ISAI 43 - Bawm Common Language Bible Version

Pathian Nih A Mi Tla Ruangsuah Ding Men Thu A Tiamh Na

¹ Israel, nan siamtu LALPA nih, “Lâu lah, ka nan hum lai. Na min hen ka nan auh, ka tâ na si.

² Tî thûk tak na pal liau khawm na sinah ka um lai; na lawksawngnâk nih a nan khuh lai lo. Mei lakah na lan liau khawm ah na kâng lai lo; niknâk fâk tak hawng tlung mi khawm nih nganfâk a nan pêk lai lo.

³ Kei chu Israel Pathian thenhlimh, a nan humtu LALPA na Pathian kasi. Aigupta chu a nan suah ding hen ka nâutir lai; Sudan leh Seba khawm ka nâutir lai.

⁴ Na nungnâk hum ding hen phun zawzawng ka nâutir lai le, ka lakah na sung ruangah leh ka nan dâwt hen zahkâinâk ka nan pêk ruangah.

⁵ Na sinah ka um, lâu lah! “Saklei lât tak thawk hen leh thlanglei mun lât chemnâk thawk hen na mi tla chu in leiah ka tlungpi na lai.

⁶ Marlei chu a nan suah na ding hen ka simh na lai le, simlei chu a nan thloh na lo ding hen ka simh lai. Ka mi tla chu ram lât tak, laikulh munkip thawk hen kîrtir na u.

⁷ Keimah mi tak an si le, hawng ka rokualtirtu rangah ka siam na mi an si,” a ti.

Israel Chu LALPA Theihpitu Asi

⁸ Pathian nih, “Lâirêlnâk in ah ka mi tla kawh na u. Mit chu an nei le, sikhawmsele an mit a chaw; nâ an nei le, khawmsele an nâ a sêt!

⁹ Niknâk ah hawng ding hen phun tla kawh na u. An pathian tla lakah a zei mi nih mâilei thu simkanh kho? Tuah thil a hawng tlung mi hi an lakah âunih a simkan? Hi bang pathian tla hi an dik ti theih ding hen anmah theihpitu ah hawng put na seh, an thusim a dik ti birhtir ding hen.

¹⁰ “Israel mi tla, nannih chu keimah theihpitu nan si; ka to-aw siding hen kan thîm na le, nan ka theih hen nan ka lung hen keimah cho Pathian kasi ti nan theihthiam khonâk ding hen. Keimah lo chu pathian dang rêng a um lo; a lân khawm a um dahlo, hi nûn khawm ah a um rerêng lai lo rawh.

¹¹ “Keimah cho hi LALPA a nan hum kho natu chu kasi.

¹² Thil a hawng tlung ding mi ka simkanh le, churawhchun nanmah ṭangpi ding hen ka hawng kal. Ramdang pathian nih hi hâwi an ti dahlo; nannih lam chu hawng ka theihpitu tla nan si.

¹³ Kei chu Pathian kasi le, kasi kumza lai. Ka thiltikhonâk lakah mi âukhawm an suak kho lai lo; thil ka ti rawh mi chu âukhawm nih an dangtir kho lai lo,” a ti.

Babulon Thawk Hen Suaknâk

¹⁴ Israel Pathian Thenhlimh, a nan hum natu LALPA nih, “Ruang a nan suah na ding hen Babulon ah kawrsen ka hawng fial lai. Khuapi kulh kawtkâ tla ka chimtir lai le, a minung tla âunâk tla chu ṭapnâk ah â chang lai.

¹⁵ Kei LALPA nan Pathian Thenhlimh kasi. Israel, an siam natu nan lalchem kasi,” a ti.

¹⁶ A lânah LALPA nih tipi tî a hêl mi lan dak hen lampi a siam.

¹⁷ Râwk ding hen kawrsen chak tak, kari leh rang kêng tlûnah chuan mi a kalpi na. Thawk lo rawh ding hen an tlû le, meichêu hâwi hen a mih na!

¹⁸ Sikhawmsele LALPA nih, “A lânah thil kal rawh mi lakah a ngauh lah le, a lânah thil a hawng tlung mi lakah um lah.

¹⁹ Thil thar ka ti ding mi chu ngâk rawh. A hawng tlung ko rawh, tuah na muh kho lai! Ramkaro ah lan dak hen lamlian ka siam lai le, chunah chun tinungva ka nan pêk lai.

²⁰ Ramsa tiang khawm nih an hawng ka zah lai le; kâwlui leh vachâ tla khawm nih ramkaro ah ka mi thîm tla rangah tiva ka luangtir tik chun an hawng ka sawr lai.

²¹ Keimah rang ding ê hen ka siam na mi an si le, keimah sawrnâk la an sak lai,” a ti.

Israel Sualnâk

²² LALPA nih, “Israel, na hawng ka neng rawh ma hi; na hawng ka sawnh lo thlo rawh.

²³ Na dawrâ duahphung thil ap khawm na hawng ka put piak lo rawh; bâwlnâk hen khawm na ka zahnâk na langh lo rawh. Thil ap ngiar hen thilrit ka nan pêk lo, rimthâw ngiar hen nengtawr kan kâitir lo.

²⁴ Ka rangah rimthâw khawm na châwklo, na ran thâu hen khawm na ka khimtir lo. Chu ngâk hen na sualnâk ruangah ka rangah thilrit na si le, thil diklo na ti mi ruangah ka rangah nengtawr na kâi.

²⁵ Sikhawmsele na sual ngaihdamtu Pathian kasi, keimah kasi ruangah chu chu ka ti asi. Na lakah sual chu ka theihkumza lai loh.

²⁶ “Lâirêlnâk in ah kan kal lai le, na phiarnâk thu hawng put! Diknâk ah na um ti theihnâk ding hen na thunawk hawng put!

²⁷ A tîrah mi a nan thlâk natu khawm an sual; an rui natu khawm ka lakah thilsual an ti.

²⁸ Nan lâirêltu tla nih ka mun thenhlimh an nawmh. Churuangah kei khawm nih Israel tlûnah siatnâk ka tlungtir le, zauhnawmh ding hen ka mi tla chu ka umtir na,” a ti.