ISAI 47 - Bawm Common Language Bible Version

Babulon Tlûnah Lâirêlnâk

¹ LALPA nih, “Babulon, na laltophah ah mi chu ṭum le, tual tlûnah valeidip lakah to rawh. Veikhat chu nungâk thenhlimh hâwi hen neh kho lo mi khuapi na si le, sikhawmsele na nêm hen na no kumza lai lo rawh! Tu chun sal na si rawh.

² Na fângrialnâk lung chu zît le, sangvut rial! Na khuhnâk puan lît! Na puan dawh tla lît! Tiva tan ding hen na nufên lîm!

³ Mi nih takkaro hen an muh lai le, ningzak tak leh nâu tak hen an muh lai. Phû ka lam lai le, âukhawm nih an hawng ka khap lai loh,” a ti.

⁴ Israel Pathian Thenhlimh nih hawng kan suah le, a min chu LALPA Zeizawng tikho asi.

⁵ LALPA nih Babulon sinah, “Mun king leh a mûinâk ah va to le; phun tla lalnu an ti lai lo rawh!

⁶ Ka mi tla lakah ka ro a thawk le; ka tâ silo rawh mi hâwi hen ka ti na. Na thu thu hen ka siah na le, an lakah khuaruatnâk na langhtir lo le; upa tiang khawm fâk tak hen na ti na.

⁷ Lalnu si kumza ding na ruat le, chubang thil zawzawng a dawng ding mi chu thinlung ah dawnnâk leh ruatnâk zeikhawm na nei lo.

⁸ “Nuamnâk duhtu tla, nannih him ding leh ruangsuah ding hen a ruat mi tla, hi hi ngâi u. Pathian tluk a rokual leh nang banghtu umlo mi hâwi hen na sim. Numei silo thlo ding leh tê-le-fa thlâunâk tuar lo thlo ding hen na ruat.

⁹ Sikhawmsele ni khat kar ko ah hi bang thil tla hi a hawng tlung vevê awt. Na dâwithiamnâk zawzawng mang khawm le, na pasal leh na fa tla chu na thlâu ding nget.

¹⁰ “Na thilsual ti chu nangmah ngelchel nih na theih ko le; mi âukhawm nih an muh lo ding hen na ruat. Na finghnâk leh na theihnâk nih lampi a nan vâitir le, ‘Pathian kasi, kei banghtu âukhawm an um lo,’ na thinlung ah na ti.

¹¹ Siatnâk na lakah a hawng tlung lai le, na dâwithiamnâk nih a kham kho lai lo. Mawhsareh hen na lakah siatnâk a hawng tlung lai le, chu siatnâk chu na dawn dahlo mi asi!

¹² Na mêt liau thawk hen na dâwi simnâk leh tamh tla zawzawng kha kil. Nangmah rangah an ṭangpi hen, na mêlma tla rangah na lâutir na kho lai dahmawh.

¹³ Zeitin tal hen ngaihdân lâk khawm le, thiltikhonâk na nei lêm lo. Na mifing tla, ârfi lei sîntu tla, vân lem siamtu tla leh a thla thla hen zei a hawng tlung awt ti a nan simhtu tla chu hawng na hen an hum seh.

¹⁴ Fapawn tliar hâwi an si lai le, mei nih a khangh hep na lai! Anmah leh anmah khawm anna hum kho lai lo, an rangah mei alh chu a sâ awt tuk, mei chu an rangah nuam tâwk cho hen a lumtirtu asi lai lo.

¹⁵ Na san lakah chu vial chu mifing thu an simhtu tla nih na rangah thil ṭha an ti mi chu asi lai. A nan mâk thlap lai le, anmah duhnâk chiauah an kal lai le, nangmah humtu pakhat khawm an um lai lo,” a ti.