ISAI 42 - Bawm Common Language Bible Version

LALPA To-Aw

¹ LALPA nih, “Hi hi ka to-aw ka chaktir mi, ka mi thîm pakhat, ka lungnâ tlâ tak mi chu asi. Ka thlarau hen ka khattir le, phunkip sinah diknâk a tlungtir lai.

² Khua dungah hâu suah hen a âu lai lo le, fâk hen thu a sim lai lo.

³ Lâiluang a pâwk mi chu a thlawngh lai lo, meichêu a mit didem mi khawm a mih lai lo. Mikip sinah lâirêlnâk dik um kumza ding mi a tlungtir lai.

⁴ Lungumnâk leh râlṭhatnâk a tlâu lai lo; tual tlûnah diknâk a birhtir lai. Ram lât tak mi nih a sîntirnâk mawhlah tak hen an ngâk lai,” a ti.

⁵ Pathian nih vân tla a siam le, a pharh; tual leh chu lakah um mi tla umdân ding a siam. Mi zawzawng sinah nungnâk leh thaw a pêk na. Tuah LALPA Pathian nih a to-aw sinah thu a sim le,

⁶ “Kei, LALPA nih, ka nan kawh hen, tual tlûnah diknâk ti hen a um mi chu muh ding hen thiltikhonâk ka nan pêk. Nangmah mang hen mi zawzawng sinah thudântuk ka siam lai le, nangmah mang hen phun tla sinah chêu ka tlungtir lai.

⁷ Mitchâw mit na deitir lai le, rêngin mûi ah to mi tla chu na suah na lai.

⁸ “Keimah cho hi LALPA na Pathian kasi. Pathian dang tla nih ka rokualnâk anna ting ding asi lo; milem tla chu keimah sawrnâk ka tingtir na awtlo.

⁹ Thil ka simkan rawh mi tla chu tuah dik tak hen a hawng tlung rawh. Thil thar tla chu a hawng tlung lânah tuah ka nan simh na lai,” a ti.

Sawrnâk La

¹⁰ LALPA sinah la thar sak u; laikulh zawzawng nih a sawrnâk la sak u! Tipi dung zawhtu tla, amah chu sawr u: Tipi ah thilsiam zawzawng tla, amah chu sawr u! Ram lât takah um mi tla, la sak u!

¹¹ Ramkaro leh a khuapi tla nih Pathian chu sawr seh: Kedar mi tla nih amah chu sawr seh! Sela khuapi ah um mi tla chu tlâng sâng tla tlûnah lâwm hen âu na seh.

¹² Ram lât tak ah um mi tla nih LALPA sinah sawrnâk leh rokualnâk pêk na seh.

¹³ LALPA chu râltuk thiam mi hâwi hen tuk ding hen a kal le; râltuk ding hen thinlung thawk tak hen â timhtuah. Râltuk ding phuang hen a âu; a mêlma tla lakah a thiltikhonâk a langh.

Pathian Nih A Mi Tla Ṭangpi Ding Hen Thu A Tiamh

¹⁴ Pathian nih, “Sâwt tak chu dâisip hen ka um le; ka mi tla rangah ka sâng na lo. Sikhawmsele tu chun thilti ding tik a hawng tlung rawh; nunau nganfâk mi hâwi hen ka râk.

¹⁵ Tlâng tênâu leh tlâng sâng tla ka veih lai le, thing leh belh tla ka chârtir lai. Tivakuam tla chu ramkaro ah ka changtir lai, tili mi tî tla ka kangtir lai.

¹⁶ “An kal dah lonâk lampi tla ah ka minung mitchâw tla chu ka rui na lai. An mâika ah mûi chu chêu ah ka changtir lai le, ram siakhâ chu rual zat hen ka siam lai. Hi bang tla hi ka thutiam asi le, pakhat khawm relhlo hen ka zûl lai.

¹⁷ Milem ngauhsantu tla leh milem tla ka pathian titu tla chu nâutir hen ningzak saih an si lai,” a ti.

Theih Ding Hen Israel Tla Tlinhlonâk

¹⁸ LALPA nih, “Mi nâsêt tla, ngâi u! Mitchâw tla, nâi tek hen zauh u!

¹⁹ Ka to-aw ngâk hen mitchâw khun mi leh ka mifial ngâk hen a nâsêt dauh mi an um maw aw?

²⁰ Israel, kha tluk na muh tam rawh le, sikhawmsele, nang rangah zei asi rawh ne? Theihnâk ding hen nâ chu na nei le, sikhawmsele zei me na theih tak mi a um?” a ti.

²¹ LALPA chu hum ding hen duhtu Pathian asi le, a sîntirnâk leh a dân tla chu â putso le, a mi le tla nih an zah ding hen a duh na.

²² Sikhawmsele tuah a mi le tla chu râwk hep hen an um le, khur sungah an renh pang na le, rêngin ah an thuh na ving; râwk leh rûn hen an um le, anmah ruangsuah ding hen pakhat khawm an hawng lo.

²³ Nan lakah âutal nih hi hi a ngâi lai ma? Tu thawk hen thiamthih tak hen nan ngâi vima lai ma?

²⁴ Âunih me Israel chu râwktu tla sinah a pêk? Amah tlûnah thilsual kan ti mi LALPA tak asi! Um ding hawng kan duh mi dân hâwi hen kan um lo le, sîntirnâk hawng kan pêk mi khawm kan zûl lo.

²⁵ Churuangah a thinthawknâk theih ding hen hawng kan siam le, siatnâk râltuk hawng kan tuartir. Mei hâwi hen Israel pumpi chu a thinthawknâk nih hawng kan khangh le, sikhawmsele, zei a hawng tlung ti khawm kan theih lo nget rih; chu lakah zeikhawm kan rangah theihnâk kan nei lo.