a nan humtu nih a sim asi.

⁹ “Noa um liau khawm ah tual tlûnah buanso tlungtir lo rawh ding hen thu ka tiamh. Tu khawm ah na lakah thinrun lo rawh ding hen thu ka tiam; nunsimh hen ka nan rêp lai lo rawh.

¹⁰ Tlâng sâng leh tlâng tênâu tla chu â râwk kho. Sikhawmsele ka nan dâwtnâk chu zeiliau khawm a dawng lai lo; thlangamnâk ka thutiam chu ka theihkumza lai,” a ti. Churuangah LALPA a nan dâwttu nih a sim asi.

Hi Nûnah Jerusalem Um Ding Dân

¹¹ LALPA nih, “Aw Jerusalem, nang nganfâk tuartu, ṭangpitu nei lo khuapi, thlangamhtu pakhat khawm nei lo mi na lungphûm chu lungsung hen ka dirh nawlh lai.

¹² Na insung tla chu lungsung tak hen ka sak lai le, mei hâwi hen a chêu mi lung hen na kulh kawtkâ tla ka siam lai. Na kiangkam hêl dak hen khua kulh chu lungmantam hen ka siam lai.

¹³ “Keimah tak nih na mi tla chu ka sîntir na lai le sul-le-lam tluangnâk leh thlangamnâk ka pêk na lai.

¹⁴ Diknâk leh repnâk nih a nan chaktir lai. Nehsawhnâk leh ningṭihnâk lakah mi chu na him lai rawh.

¹⁵ Âutal nih a nan do chun, keimah thu lo hen dotu asi; Âuzawng a nan dotu chu an tlû lai.

¹⁶ “Mei leh sophu timhtuahtu nâmdêng ka siam. Theih ding hen kawrsen, riamnâm mangtu khawm ka siam.

¹⁷ Sikhawmsele, zei riamnâm khawm nih nganfâk a nan pêk kho lai lo; A nan phiartu tla zawzawng na sâng ver na lai. Ka to-aw tla chu ka hum na lai le, nehtu ah ka siam na lai,” a ti. Chu chu LALPA nih a sim mi asi.