ISAI 50 - Bawm Common Language Bible Version

¹ LALPA nih, “Mi nih a nupi a mâk mi hâwi hen ka mi tla hi kaltir ving ding hen ma nan ruat? Asi chun, mâknâk lasui zeiah a um? Mi nih a fa tla sal ah a zuar ving na mi hâwi hen sal ah an zuar ving na hen ma nan ka ruat? Silo, nan sual ruangah sal ah put hen nan um mi asi; thilsual nan ti ruangah nar hen nan um mi asi.

² “Zei rangah anmah ruangsuah ding hen ka kal liauah ka mi le tla nih an hawng ka sunhsak lo? Ka auh na liauah zei rangah an sâng lo? Anmah ruangsuah kho lo ding ma kasi? Tipi tla kang ding hen thu ka pêk kho hen tiva tla khawm tî umlo ruangah ngâ thi ver ding hen ka tuah kho.

³ Thih ruangah lungfâknâk a um mi hâwi hen vândum chu mûi ah ka siam kho,” a ti.

LALPA To-aw Ê-aw Ngâinâk

⁴ Mi chaklo tla chu ka chaktir khonâk ding hen LALPA zahkâi nih sim ding mi chu a hawng ka sîntir. Zîng siar hen hawng ka sîntir mi lakah ngâi ding hen thinlung thawknâk hawng ka pêk.

⁵ LALPA nih theihthiamnâk hawng ka pêk le, A lakah ka hel lo mawh kâng dang lei khawm ka hawitâk lo.

⁶ An hawng ka vuaktu tla lakah ka kêng ka dawnh. An ka zauhnawmh liauah ka khap na lo le ka khamul an phâwi hen ka mêl ah chil an ka sah liau khawm ka khap na lo.

⁷ LALPA zahkâi nih a hawng ka ṭangpi ruangah an hawng ka zauhnawmhnâk chu ka rangah a fâk lo. Tuar kho rarâm ding hen ka tum.

⁸ Pathian a nâi ruangah ka mualpho awtlo ti ka theih le sual ka nei lo zia a theih. Ka tlûnah mawhphurh hen hawng ka phiar ngamtu âu a um? Lâirêlnâk ah munkhat hen kan kal lai! A hawng ka phiarnâk hawng put seh me!

⁹ LALPA zahkâi nih hawng ka vêng mi lakah âunih ka mawh ti langhtir kho? Rulchawn nih puan a ei mi hâwi hen hawng ka phiartu tla zawzawng chu an vei lai.

¹⁰ Nannih LALPA zahtu tla leh a to-aw thu zûltu tla nan kalnâk lampi chu mûi khawmsele LALPA chu zumh ule, nan Pathian lakah a ngauh u.

¹¹ Nannih midang tla veih ding hen phiartu zawzawng tla, nanmah phiarnâk nih a nan veih na lai. Hamh tak hen thihnâk nan tuar ding mi chu LALPA nih a hawng tlungtir lai.