ISAI 52 - Bawm Common Language Bible Version

Pathian Nih Jerusalem A Hum Lai

¹ Jerusalem, chak tak leh rokual tak hen um nawlh rawh! Pathian khuapi thenhlimh, rokualnâk hen a thuam rawh! Lunglo tla chu na khua kulh sungah an lût lai lo rawh.

² Jerusalem, thawsuak tak hen a lît rawh! Valeidip lakah mi thawk le, na laltophah tlûnah to! Zion ah mi saltâng tla, rêng a nan khimh na mi sût!

³ LALPA Zahkâi nih a mi le tla sinah, “Sal nan si liau khawm ah nanmah ruangah tangka pêk asi lo hâwi hen nan suak liau khawm ah pêk asi lai lo.

⁴ Aigupta ah ramdang mi si hen nan va um liauah nanmah thu thu hen nan va um; Asiria nih zângran ko hen a nan kalpi ving na le, nan man zeikhawm a pêk lo.

⁵ Tuah Babulon ah chu hâwitê hen thil a hawng um, sal nan si mi lakah a man zeikhawm pêk asi lo. Nan tlûnah lâirêltu tla chu anna zûm hen anna khâwng le, thungâi hen ka tlûnah an ka zauhnawmh zia an langh.

⁶ Tik a hawng tlung ding mi lakah Pathian kasi ti ka sim mi chu nan theih lai,” a ti.

⁷ Tlâng sâng tla tan hen thâwngthâng ṭha thlangamnâk thu puttu mifial hawng mi muh ding chu a chê awt a! Nehnâk thu a sim le, Zion sinah, “Na Pathian chu lalchem asi!” a ti.

⁸ Khuapi vêngtu tla chu anna lâwm tuktarâi le, a rual hen an âu nûnah an âu nawlh. LALPA Zion ah a hawng kîr mi chu anmah mit ngelchel nih a muh kho.

⁹ Nang, Jerusalem râwk hen um rawh mi, lâwm hen âu rawh! LALPA nih khuapi chu a hum hen a mi tla chu thla a ngamh na lai.

¹⁰ LALPA nih a thiltikhonâk thenhlimh a mang lai le; a mi tla ruang a suah na lai le, laikulh ah mi zawzawng nih an muh lai.

¹¹ Nannih Babulon kaltâktu tla, Biakin thuamthil zawzawng puttu tla, theih u! Khap mi thil tham lah ule; thenhlimh tak hen um ule, suak u.

¹² Tu lam chu nam bû hen nan suak lai lo rawh le; suak ding hen khawm nanna ṭang lai lo rawh. LALPA nan Pathian nih a nan rui na lai le thil zeizawng ah a nan hum na lai.

To-aw Tuarnâk

¹³ LALPA nih, “Ka to-aw chu a rianṭuannâk mun a luah lai le, zahkâi tak hen a um lai.

¹⁴ Mi tam tak nih amah an muh tikah an lâu khit lai; râwk asi tuktarâi le, zauhnâk ah minung a bangh lo re.

¹⁵ Sikhawmsele tu lam chun phun tam tak nih amah chu chê an ti lai le, lalchem tla khawm nih chê an ti tuk lai le, sim ding an theih lai lo. An theih dahlo mi thil tla chu an muh hen an theihthiam lai rawh,” a ti.